ەلباسى ن.نازارباەۆ سوناۋ تاۋەلسىزدىك العان كەزدەن جاس مەملەكەتتىڭ تىزگىنىن ۇستاپ, الەمدىك دەرجاۆالاردى قارىمدى ويلارىمەن اۋزىنا قاراتقان تۇلعا. ونىڭ ساياسي قاۋقارىنىڭ قاينار كوزى – حالىق ۇنىنە قۇلاق اسۋىندا. تۇڭعىش پرەزيدەنت ۇنەمى حالىقتىڭ ىشكى دۇنيەسىن تەرەڭىنەن ءتۇسىنىپ, ونىڭ مۇڭ-مۇقتاجىن شەشۋمەن, دۇرىس باعدار بەرۋمەن اينالىستى. ءار كەزدە ءوز ويىن ناقتى, حالىققا ۇعىنىقتى ەتىپ جەتكىزىپ كەلەدى.
وسى جولى دا, ەلىمىز اۋىر ىندەتپەن كۇرەسكە كىرىسكەن كەزدە قازاقستاندىقتارعا جاقسىلىق پەن امان-ساۋلىق تىلەپ, بارلىعىمىزدى ءتوزىمدى ءارى سابىرلى بولۋعا شاقىردى. ءبىز مۇنى ونىڭ: «تاۋەلسىزدىك جىلدارى ەل ءومىرىنىڭ ەڭ قيىن دا كۇردەلى كەزەڭدەرىندە مەن كەز كەلگەن ماسەلەنى قادىرمەندى وتانداستارىممەن بىرگە بۇكپەسىز, اشىق تالقىعا سالىپ, تۋعان حالقىممەن ۇنەمى وي ءبولىسىپ كەلەمىن», دەگەن سوزدەرىنەن بايقايمىز. سونداي-اق ەلىمىزدە وسىعان دەيىن ءبىرتالاي ماڭىزدى جۇمىس اتقارىلدى. ۇلكەن كەن ورىندارى مەن جاڭا زاۋىتتار اشىلدى.
ەل ەكونوميكاسى قارىشتاپ دامىدى. دەسە دە, وسى جولعى داعدارىس وسىعان دەيىنگى باستان كەشكەن قيىنشىلىقتان كۇردەلىلەۋ بولاتىنىن اڭعارتىپ تۇر. ويتكەنى تەك ءبىزدىڭ ەلدە عانا ەمەس, الەم بويىنشا كوپتەگەن ءوڭدىرىس ورنى جابىلىپ, ادامدار جۇمىسسىز قالدى.
ەلىمىزدە وسىنداي قيىنشىلىقتاردى ەڭسەرۋ ءۇشىن ەلباسى الدىمەن ەلىمىزدىڭ وزىندىك قاسيەتىنە اينالعان تاتۋلىق پەن بىرلىك, ىشكى تۇراقتىلىق قاجەت ەكەنىن قاداپ ايتتى. پرەزيدەنت قاسىم-جومارت توقاەۆتىڭ باستامالارىنا تولىقتاي قولداۋ كورسەتۋگە شاقىردى. ول ءۇشىن ەلىمىزدە بارلىق مۇمكىندىكتەردىڭ بار ەكەنىن جەتكىزدى. تاۋەلسىزدىكتىڭ العاشقى ساتتەرىنەن باستاپ, ۇلى ابايدىڭ «كىمگە دوستىعىڭ بولسا, دوستىق شاقىرادى» دەگەن دانا قاعيداسىن باسشىلىققا الاتىنىن دا ايتىپ ءوتتى.
ءوز باسىم پارلامەنت ءماجىلىسىنىڭ دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى جانە اسكەري ازامات رەتىندە ەلباسى ن.نازارباەۆتىڭ قارۋلى كۇشتەر مەن قۇقىق قورعاۋ ورگاندارىن قالىپتاستىرۋ مەن دامۋىنداعى ەرەكشە ورنىن اتاپ وتكىم كەلەدى. نۇرسۇلتان ءابىش ۇلىنىڭ ساليقالى ساياساتىنىڭ جانە ەرەن ەڭبەگىنىڭ ارقاسىندا ەل ەكونوميكاسى كوتەرىلىپ, قارۋلى كۇشتەر مەن ارنايى ورگانداردىڭ الەۋەتى ارتقانى ءسوزسىز. ەلباسىنىڭ اسكەري سالاداعى رەفورمالارىنا باسى-قاسىندا ءجۇرىپ كۋا بولدىق.
اسكەرىمىز جاساقتالدى, شەكارامىز بەكىتىلدى, بارلىق ەلدەرمەن تاتۋ-ءتاتتى قارىم-قاتىناس ورناتتىق. ەلىمىزدى قاۋىپتى ىندەت جايلاعان كەزدە بارشا كۇش قۇرىلىمدارى ەل ءۇشىن العى شەپتە ابىرويلى قىزمەت ەتىپ ءجۇر.
وزدەرىڭىز بايقاعانداي, اق حالاتتى دارىگەرلەرمەن قاتار ىندەتپەن كۇرەستىڭ الدىڭعى شەبىندە كۇشتىك قۇرىلىمداردىڭ بارلىعى جۇمىلدىرىلعان. ءبىرى بلوك-بەكەتتەردە قىزمەت اتقارسا, ءبىرى كارانتيندىك رەجىمدى قاداعالاۋدا. ونسىز ىندەتتى جەڭۋ مۇمكىن بولمايدى. ەلباسى ءوز ماقالاسىندا «بۇگىنگى كۇرەس داڭقتى قولباسشى باۋىرجان مومىش ۇلىنىڭ: ء«تارتىپسىز – ەل بولمايدى, تارتىپكە باس يگەن ەل قۇل بولمايدى» دەگەن قاناتتى ءسوزىن ەسكە سالادى جانە سونى بەكەم ۇستانۋدى تالاپ ەتەدى», دەپ ناقتىلاپ ءوتتى. وسى ىندەتپەن كۇرەستە جۇرگەن اسكەري قۇرىلىمداردىڭ كارانتيندىك رەجىمدى ساقتاۋعا, ەل دەنساۋلىعىن نىعايتۋعا قوسار ۇلەسى مول. وسىنداي قيىن-قىستاۋ كەزدە حالقىمىزدى تارتىپكە باعىنۋعا, بارىنشا دارىگەرلەر مەن قۇقىق قورعاۋ قىزمەتكەرلەرىنە قولداۋ كورسەتۋگە جانە ەلباسى مەن مەملەكەت باسشىسىنىڭ ۇندەۋلەرىنە قۇلاق اسۋعا شاقىرامىن. بىرلىك سالتانات قۇرعاندا, ەرلىككە جول بار. بىرلىك بار بولعاندا بەرەكە, ىنتىماق, جەڭىس شاڭىراعىمىزعا كەلىپ ورنىعادى.
اسىل قازىنامىز, باعا جەتپەس بايلىعىمىز – تاۋەلسىزدىك پەن ەلدىگىمىز ماڭگىلىك, ىنتىماعىمىز بەرىك بولعاي! ءبىز بىرگەمىز!
اباي تاسبولاتوۆ,
ءماجىلىس دەپۋتاتى, گەنەرال-لەيتەنانت
