اكىم كوروناۆيرۋسپەن اۋىردى ما؟
كۇنى كەشە WhatsApp جەلىسىندە وبلىستاعى بۇقار جىراۋ اۋدانىنىڭ اكىمى «جامان تۇماۋ» جۇقتىرىپتى» دەگەن اۋديوجازبا جەلدەي گۋلەپ تاراپ كەتتى. ارقا جۇرتى بۇل اقپاراتتى ەستىپ, ابدىراپ قالعان-دى. اكىم دە اۋىرادى-اۋ ەكەن دەپ ەمەس, بۇل ىندەتتىڭ الدىندا اركىمنىڭ دە ءالسىز ەكەنىن ويلاپ ۋايىمداعان بولار...
كوپ ۇزاماي بۇل اقپاراتتىڭ جالعان ەكەنى بەلگىلى بولدى. ءتارتىپ ساقشىلارى جەلىدە قاۋەسەت تاراتىپ, جۇرتتىڭ ۇرەيىن ۇشىرعان 40 جاستاعى ايەلدى وپ-وڭاي تاۋىپ الدى. كۇدىكتى كىناسىن موينىنا الىپ, ەفيردە ەكى ەتەگى جاسقا تولىپ, اۋدان اكىمىنەن, بارشا جۇرتتان كەشىرىم سۇرادى.
بۇل وقيعانىڭ بۇقار جىراۋ اۋدانىنىڭ اكىمىنە وڭاي تيمەگەنى انىق. كوروناۆيرۋسپەن كۇرەس, ودان كەيىن كوكتەمگى سۋ تاسقىنى دەپ كۇندىز كۇلكىدەن, تۇندە ۇيقىدان ايىرىلىپ جۇرگەن اكىمنىڭ شاشىن مىنا وسپادار قىلىق ءتىپتى دە اعارتىپ جىبەرگەن شىعار...
جالپى, قىلمىستىڭ مۇنداي تۇرىنە, اتاپ ايتقاندا, تەلەكوممۋنيكاتسيا جەلىلەرىن پايدالانىپ, قاساقانا جالعان اقپارات تاراتقانعا جازا قاتاڭ – جەتى جىلعا دەيىن سوتتالىپ كەتۋ تۇككە دە تۇرمايتىن شارۋا.
Abadan «كارتوپ جاردى»
جاستاردىڭ سوزدىك قورىندا «كارتوپ جاردى» دەگەن زاماناۋي جارگون بار. جاعدايعا بايلانىستى ءسال-ءپال قۇبىلىپ تۇرعانىمەن, تۇپكى ماعىناسى كۇلكىگە قارىق قىلدى دەگەنگە كەلەدى.
قاراعاندىدا Abadan دەگەن ارالاس جەكپە-جەك شەبەرلەرىن شىڭدايتىن كلۋب بار. مىنە, وسى ۇجىمداعى بىلەكتى دە جۇرەكتى جىگىتتەر كەشە 600-گە تارتا ادامعا كارتوپ تاراتتى. كلۋب پرەزيدەنتى نۇرلان قالتاەۆ بۇل اكتسيانىڭ BigTayGroup كومپانياسىنىڭ قولداۋىمەن ىسكە اسقانىن ايتتى. كارتوپ – كومپانيانىكى, باسە دەيمىز, ۇنەمى دەمەۋشى ىزدەپ جۇرەتىن سپورتشىلارعا 8 توننا كارتوپ ساتىپ الاتىن اقشا قايدان كەلسىن؟
دەگەنمەن, Abadan باسشىسىنىڭ وسىندايدا جول تاۋىپ, جۇرت كوزىنە جاقسى جاعىنان جارق ەتىپ كورىنە بىلەتىن ونەرىنە ءدان ريزا بولاسىڭ. ديۆاندى سىقىرلاتىپ, سارى ۋايىمعا سالىنىپ جاتا بەرگەنشە, وسىلايشا ەبىن تاۋىپ, مۇقتاج جاندارعا ەڭ قۇرىعاندا ءبىر دوربادان كارتوپ ۇلەستىرسەڭ, بۇل دا ورتاق ىسكە قوسقان از دا بولسا ۇلەسىڭ عوي. Abadan شىنىندا دا جاقسى ماعىناسىندا «كارتوپ جاردى».
رەسەيلىكتىڭ ريزا بولۋى
قاراعاندىداعى قارت اتا-اناسىنا سوناۋ پەتەربوردان بالاسى قوناققا كەلىپتى. نەگىزى, ءبىزدىڭ ەلگە توتەنشە جاعداي جاريالانعانعا دەيىن جەتكەن ەكەن. سودان كۇندە قوناق, سايران سالىپ جۇرگەنىندە, جاڭا كوشى-قون ەرەجەلەرىنە ساي كەلۋ تۋرالى ەسكەرتۋدى ءۇش كۇن مەرزىم ىشىندە تىركەتۋدى ەسىنەن شىعارىپ العان عوي.
ال تەمىرتاۋدا جۇرگەنىندە, ەكى قالا كارانتينگە جابىلعان دا, قىدىرىمپاز ساباز ءۇشىن وبلىس ورتالىعىنا جەتىپ الۋدىڭ ءوزى مۇڭعا اينالعان.
پەتەربورلىقتىڭ باسىنداعى بۇل جاعدايدان حاباردار بولعان وبلىستاعى «جەدەل ارەكەت ەتۋ ورتالىعى» كومەك قولىن سوزدى. رەسەي ازاماتىنىڭ ەلىمىزدە بولۋى زاڭداستىرىلىپ, وعان سانيتارلىق بلوك-بەكەتتەن وتۋگە رۇقسات بەرىلدى. وسى وقيعانىڭ كۋاسى بولعاندار ك ۇلىپ ايتادى: ايىپپۇلدان دا قۇتىلعان رەسەيلىكتىڭ ريزا بولعانى سونشا, يەگى كەمسەڭدەپ, جىلاپ تا الىپتى...
كارانتين بىتكەننەن كەيىن الگى قوناق ەش كەدەرگىسىز ءوزىنىڭ سۇيىكتى سانكت-پەتەربۋرگىنە ورالا الادى.
قاراعاندى وبلىسى
