ال جەتىسۋ وڭىرىنەن باسقا وبلىستارعا بەلگىلى سەبەپتەرمەن بارعان وبلىس تۇرعىندارى تۇرعىلىقتى مەكەندەرىنە 15 ءساۋىر كۇنگى ساعات 00.00-گە دەيىن كەرى ورالۋى ءتيىس. سونداي-اق كارانتين ەنگىزىلۋىنە بايلانىستى اۋدان, قالالارعا كىرۋ-شىعۋعا شەكتەۋ قويىلىپ, ەلدى مەكەندەردىڭ ىشىندەگى قوزعالىسقا دا تىيىم سالىنادى.
ەرەجەگە سايكەس, تۇرعىندارعا مەديتسينالىق ۇيىمدارعا, جاقىن جەردەگى دۇكەندەر مەن دارىحاناعا كۇنىنە ءبىر رەت قانا شىعۋعا مۇرسات بەرىلەدى. ال تۇرعىندارعا قاجەتتى قىزمەت كورسەتەتىن كوممۋنالدىق مەكەمەلەر مەن باسقا ۇيىم جۇمىسشىلارىنىڭ قوزعالىسىنا جۇمىس ورنىنان انىقتاما بولعان جاعدايدا عانا رۇقسات ەتىلەدى. بۇعان دەيىن وبلىس اۋماعىنداعى ەكى اۋداندا جەكەلەگەن نىساندار وقشاۋلانىپ, كارانتين ەنگىزىلگەن ەدى. ولاردىڭ قاتارىندا قاراساي اۋدانىنداعى «اسىل ارمان» تۇرعىن ءۇي كەشەنى مەن ەڭبەكشىقازاق اۋدانىنداعى 4 ساياجاي ءماسسيۆى بار.
سونداي-اق بىرىككەن اراب امىرلىكتەرىنەن ورالعان 135 قازاقستاندىق تالدىقورعان اۋەجايى ارقىلى ەلگە كىرىپ, سانيتارلىق تالاپقا ساي وقشاۋلانعان بولاتىن. ءتيىستى ۋاقىت ارالىعىندا دارىگەرلىك باقىلاۋدا بولىپ, قاجەتتى قان سىناماسىن تاپسىرعان جولاۋشىلاردان جۇقپالى ىندەت بەلگىسى انىقتالعان جوق. قازىر تالدىقورعان مەن تەكەلى قالاسىندا وقشاۋلانعان 135 وتانداسىمىز تۇرعىلىقتى وڭىرلەرىنە جىبەرىلدى.
كوروناۆيرۋس ينفەكتسياسىنا شالدىققان ناۋقاستاردى وڭالتۋعا جۇمىلىپ جاتقان دارىگەرلەر مەن بارلىق ساناتتاعى مەديتسينا قىزمەتكەرلەرىنە قاۋىپتىلىك دەڭگەيىنە سايكەس ۇستەمەاقى بەلگىلەندى. اتاپ ايتقاندا, رەسپۋبليكالىق بيۋدجەتتەن بولىنگەن قاراجاتتان ايماقتاعى دەنساۋلىق ساقتاۋ ۇيىمدارىنىڭ 1448 قىزمەتكەرىنە, ونىڭ ىشىندە 205 دارىگەرگە, 882 ورتا مەديتسينالىق قىزمەتكەرگە, 361 كىشى مەديتسينالىق قىزمەتكەرگە قوسىمشا ەڭبەكاقى تولەندى.
جەتىسۋدا جۇقپالى ىندەتتىڭ الدىن الۋ مەن كۇرەسۋ جۇمىسى كۇن تارتىبىندە تۇر. اتاپ ايتقاندا, ايماقتاعى مەديتسينا قىزمەتكەرلەرىنە ۇستەمەاقى تولەۋ جۇرگىزىلۋدە. وسى ماقساتتا جەرگىلىكتى بيۋدجەتتەن 1 023 مەديتسينا قىزمەتكەرلەرىنە, ونىڭ ىشىندە 178 دارىگەرگە, 528 ورتا مەديتسينالىق قىزمەتكەرگە, 317 كىشى مەديتسينالىق قىزمەتكەرگە سىياقى بەرۋ ءۇشىن قوسىمشا قارجى ءبولىندى.
الماتى وبلىسى
