پاكستاننىڭ پرەزيدەنتى اسيف الي زارداري پرەزيدەنتتىك قىزمەتتەن كەتتى. مۇندا ماسەلە, ءزارداريدىڭ العاشقى پرەزيدەنتتىك مەرزىمىنىڭ اياقتالۋىنا بايلانىستى ءوز ەركىمەن وتستاۆكاعا كەتۋى ەل تاريحىندا تۇڭعىش رەت بولىپ وتىرعاندىعىندا جاتىر.
زارداري ءوز ەركىمەن وتستاۆكاعا كەتتى
پاكستاننىڭ پرەزيدەنتى اسيف الي زارداري پرەزيدەنتتىك قىزمەتتەن كەتتى. مۇندا ماسەلە, ءزارداريدىڭ العاشقى پرەزيدەنتتىك مەرزىمىنىڭ اياقتالۋىنا بايلانىستى ءوز ەركىمەن وتستاۆكاعا كەتۋى ەل تاريحىندا تۇڭعىش رەت بولىپ وتىرعاندىعىندا جاتىر.
«اسسوشەيتەد پرەسس» اگەنتتىگىنىڭ حابارلاۋىنشا, اسيف الي زارداري 2008 جىلى پاكستان حالىق پارتياسى بيلىككە كەلگەننەن كەيىن پرەزيدەنتتىككە سايلانعان. ول – وسى پارتيانىڭ بۇرىنعى باسشىسى, ەكى مارتە ەلدىڭ پرەمەر-ءمينيسترى قىزمەتىن اتقارعان بەنازير بحۋتتونىڭ كۇيەۋى. ال ءزارداريدىڭ مۇراگەرى مامنۋن حۋسەين بولدى. جاڭا پرەزيدەنتتى ۇلىقتاۋ كەشە, 9 قىركۇيەكتە ءوتتى. حۋسەين «مۇسىلمان ليگاسى» پارتياسىنىڭ وكىلى, سونداي-اق ول ءىرى كاسىپكەر رەتىندە تانىمال. ءاسىلى, بۇل ەلدە پرەزيدەنت بەس جىلدان ەكى مەرزىمگە عانا سايلانا الادى.
كەمەنى دە, ەسىرتكىنى دە ورتەپ جىبەردى
جەرورتا تەڭىزىندە ەگيپەتتىڭ جانە سيريانىڭ تەڭىزشىلەرى وزدەرى مىنگەن كەمەنى, سونداي-اق جاسىرىن الىپ بارا جاتقان 30 توننا گاشيشتى ورتەپ جىبەرگەن. بۇل جونىندە «فرانس-پرەسس» اگەنتتىگى حابارلادى.
وقيعا يتاليالىق پوليتسەيلەر ەسىرتكى تاسىمالداۋشىلاردىڭ ىزىنە ءتۇسىپ, ولاردى تۇتقىنداۋعا ارەكەت جاساعان كەزدە بولعان. پوليتسەيلەردەن قاشىپ قۇتىلماسىن بىلگەن تەڭىزشىلەر 85 مەترلىك جۇك كەمەسىن ورتەپ, وزدەرى سۋعا سەكىرگەن كورىنەدى. قۇقىق قورعاۋ ورگاندارىنىڭ قىزمەتكەرلەرى ولاردى قۇتقارىپ العان جانە تۇتقىنداعان. ارنايى وپەراتسياعا يتاليالىق پوليتسەيلەرمەن بىرگە, مالتانىڭ قۇقىق قورعاۋ ورگاندارىنىڭ قىزمەتكەرلەرى دە قاتىسقان.
سايلاۋدا سەرگەي سوبيانين جەڭىسكە جەتتى
ماسكەۋ قالاسىنىڭ سايلاۋ كوميسسياسى ماسكەۋ مەرى سايلاۋىندا بەرىلگەن داۋىستاردىڭ بارلىعىن ساناپ, ونىڭ ناتيجەسىن جاريا ەتتى. سايلاۋ كوميسسياسىنىڭ مالىمەتتەرى بويىنشا, سايلاۋدىڭ ءبىرىنشى تۋرىندا 51,37 پايىز داۋىس جيناعان ماسكەۋ مەرىنىڭ مىندەتىن اتقارۋشى سەرگەي سوبيانين جەڭىسكە جەتكەن.
ەكىنشى ورىندى وپپوزيتسيالىق ساياساتكەر الەكسەي ناۆالنىي الىپتى. وعان سايلاۋشىلاردىڭ 27,24 پايىزى داۋىس بەرگەن ەكەن. ال كوممۋنيستەردەن ۇسىنىلعان كانديدات يۆان مەلنيكوۆ 10,69 پايىز, «يابلوكو» پارتياسىنىڭ وكىلى سەرگەي ميتروحين 3,51 پايىز, لدپر-لىق ميحايل دەگتيارەۆ 2,86 پايىز داۋىسقا يە بولعان. سايلاۋشىلاردىڭ سايلاۋ ۋچاسكەلەرىنە كەلىپ, داۋىس بەرۋى 32,07 پايىزدى قۇراعان.
قىسقا قايىرىپ ايتقاندا:
● سۋحۋميدە رەسەيدىڭ ابحازياداعى ەلشىلىگى كونسۋلدىق ءبولىمىنىڭ ءبىرىنشى حاتشىسى دميتري ۆيشەرنەۆتى اتىپ كەتتى. وقيعا كەشە ماسكەۋ ۋاقىتى بويىنشا ساعات 08.30-دا بولعان.
● سيريا پرەزيدەنتى باشار اساد رەسەي پرەزيدەنتى ۆلاديمير پۋتينگە سانكت-پەتەربۋرگتەگى سامميتكە دەيىن جانە سامميتتەن كەيىن سيريا جونىندەگى كوزقاراسى ءۇشىن العىس ايتتى.
● كاباردين-بالكار ۇكىمەتىنىڭ باسشىسى رۋسلان حاسانوۆ وتستاۆكاعا جىبەرىلدى. ۇكىمەت باسشىسىنىڭ مىندەتىن اتقارۋ ءبىرىنشى ورىنباسار يرينا مارياشقا جۇكتەلدى.
● ۇلىبريتانيانىڭ پ رەمەر-ءمينيسترى دەۆيد كەمەرون قۇجاتتار سالىنعان كەيسىن پويىز ۇستەلىندە ۇمىتىپ كەتىپتى. ول يورككە ۇيلەنۋ تويىنا بارا جاتسا كەرەك.
جازعى وليمپيادا توكيودا وتەدى
حالىقارالىق وليمپيادا كوميتەتى (حوك) 2020 جىلعى جازعى وليمپيا ويىندارى وتەتىن قالا رەتىندە جاپونيانىڭ استاناسى – توكيونى تاڭدادى. سەنبى كۇنى بۋەنوس-ايرەستە وتكەن حوك جيىنىندا توكيو قالاسى – 60, ىستامبۇل – 36 داۋىسقا يە بولدى.
2020 جىلعى جازعى وليمپيادانى وتكىزۋگە توكيو جانە ىستامبۇلمەن قاتار, مادريد قالاسى دا ءوتىنىش بەرگەن بولاتىن. داۋىس بەرۋدىڭ العاشقى اينالىمىندا يسپانيا استاناسى بۇل باسەكەدەن شىعىپ قالعان ەدى. وسىلايشا, توكيو قالاسى 2011 جىلى جەر سىلكىنىسى سالدارىنا بايلانىستى اپاتتى جاعدايعا ۇشىراعان «فۋكۋسيما» اتوم ەلەكتر ستانساسىنداعى رادياتسيا قاۋپىنە قاراماستان تاڭدالدى. ايتا كەتەيىك, توكيودا وليمپيادا وسىمەن ەكىنشى رەت وتكەلى وتىر.
دەلەگاتسيا ساپارىن كەيىنگە قالدىردى
توعىزىنشى قىركۇيەككە جوسپارلانعان اقش دەلەگاتسياسىنىڭ ازەربايجانعا جوسپارلانعان ساپارى كەيىنگە قالدىرىلدى. بۇعان اقش-تىڭ باكۋدەگى ەلشىلىگى: «ازەربايجان ۇكىمەتى ساپاردى پرەزيدەنتتىك سايلاۋ اياقتالعانعا دەيىن كەيىنگە قالدىرۋدى ءجون كورىپ وتىر. وكىنىشكە قاراي, ەندى ءبىز بۇل ەلدىڭ سايلاۋالدى ۇدەرىستەرىمەن تانىسا المايتىن بولدىق», – دەپ وكىنىش ءبىلدىرىپتى.
اقپاراتتارعا قاراعاندا, ازەربايجانعا اقش مەملەكەتتىك حاتشىسىنىڭ دەموكراتيا جانە ادام قۇقىقتارى جونىندەگى كومەكشىسى توماس مەلي باستاعان دەلەگاتسيا ساپارمەن كەلۋى ءتيىس ەكەن. امەريكالىق دەلەگاتسيا الدىمەن تبيليسيدە وپپوزيتسيا جانە ازاماتتىق قوعام وكىلدەرىمەن كەزدەسىپ, سودان كەيىن باكۋدە وسىنداي كەزدەسۋ وتكىزۋدى جوسپارلاعان كورىنەدى. ازەربايجاندا پرەزيدەنتتىك سايلاۋ وسى جىلدىڭ 9 قازانىندا وتپەك.
كونفەسسياارالىق قاقتىعىستىڭ سالدارى
ءۇندىستان بيلىگى ۋتتار پرادەش شتاتىنىڭ مۋزاففارناگار وكرۋگى اۋماعىنا اسكەر كىرگىزدى. بۇعان كونفەسسياارالىق قاقتىعىس سالدارىنان 28 ادامنىڭ اجال قۇشۋى سەبەپ بولىپ وتىر.
وكرۋگ اۋماعىنا 800-گە جۋىق اسكەر كىرگىزىلگەن. تارتىپسىزدىككە ايداپ سالعان دەگەن كۇدىكپەن 100-دەن استام ادام تۇتقىنعا الىنعان. قاقتىعىس 7 قىركۇيەكتە ۇندىستەر مەن مۇسىلماندار اراسىندا باستالعان كورىنەدى. ءدال سول كۇنى جەرگىلىكتى ءۇندىس فەرمەرلەر جينالىپ, 27 تامىزدا ولتىرىلگەن ءۇش ەر ادامنىڭ ءولىمىنىڭ سەبەپتەرىن تالقىلاپتى. بۇل ۇشەۋى مۇسىلماندار بالاعاتتاعان قىزعا ارا تۇسكەن ەكەن. فەرمەرلەر تارقاي سالىسىمەن, ولارعا مۇسىلماندار لاپ قويسا كەرەك.
ينتەرنەت ماتەريالدارى نەگىزىندە ازىرلەندى.
