الەمگە تارالعان COVID-19 جۇقپالى ىندەتىنىڭ ناۋبەتكە شالدىقتىرۋ قاۋپى تۋىنداۋدا. بۇل ءبىر ادام باسىنداعى قايعى ەمەس, بار ادامزاتقا تونگەن اۋرۋ. سوندىقتان پاندەمياعا قارسى دۇنيەجۇزىلىك بىرلەسكەن مايدان اشىلدى. مەملەكەتارالىق ساقتانۋ مەن ساۋىقتىرۋ شارالارىن بىرگە اتقارۋعا ۇمتىلىس ءورىس الدى. ۋاقىتشا بىرلەسكەن مەملەكەتارالىق مەديتسينالىق-سانيتارلىق ەپيدەميالىق عىلىمي-زەرتتەۋ ورتالىقتارى كوروناۆيرۋس اتتى الاپاتقا قارسى قولدانىلاتىن نەمەسە زيانسىزداندىراتىن, ياكي تولىعىنان ەمدەپ شىعاراتىن جولداردى, ءادىس-تاسىلدەردى جانە قۇرالداردى تابۋ جۇمىسىن قاۋىرت قولعا الۋدا. الەمدىك دەنساۋلىق ساقتاۋ, حالىق دەنساۋلىعىنىڭ ساۋلىعىن قامتاماسىز ەتۋ, كوروناۆيرۋستى مۇمكىندىگىنشە زارارسىزداندىرۋ شارالارى اياسىندا قازاقستان دا ءوزىنىڭ مەملەكەتتىك الەۋەتىن بارىنشا جۇمىلدىرۋدا.
«حالقىمىزدىڭ دەنساۋلىعى مەن اماندىعىنا تونگەن قاۋىپتىڭ سالماعىن دەر كەزىندە اڭعارىپ, الدىن الۋ شارالارىن العاش قولدانعان مەملەكەتتەر قاتارىنان كورىنە الدىق», دەپ ەلباسى ن.ءا.نازارباەۆ ءادىل كورسەتكەندەي, مەملەكەت باسشىسى ق.ك.توقاەۆ قازاقستاندىقتارعا ارنايى ۇندەۋ تاستاپ, ءتيىستى تاكتيكالىق جانە ستراتەگيالىق, كۇندەلىكتى ۇيىمداستىرۋ مەن ادىستەمەلىك شارالاردى بەلگىلەپ, باعىتتاۋ ارقىلى «بۇدان ون ەسەلەپ بولۋى ىقتيمال قاۋپىن مۇمكىندەگىنشە مينيمالداندىرا الدىق» (ق.توقاەۆ).
حالىقتىڭ باسىنا ءتونىپ تۇرعان مىنا جۇقپالى زۇلماتتا ەل مەن مەملەكەت بىرلىگى, تۇتاستىعى – تاريحي سىن. ەلوردامىز نۇر-سۇلتاندا, الماتىدا جانە باسقا قالالار مەن وبلىستاردا جاريالانعان توتەنشە جاعداي رەجىمىن, كارانتين ءتارتىبىن حالقىمىز ۇستانىپ, مەملەكەت ءۇشىن دە, ءوز باسى ءۇشىن دە بۇگىنگى ءپاتريوتيزمىن كورسەتۋدە. حالىقتى كۇندەلىكتى اقپاراتتاندىرۋ, ءوزىن ءوزى وقشاۋلاپ زارارسىزداندىرۋ, مەملەكەت تالاپ ەتكەن ۇستانىمداردى ساقتاۋ ءومىر سالتىمىزعا اينالۋدا. سونداي-اق مەملەكەتىمىز ءوز مىندەتىن جاۋاپكەرشىلىكپەن اتقارۋدا. ءوندىرىستىڭ, بيزنەس پەن كاسىپكەرلىكتىڭ, اۋىل شارۋاشىلىعىنىڭ بەيبىت كۇندەردەگى ىرعاعى جۇيەسىنىڭ بۇزىلماۋىنا, جۇمىسپەن قامتىلۋى ۋاقىتشا توقتاتىلعان ازاماتتارعا, مۇقتاج وتباسىلارىنا, ءارتۇرلى ارداگەرلەرگە جانە ۆيرۋس قاتەرىمەن تىكەلەي الدىڭعى شەپتە كۇرەسىپ جۇرگەن ازاماتتارعا ءوسىمسىز كرەديتتەر, مەملەكەتتىك قولداۋلار, جاردەماقىلار, مينيمۋمدىق كومەك, تاعى باسقا قولداۋ مەن جەڭىلدىكتەر جاسالۋدا. الاساپىراندى پايدالانۋ نيەتىمەن اداستىرىپ, بەرەكەسىزدىك پەن ۇرەي تۋعىزۋعا, ازىق-ت ۇلىكتىڭ, جانارمايدىڭ, مەديتسينالىق ساقتىق-ەمدىك قۇرالدارىنىڭ باعاسىن نەگىزسىز كوتەرۋگە قارسى شەكتەر قويىلۋدا. مەملەكەتتىك شارالار ۇسىنىس سيپاتىندا ەمەس, زاڭدى كۇشتە جۇمىس ىستەۋدە. سونىمەن بىرگە ەپيدەميامەن كۇرەستە سالالىق زەرتحانالار مەن عالىمدارىمىزدىڭ كەسەلگە قارسى ۆاكتسينالار ءتۇرىن تابۋداعى ىزدەنىستەرى, كوروناۆيرۋستىڭ بەلگىلى بىرتەكتەرىنە ناقتى ادامنىڭ شالدىعۋىنىڭ بار-جوعىن انىقتايتىن تەستىلەر مەن قۇرىلعىلار جوبالارىن ازىرلەۋى جۇزەگە اسۋدا. رەسپۋبليكانىڭ مەديتسينالىق كادرلارى جان اياماي, وزدەرىنە تونەتىن قاۋىپ-قاتەرگە قاراماستان, الدىڭعى شەپتە اپاتتى اجالمەن بەتپە-بەت ايقاسۋدا, وزدەرىنىڭ كاسىپتىك انتىنا ادالدىعىمەن بىرگە, ازاماتتىق پارىزدارىن جانكەشتىلىكپەن وتەۋدە. حالىق ريزالىعى ولارعا دا, ولارعا ماتەريالدىق وتەم بەلگىلەگەن بيلىككە دە شەكسىز. مىنە, وسىنداي مەملەكەت پەن جالپىحالىقتىق بىرلەستىك ەلىمىزدە كوروناۆيرۋس ىندەتىن ۇزاتپاي قۇرىقتايتىنىنا سەنىم مول.
ال ەندى مەملەكەتتىڭ ۋاقىتشا ەنگىزىلگەن تەمىردەي ءتارتىبىنىڭ قۋات-كۇشى ءاربىر ازاماتتىڭ قولداۋىنا, جاۋاپكەرشىلىكپەن قاتىسۋىنا تىكەلەي بايلانىستى. سوندىقتان مەملەكەتتىڭ, مەديتسينا قىزمەتكەرلەرىنىڭ, قارۋلى كۇشتەردىڭ, جۋرناليستەردىڭ, ەرىكتىلەردىڭ, تاعى باسقا قاۋىمداردىڭ ەڭبەگى زايا كەتپەس ءۇشىن, ەلدىڭ امان-ساۋلىعى ءۇشىن وتانداستارىمدى كوروناۆيرۋسپەن بىرلەسكەن كۇرەسىمىزدى كۇشەيتە تۇسۋگە شاقىرامىن. ء«بىز بىرگەمىز!».
ماقسات قاليمولداەۆ,
«اقپاراتتىق جانە ەسەپتەۋىش تەحنولوگيالار» ينستيتۋتىنىڭ باس ديرەكتورى, ۇعا اكادەميگى
