«Egemen Qazaqstan» گازەتىندە جاريالانعان «بىرلەسە بىلگەن ەل ءبارىن جەڭەدى» (8 ءساۋىر, 2020 جىل) اتتى ماقالاسىندا دا ەلباسى ەلدى بىرلىككە شاقىرادى. بىرلىككە جەتەتىن قۋاتتى كۇش جوق ەكەندىگىن اتالارىمىز دا نەبىر كەمەڭگەرلىكپەن ايتىپ كەتكەن بولاتىن. ەلباسى ءوزىنىڭ سوزىندە قازاقستاننىڭ ءوز تاۋەلسىزدىگىنىڭ 30 جىلىندا سان قيلى جولدان وتكەندىگىن, ەل دامۋىنىڭ دۇرىس جولىن تاڭداي ءبىلۋدىڭ ناتيجەسىندە قۋاتتى دا, ابىرويلى دا بەدەلدى, حالقىنىڭ ىنتىماعى جاراسقان مەملەكەت قۇرا العانىمىزدى, اتقارىلعان ىستەردى تاعى دا كوز الدىمىزعا اكەلىپ, جادىمىزدى جاڭعىرتقانداي بولدى.
راس, ءبىز تاريحتىڭ اسا كۇردەلى كەزىندە تاۋەلسىزدىككە قول جەتكىزدىك. نەبىر سىندارلى كەزەڭدە, ەلدىڭ ىرگەسى شايقالىپ كەتەر تۇستا دا, ەكونوميكا دەگەنىڭىز قۇلدىراپ ءبىتىپ, جۇمىسسىزدىق جايلاپ, قازىنامىز, دۇكەن سورەلەرى بوس قالىپ, «قازاقتار ءوز بەتىمەن ەل بولا المايدى» دەگەن سەنىمسىزدىكتەر دە ۇرەي تۋعىزعان ساتتەردە ەلباسى ءوز حالقىمەن بولدى.
ەلباسى تاۋەلسىز مەملەكەت قۇرۋدىڭ ازاپتى كۇندەرى مەن ۇيقىسىز تۇندەرىن حالقىمەن بىرگە وتكىزدى. ەلباسى ءبارىن دە حالقىمەن بىرگە كوردى, بىرگە ءتوزدى, بىرگە جەڭدى! قازاقستاندى الەم تۇڭعىش پرەزيدەنتىمىز نازارباەۆتىڭ ەسىمىمەن, نازارباەۆتىڭ كەلبەتىمەن, نازارباەۆتىڭ ىسىمەن تانىدى.
قازاقستان پرەزيدەنتى قاسىم-جومارت توقاەۆ ءوز سوزىندە ن.نازارباەۆتىڭ الەمدىك ساياساتتاعى ۇلى تۇلعا ەكەندىگىن ورىندى اتاپ كورسەتكەنى دە بار. ەلباسى ەلگە ارناعان سوزىندە تاعى دا ەلىمەن بىرگە ەكەندىگىن, ەل باسىنا تونگەن وسى ءبىر ىندەتتى جاعدايدان حالقىنىڭ امان-ساۋ شىعۋىن ويلاپ, وي تولعايدى. اتالىق ءسوزىن ايتا وتىرىپ, ابىزدىق ويمەن تولعانعان ەلباسىنىڭ جۇرت كوڭىلىنىڭ الاڭ وسىنداي تۇسىندا ەل ىشىندە ۇرەي تۋدىراتىن وسەك-اياڭدى تاراتۋدىڭ ءوزى ەل ىشىنە ىرىتكى سالۋ دەپ باعالايدى. جانە دە «كوپتىڭ قامىن كوزدەيتىن ادام ايعايشىل كۇشىمەن ەمەس, يگىلىكتى ىسىمەن قىزمەت ەتكەنى دۇرىس. عايبات پەن بايبالام ورنىنا عىلىم-بىلىممەن شۇعىلدانعان ابزال» دەيدى ەلباسى!
تۇڭعىش پرەزيدەنتىمىز نۇرسۇلتان نازارباەۆ الەمدى جايلاپ بارا جاتقان اسا قاۋىپتى ىندەتتەن قازاق ەلىنىڭ امان شىعۋى ءۇشىن قاسىم-جومارت توقاەۆتىڭ دۇرىس شەشىم قابىلداپ جاتقانىن جانە دە ءبارىمىزدىڭ ونى قولداپ, ءبىر بولۋعا شاقىرۋى ەلدىك ءسوز دەر ەدىم.
قازاق حالقى اقىل-پاراساتتى حالىق! بۇل سىناقتان دا اماندىقپەن وتەرىمىزگە سەنىم بار. ەڭ باستىسى, قازىرگى جاعدايدا ەلباسى ايتىپ وتىرعان بىرلىكتى ساقتاي وتىرىپ, پرەزيدەنتىمىز قاسىم-جومارت توقاەۆتىڭ توتەنشە جاعدايدان شىعۋ جولىندا بەلگىلەپ وتىرعان بارلىق امالدارىنا قولداۋ كورسەتەيىك. ءبىز ءبارىن دە جەڭەمىز! جاقسى كۇندەرىمىز الدا! تەك امان بولايىق!
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى, كوكشەتاۋ قالاسىنىڭ قۇرمەتتى ازاماتى
