توقسانىنشى جىلدارى سەيىلحانوۆتىڭ ەسىمى تەك قازاقستانعا ەمەس, كۇللى الەمگە ءماشھۇر بولدى دەسەك, ارتىق ايتپاعانىمىز. ول كۇرەستىڭ ءۇش تۇرىنەن ەلەۋلى تابىستارعا قول جەتكىزىپ, قالىڭ كورەرمەننىڭ كوزايىمىنا اينالدى. باستاپقىدا رۋسلان سامبوشىلاردىڭ سايىسىندا الدىنا جان سالمادى. العاش رەت 1992 جىلى تارازدا وتكەن ەل چەمپيوناتىندا قارسىلاستارىن قوعاداي جاپىرىپ, جەڭىس تۇعىرىنىڭ ەڭ بيىك ساتىسىنا كوتەرىلدى. شىنى كەرەك, بۇعان دەيىن جاستار اراسىنداعى دودالاردا اششى تەرى سىعىلماعان سپورتشىدان ەشكىم دە ءدال وسىنداي ناتيجە كۇتكەن جوق ەدى.
تارازداعى تابىسىنىڭ كەزدەيسوق ەمەستىگىن دالەلدەۋ ءۇشىن وجەت جىگىت جاتتىعۋ زالىندا كوپ تەر توگىپ, ءار جارىستا ءوز مىقتىلىعىن پاش ەتۋگە تىرىستى. ناتيجەسى جامان بولعان جوق. 1992-1996 جىلدار ارالىعىندا ەلشىلىك جارىستاردا قارسىلاسقا شاق كەلتىرمەي, حالىقارالىق ارەنادا دا مول ولجاعا كەنەلدى. اتاپ ايتساق, 1992 جىلى ۆلاديۆوستوكتا وتكەن ازيا چەمپيوناتىندا كۇمىس مەدالدى موينىنا ىلسە, الماتىدا جالاۋى جەلبىرەگەن الەم كۋبوگى جولىنداعى جارىستا باس جۇلدەنى ولجالادى. 1993 جىلى ومبىدا الەمنىڭ ۆيتسە-چەمپيونى اتانسا, 1994 جىلى نوۆي سادتا قولا جۇلدەنى يەلەنەدى. سول جىلى ازيانىڭ تەڭدەسسىزى دەپ تانىلىپ, ستۋدەنتتەر اراسىنداعى الەم بىرىنشىلىگىندە ءۇشىنشى ورىنعا تابان تىرەدى. باسقا دا حالىقارالىق تۋرنيرلەردە توپ جارعان سەيىلحانوۆ ەل سپورتىنىڭ مەرەيى وسۋىنە ەلەۋلى ەڭبەك ءسىڭىردى.
سامبو – وليمپيادا باعدارلاماسىنا ەنبەگەن سپورت ءتۇرى. سول سەبەپتى دە سامبوشىلاردىڭ دەنى ناعىز تولىسقان, كەمەلدەنگەن شاعىندا دزيۋدوعا اۋىسىپ جاتادى. توقسانىنشى جىلداردىڭ بەل ورتاسىندا جاپون كۇرەسىنە دەن قويعان قازاق جاستارىنىڭ قاتارى قالىڭ ەدى. ءبارىنىڭ دە ارمانى – 1996 جىلى اتلانتادا الاۋى تۇتاناتىن وليمپيا ويىندارىندا باق سىناۋ. سولاردىڭ ساناتىندا رۋسلان سەيىلحانوۆ تا بولدى.
1995 جىلى دزيۋدودان قازاقستان چەمپيوناتى پاۆلوداردا ءوتتى. اتلانتاعا بارۋدى ارمانداعان بەلدى بالۋانداردىڭ بارلىعى دا ەرتىس وزەنىنىڭ جاعالاۋىندا باق سىنادى. اقتىق سىنعا القىنباي جەتكەن رۋسلان فينالدا مارات ايداشەۆپەن ايقاستى. بۇل تارتىس جەرگىلىكتى سپورتشىنىڭ پايداسىنا شەشىلىپ, كەيىپكەرىمىز كۇمىس مەدالدى قاناعات تۇتتى. الايدا وليمپيا ويىندارىنىڭ باستالۋىنا ءالى ءبىر جىلعا جۋىق بار ەدى. دۇرىستاپ دايىندالسا, اتلانتانىڭ دا اۋىلى الىس ەمەس ەكەنىن ول انىق سەزىندى.
ارادا بىرەر اي وتكەننەن كەيىن ەسىمدەرى جوعارىدا اتالعان قوس مىقتىنىڭ جولى الماتىدا وتكەن سانجار جاندوسوۆتى ەسكە تۇسىرۋگە ارنالعان حالىقارالىق تۋرنيردە قايتا قيىستى. بۇل جولى رۋسلان كۇمانسىز جەڭىسكە جەتتى. سول مەزەتتە ۇلتتىق قۇراما باپكەرلەرى «اتلانتا وليمپياداسىندا
78 كيلو سالماق دارەجەسىندە ەل نامىسىن سەيىلحانوۆ قورعايدى» دەگەن كەسىمدى سوزدەرىن ايتتى. بىراق الىستاعى امەريكادا تەك رۋسلاننىڭ عانا ەمەس, بارلىق قازاقستاندىق دزيۋدوشىلاردىڭ باعى جانبادى.
دزيۋدو كۇرەسىنەن 81 كيلو سالماق دارەجەسىندە كۇش سىناسقان رۋسلان سەيىلحانوۆ ەلشىلىك جارىستاردا ەشكىمگە ەسە جىبەرمەدى. جەتى جىل بويى ول چەمپيوندىق تۇعىردى ءبىر بوساتقان جوق. قارسى كەلگەندەرىن الىپ تا, شالىپ تا جىقتى. سونىمەن قاتار حالىقارالىق ارەنادا دا تولاعاي تابىستارعا قول جەتكىزدى. اتاپ ايتساق, 1996 جىلى حوشيميندە جانە 1997 جىلى مانيلادا وتكەن قۇرلىق چەمپيوناتتارىندا قولا مەدالدى يەلەنسە, 2000 جىلى وساكادادا يراننىڭ اتاقتى بالۋانى كازەم ساريزانيگە عانا جولى بەرىپ, كۇمىسپەن كۇپتەلدى. 1998 جىلى بانگكوكتا الاۋى تۇتانعان ازيا ويىندارىنىڭ قولا جۇلدەگەرى اتاندى.
ر.سەيىلحانوۆتىڭ قازاق كۇرەسىنەن وتكەن جارىستاردا دا جاسىنداي جارقىراعان كەزىن كوزىقاراقتى كورەرمەندەر ۇمىتا قويعان جوق. ونىڭ تالاي ءدۇبىرلى دودالاردا دارا شىعىپ, التى بىردەي «تەمىر تۇلپاردى» تىزگىندەگەنى دە كۇنى بۇگىنگىدەي كوز الدىمىزدا. بارلىعى ول 15-تەن اسا جارىستا «تۇيە بالۋان» اتانعان ەكەن. ارينە بۇل تەك ايتۋعا عانا وڭاي. ايتپەسە وزىنەن الدەقايدا ەڭگەزەردەي اپايتوستەرمەن الىسۋ كوپ كۇش پەن جىگەر, قاجىر مەن قايرات, نامىس پەن تاباندىلىقتى قاجەت ەتەدى. سول قاسيەتتەردىڭ بارلىعى دا كەيىپكەرىمىزدىڭ بويىندا بار. ولاي دەۋگە نەگىز, سالماعى 85 كيلودان اسپايتىن سەيىلحانوۆتىڭ ءتول ونەرىمىز بويىنشا وتكەن ءجۇبىرلى دودالاردا تالاي الىپتىڭ اياعىن اسپاننان كەلتىرگەنىن كوزىمىز كوردى. رۋسلاننان جىعىلعاندار اراسىندا سالماعى 120 كيلودان اساتىن, تىپتەن 130-140 كيلوعا جۋىقتاعان ۆياچەسلاۆ بەردۋتا, قۋات بايقوجاەۆ, ەربولات يۋسۋپوۆ, عالىم احمەتوۆ, ەلدوس ىقسانعاليەۆ سىندى اپايتوستەردىڭ دە بولعانىنا ءدۇيىم جۇرت كۋا. راسىندا دا, سەيىلحانوۆتىڭ كۇرەسۋ مانەرى وزگەشە ەدى. ول ەشكىمنەن قايمىقپايتىن. الدىندا قانداي دۇلەي كۇش يەسى تۇرسا دا, مىسىن بىردەن باسىپ تاستاۋعا تىرىساتىن.
ءالى ەسىمىزدە, 1994 جىلى جامبىل وبلىسىندا قازاق كۇرەسىنەن ءىرى حالىقارالىق تۋرنير ۇيىمداستىرىلىپ, جارتىلاي فينالىندا رۋسلان سەيىلحانوۆتىڭ جولى وزبەكستاننىڭ اتاقتى بالۋانى ارمەن باعداساروۆپەن قيىستى. قارسىلاسى الدەقايدا ەڭسەلى ءارى سالماعى ءبىرشاما اۋىر بولعانىنا قاراماستان قانداسىمىز وعان سان سوقتىرىپ كەتتى. سول ساتتە جەكپە-جەك دەسە, قانى قىز-قىز قاينايتىن قازاق جانكۇيەرلەرى باس جۇلدەنىڭ وزگە ەلگە ەمەس, وزىمىزدە قالعانىنا قاتتى قۋانىپ, رۋسلانعا اق العىستارىن جاۋدىردى. فينالدا كەندىباي ابىشەۆتەن ايلاسىن اسىرعان سەيىلحانوۆ ايتۋلى جارىستىڭ باس جۇلدەسىن قانجىعاسىنا بايلادى.
ال قازاقتىڭ قايسار ۇلىنىڭ مىقتىلىعىن مويىنداعان وزبەكستاننىڭ ورەنى كوپ ۇزاماي اتلانتا وليمپياداسى مەن ازيا ويىندارىنىڭ كۇمىس جۇلدەگەرى اتاندى. ازيا چەمپيوناتتارىندا ەكى رەت باس جۇلدەنى ولجالاپ, ەكى رەت قولا مەدالدى موينىنا ءىلدى. بۇل كۇندەرى ارمەن باعداساروۆ حالىقارالىق دزيۋدو فەدەراتسياسىندا لاۋازىمدى قىزمەت اتقارۋدا.
2002 جىلى ۇلكەن سپورتتان قول ۇزگەننەن كەيىن ر.سەيىلحانوۆ كەدەن سالاسىندا قىزمەت اتقاردى. بۇل سالادا دا ءوزىنىڭ بىلىكتىلىگى, بىلگىرلىگىمەن كوزگە ءتۇستى. كەزىندە شىعىس قازاقستان وبلىسى اۋماعىندا ورنالاسقان «مايقاپشاعاي» كەدەن بەكەتىن باسقاردى. پودپولكوۆنيك شەنىن الدى.
ءبىر عاجابى, قاي سالادا قىزمەت اتقارسا دا, كەيىپكەرىمىز باۋىرى ىستىق بوز كىلەمنەن ەش الىستاعان جوق. ول سپورتتى ومىرلىك سەرىگىنە اينالدىردى. 2012 جىلى رۋسلان قازاق كۇرەسىنەن استانادا وتكەن «قازاقستان بارىسى» تۋرنيرىندە باق سىنادى. دزيۋدودان 2013 جىلى تۋريندە الاۋى تۇتانعان ارداگەرلەر اراسىنداعى دۇنيەجۇزىلىك ويىنداردىڭ جەڭىمپازى اتاندى. مايامي مەن ءابۋ-دابي قالالارىندا جالاۋى جەلبىرەگەن الەم چەمپيوناتتارىندا قاتارىنان ەكى رەت باس جۇلدەنى ولجالادى. مالوركاداعى دودادا كۇمىسپەن كۇپتەلدى. مىنە, قازاقستاننىڭ بەلدى بالۋانى ر.سەيىلحانوۆتىڭ قول جەتكىزگەن جەتىستىكتەرى وسىنداي.
