«ماعجان» ادەبي-كوركەم قوعامدىق-ساياسي جۋرنالىنىڭ العاشقى سانى 2007 جىلى قاڭتاردا جارىق كورىپ, وبلىس ومىرىندە ۇلكەن مادەني جاڭالىق رەتىندە قابىلدانعان ەدى.
«ماعجان» ادەبي-كوركەم قوعامدىق-ساياسي جۋرنالىنىڭ العاشقى سانى 2007 جىلى قاڭتاردا جارىق كورىپ, وبلىس ومىرىندە ۇلكەن مادەني جاڭالىق رەتىندە قابىلدانعان ەدى.
الايدا, قارجى تاپشىلىعىنان 9 سانى عانا شىعىپ, دارا تۇلعا رەتىندە تورتكۇل تۇركى دۇنيەسىن مويىنداتقان ۇلتشىل, رۋحشىل اقىن ماعجاننىڭ شىعارماشىلىق اسىل قۇندىلىقتارىمەن جان-جاقتى تانىسا باستاعان تالعامپاز وقىرمان قاۋىم سۋسىنىن باسا الماعان كۇيى وكىنىشتە قالعان بولاتىن.
ەندى, مىنە, اراعا 6 جىل سالىپ, ءوڭىر باسشىسى سامات ەسكەندىروۆتىڭ تىكەلەي قولداۋىمەن باسىلىم ءوز وقىرماندارىمەن قايتا تابىستى. ونىڭ تۇساۋكەسەرى س.مۇقانوۆ اتىنداعى امبەباپ كىتاپحانادا ءوتىپ, جيىندى كىرىسپە سوزبەن اشقان ىشكى ساياسات باسقارماسىنىڭ باسشىسى سالاۋات مۇقسيموۆ بيىل ۇلى شايىردىڭ 120 جىلدىق مەرەيتويىنا رەسپۋبليكالىق, وبلىس دەڭگەيىندە كوپتەگەن ءىس-شارالاردىڭ ۇيىمداستىرىلعانىن جەتكىزدى. ولاردىڭ قاتارىندا «ماعجان كوكتەمى» ءىى رەسپۋبليكالىق ونەر فەستيۆالىن, ول تۋرالى تۇسىرىلگەن كوركەم-دەرەكتى ءفيلمدى, عىلىمي-تاجىريبەلىك كونفەرەنتسيالاردى اتادى. ءبىز بۇگىن اقيىق اقىننىڭ ءومىرى مەن شىعارماشىلىعىن جان-جاقتى ناسيحاتتايتىن, وبلىس قالامگەرلەرى مەن جاس تالانتتاردىڭ تۋىندىلارىن جاريالايتىن جۋرنالدىڭ قايتا جارىق كورۋىمەن قاۋىشىپ وتىرمىز, دەدى سالاۋات سىيلىباي ۇلى. سوسىن ءسوز كەزەگىن وسى يگى شارانى ۇيىمداستىرۋشىلاردىڭ ءبىرى, رەسپۋبليكالىق «ەگەمەن قازاقستان» گازەتى باس رەداكتورىنىڭ ورىنباسارى, بەلگىلى جۋرناليست-جازۋشى, جاراسباي سۇلەيمەنوۆكە بەردى. ماعجانتانۋشى رۋحاني, مادەني سالاعا ۇلكەن كوڭىل ءبولىپ, جاناشىرلىق قولداۋ كورسەتكەنى ءۇشىن سامات ساپاربەك ۇلىنا ريزاشىلىعىن ايتا كەلىپ, باسىلىم الداعى ۋاقىتتا ماعجاننىڭ شىعارماشىلىعىمەن, وڭىرلىك اۋقىممەن عانا شەكتەلىپ قالمايتىنىن, ەل ونەرىنە, مادەنيەتىنە قاتىستى ماسەلەلەر دە كەڭىنەن قامتىلاتىنىن, اسىرەسە, جاستار شىعارماشىلىعىنا ۇلكەن ورىن بەرىلەتىنىن, ەل اۋماعىنا تاراتۋ ماقساتى تۇرعانىن العا تارتتى.
جيىندا قازاقستان جازۋشىلار وداعى جەرگىلىكتى بولىمشەسىنىڭ توراعاسى, اقىن ءمۇتاللاپ قانعوجين, «اسىل مۇرا» ورتالىعىنىڭ جەتەكشىسى تاڭات سۇگىرباەۆ, سقمۋ جانىنداعى ءتىل ينستيتۋتىنىڭ ديرەكتورى جانار تالاسباەۆا, «قازاق ءتىلى» حالىقارالىق ۇيىمى وبلىستىق فيليالىنىڭ جەتەكشىسى كارىباي مۇسىرمان, تاعى باسقالار جۋرنالدىڭ وسى جولعى سانى ايدارلار, تاقىرىپتار سان-الۋاندىعىمەن تارتىمدى دا مازمۇندى شىققانىن, بەلسەندى اۆتورلار قاتارىنا ەلىمىزگە بەلگىلى قالامگەرلەر مەن تۇلعالاردىڭ تارتىلۋى قۇپتارلىق ەكەنىن تىلگە تيەك ەتتى.
تۇساۋكەسەردە «ماعجان كوكتەمى» ءىى رەسپۋبليكالىق ونەر فەستيۆالىنىڭ جۇلدەگەرى امانجول زاعىپار ماعجان رۋحىنا ارنالعان «قىزىل وت» ولەڭىن ناقىشىنا كەلتىرىپ وقىپ بەردى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
