«قازاقستان» تەلەارناسى «ينتەللەكتۋالدى ۇلت – 2020» اتتى جاڭا جوبانىڭ تۇساۋىن كەستى
قىركۇيەك ايى ءبىلىم ەسىگىن اشىپ قانا قويمايدى, بۇل – تەلەارنالاردىڭ قالىڭ كورەرمەنى ءۇشىن جاڭا ماۋسىمدى باستايتىن مەزگىلى. ەندەشە, ءدال وسى كۇندەرى ۇلتتىق تەلەارنادا «بىلگىرلەر وتاۋى» جوباسى تۇساۋىن كەسىپ, ءوز اۋديتورياسىنا جول تارتتى.
«قازاقستان» تەلەارناسى «ينتەللەكتۋالدى ۇلت – 2020» اتتى جاڭا جوبانىڭ تۇساۋىن كەستى
قىركۇيەك ايى ءبىلىم ەسىگىن اشىپ قانا قويمايدى, بۇل – تەلەارنالاردىڭ قالىڭ كورەرمەنى ءۇشىن جاڭا ماۋسىمدى باستايتىن مەزگىلى. ەندەشە, ءدال وسى كۇندەرى ۇلتتىق تەلەارنادا «بىلگىرلەر وتاۋى» جوباسى تۇساۋىن كەسىپ, ءوز اۋديتورياسىنا جول تارتتى.
ۇلتتىق ارناداعى بۇل جوبانىڭ باستى ەرەكشەلىگى – زياتكەرلىك باعدارلاما بولىپ تابىلادى. بۇل دا بولسا ۋاقىتتىڭ سۇرانىسىنان تۋعان سونى باعىت دەر ەدىك. ويتكەنى, كورەرمەندەر دە تالعام-تالاپتارىمەن, ورە ولشەمدەرىمەن توپتارعا بولىنەدى. ءماسەلەن, ءتۇرلى ويىن-ساۋىق, ءان-كۇي باعدارلامالارىندا كوشىپ جۇرەتىن ءبىر توپ ءانشى, ونشاقتى ونەر جۇلدىزى ءابدەن جالىقتىرعان جۇرت بارلىق كەزدە كوگىلدىر ديدارداعى جاڭالىقشىل ءدۇنيەلەرگە قۇمار. قازىر بۇقارالىق اقپارات قۇرالدارى دامىعان مەملەكەتتەرگە قاراساق, ينتەللەكتۋالدىق باعدارلامالارعا دەن قويۋدا. بۇل دا بەكەر ەمەس...
وسى تۇرعىدان العاندا, كورەرمەن قاۋىمىنىڭ تانىم اياسىن كەڭەيتىپ, ءبىر ءسات بولسا دا ويلانۋعا, اپىرىم-اي دەگىزىپ, تاڭدانۋعا جەتەلەيتىن تەلەارنالارداعى تانىمدىق باعدارلامالاردى سانامالاساڭىز ون ساۋساققا تولۋى نەعايبىل.
دەگەنمەن, قازىرگى تاڭدا بۇلقىنىستى كەزەڭدەردى باستان وتكەرىپ, كوپشىلىكتىڭ كەرەگىن ەكشەۋگە كوشكەن وتاندىق تەلەارنالاردا ىلگەرى باسقان ىستەر از ەمەس. سول ىلكىمدى باستامالاردىڭ قاتارىنا «بىلگىرلەر وتاۋىن» دا قوسىپ قويالىق.
– بۇعان دەيىن «قازاقستان» تەلەارناسىندا تانىمدىق باعىت ۇستانعان باعدارلامالار بولمادى دەپ ايتۋعا كەلمەس. بىراق, تەلەارنالارداعى باعدارلامالاردىڭ باسىم بولىگى ەسترادا جۇلدىزدارىن عانا قاتىستىرىپ قويادى دا, قاراپايىم ادامدار, باسقا سالانىڭ وكىلدەرى ۇمىت قالىپ جاتادى. قاراپ وتىرساق, ءاربىر سالانىڭ ءوز جۇلدىزدارى بار, كورىنبەي جۇرگەن تالانتتارى جەتكىلىكتى, – دەيدى «بىلگىرلەر وتاۋى» باعدارلاماسىنىڭ اۆتورى ءارى پروديۋسەرى ۇلپان قۇرايىسوۆا.
سونىمەن, اپتاسىنا ءبىر رەت ەكرانعا جول تارتاتىن ءبىر ساعاتتىق تەلەجوبا قازاق تىلىندە جۇرەدى. باعدارلامانى تانىمال ونەر ادامى – شىعارماشىلىق وتباسىندا دۇنيەگە كەلگەن اكتەر ءارى كومپوزيتور نۇرلان ءالىمجان جۇرگىزەدى. جوبا اۆتورلارىنىڭ تاڭداۋى بۇل جىگىتكە تەككە تۇسپەگەنىن بىردەن ايتقان ءجون. بويىندا ۇلتتىق نامىسى بار, انا ءتىلىنىڭ تۇنىعىن قانىپ ىشكەن, ءارى شەشەن, قاي تاقىرىپقا سالساڭ دا كوسەم, كەلبەتى كوركەم اكتەر بارلىق تالاپ ۇدەسىنەن شىعادى.
اتالمىش باعدارلامانىڭ نەگىزىندە رەسەيلىك «نتۆ» ارناسىنىڭ «سۆويا يگرا» ويىنى جاتىر. «بىلگىرلەر وتاۋى» 4 بەلەستەن تۇرادى. ءار سالاعا بايلانىستى قىزىقتى مالىمەتتەر مەن سۇراقتاردان تۇراتىن سىناقتاردان سۇرىنبەي ءبىلىمى مەن جىلدامدىعى ارقاسىندا ءبىر توپ جەڭىسكە جەتىپ شەتەلگە بارىپ-قايتۋ مۇمكىندىگىنە يە بولادى. باعدارلامانىڭ ءار كەزەڭى اتاۋىنا ءتان كەلەتىن سۇراقتاردان تۇرادى.
«بىلگىرلەر وتاۋى» – ءوز ۇلتىنىڭ باقىتتى بولاشاعىن, كەمەل كەلەشەگىن ويلاعان, ءتورت قۇبىلاسى تۇگەل, قۋاتتى مەملەكەت قۇرۋدى ماقسات ەتكەن ەلباسىنىڭ «ينتەللەكتۋالدى ۇلت-2020» ۇلتتىق جوباسىن قولداۋشى باعدارلاما. ماقساتى – جان-جاقتى دامىعان ءبىلىمدى, مادەنيەتتى, وتانشىل, ۇلتجاندىلىقتى قالىپتاستىرۋ. «بىلگىرلەر وتاۋى» – پرەزيدەنتىمىزدىڭ «ينتەللەكتۋالدى ۇلت» جوباسىنىڭ ەكىنشى اسپەكتىسى – عىلىم سالاسىن دامىتۋ مەن ەلىمىزدىڭ عىلىمي الەۋەتىن ارتتىرۋ ءسينوپسيسىن نەگىز ەتىپ وتىر.
ايناش ەسالي,
«ەگەمەن قازاقستان».
الماتى.
