بۇل تۋرالى سەيسەنبى كۇنى تۇسكە قاراي وتكەن ونلاين-بريفينگتە الماتى قالالىق دەنساۋلىق ساقتاۋ باسقارماسىنىڭ باسشىسى تىلەۋحان ابىلداەۆ مالىمدەدى. قىسقاسى, الماتى قالاسىنىڭ دەنساۋلىق ساقتاۋ باسقارماسى ەكى بىردەي اۋرۋحانانى كارانتينگە جابۋعا ءماجبۇر بولدى. دەمەك, سوڭعى تاۋلىكتە شاھارداعى 147 مەديتسينا قىزمەتكەرى, ياعني الماتىداي ۇلكەن قالادا ىندەت جۇقتىرعانداردىڭ تەڭ جارتىسىنا دەرلىگى دارىگەرلەر بولدى دەپ ايتۋعا نەگىز بار.
ماسەلەن, سەيسەنبى كۇنگى رەسمي دەرەكتەرگە سايكەس, تەك جاڭادان انىقتالعان جاعداي – 174. ولاردىڭ 58-ءى جەرگىلىكتى ناۋقاسپەن بايلانىستا بولعان بولسا, ونىڭ ىشىندە بالالار قالالىق كلينيكالىق جۇقپالى اۋرۋلار اۋرۋحاناسىنىڭ 1 قىزمەتكەرى, ورتالىق قالالىق كلينيكالىق اۋرۋحانانىڭ 110 مەديتسينا قىزمەتكەرى, مەديتسينالىق جەدەل جاردەم قىزمەتىنىڭ 2 قىزمەتكەرى, №32 قالالىق ەمحانانىڭ 1 قىزمەتكەرى, №11 قالالىق ەمحانانىڭ 1 قىزمەتكەرى, №1 قالالىق كلينيكالىق اۋرۋحانانىڭ 1 قىزمەتكەرى بار.
بۇرىنعى №12 اۋرۋحانا, ياعني ورتالىق قالالىق كلينيكالىق اۋرۋحانانىڭ 1200-گە تارتا قىزمەتكەرى مەن مىڭداعان پاتسيەنتى بار ەكەنىن ەسكەرسەك, ءالى دە كوروناۆيرۋستىق ينفەكتسيا جۇقتىرىپ العانداردىڭ سانى ارتا ءتۇسۋى عاجاپ ەمەس. اتالعان اۋرۋحاناداعى ىندەت جۇقتىرعان 110 دارىگەرگە كەلەتىن بولساق, ونىڭ ىشىندە دارىگەرلەرمەن بىرگە ورتا جانە كىشى بۋىن مەديتسينالىق قىزمەتكەرلەرى دە بار.
وسى ارادا وقىرمانعا تۇسىنىكتى بولۋ ءۇشىن ايتا كەتۋ كەرەك, 11 ساۋىردەن بەرى قالادا كوروناۆيرۋستىق ينفەكتسيا قۇرىعىنا دەنساۋلىق سالاسىنىڭ 37 وكىلى ىلىكسە, 13 ساۋىردە, ياعني ءبىر كۇندە 27 مەديتسينا قىزمەتكەرى ىندەتكە شالدىققانى رەسمي ءمالىم بولدى. ونىڭ 20-سى ورتالىق قالالىق كلينيكالىق اۋرۋحاناسىنىڭ دارىگەرلەرى مەن ورتا جانە كىشى بۋىنداعى قىزمەتكەرلەرى بولسا, 7 ادام بالالار جۇقپالى اۋرۋحاناسىنا قارايدى. سونىمەن دۇيسەنبى كۇنى ورتالىق قالالىق كلينيكالىق اۋرۋحاناسىنىڭ 20 مەديتسينا قىزمەتكەرىن توسەككە سۇلاتقان ىندەت قايدان كەلدى دەگەن سۇراققا الماتى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆانىڭ بەرگەن جاۋابى تومەندەگىدەي بولدى.
ناۋرىز ايىنىڭ سوڭىندا وسى «№12 اۋرۋحاناعا» مرت-دان وتۋگە ىندەت جۇقتىرعان پاتسيەنت كەلگەن. ول وسى بولىمشەنىڭ دارىگەرى جانە مەدبيكەسىمەن بايلانىستا بولعان. دەپارتامەنت باسشىسىنىڭ ايتۋىنشا, كوروناۆيرۋستىق ينفەكتسيا جۇقتىرۋعا ساقتىق شارالارىن ساقتاماعان دارىگەرلەردىڭ وزدەرى دە كىنالى كورىنەدى. دەگەنمەن, ورتالىق قالالىق كلينيكالىق اۋرۋحانا ۇجىمىنىڭ بۇل ماسەلەدە ءوز ءۋاجى بار. ولاردىڭ مەملەكەت باسشىسىنا جازعان ارىز-شاعىمدارىنا سەنسەك, ىندەت وسى اۋرۋحانانى تەكسەرۋگە كەلگەن سەس قىزمەتكەرلەرىمەن ىلەسىپ كەلگەن. قىسقاسى, ءدال وسى كۇندەرى جاپپاي ىندەت جۇقتىرعان مەديتسينا قىزمەتكەرلەرىنە قاتىستى ەپيدەميالىق تەرگەۋ جۇمىستارى ءجۇرىپ جاتىر.
الايدا وسى ارادا بىرنەشە ماسەلەنى العا تارتا كەتكەن ءجون. وسىدان ەكى اپتا بۇرىن الماتى قالاسىنىڭ رەسمي بريفينگ-چاتىندا باق وكىلدەرى ورتالىق قالالىق كلينيكالىق اۋرۋحاناسىنا بايلانىستى بىرنەشە ماسەلە كوتەرگەن بولاتىن. ونىڭ ءبىرى – كوروناۆيرۋستىق سىرقات بەلگىلەرى بار ناۋقاستاردىڭ جەدەل جاردەممەن اتالعان اۋرۋحاناعا اپارىلۋى ەدى. بىراق قالالىق دەنساۋلىق ساقتاۋ باسقارماسىنىڭ باسشىلارى بۇل سۇراقتارعا جاۋاپ بەرىپ, ماسەلەنى انىقتاۋدىڭ ورنىنا, جۋرناليستەرگە كەرى سۇراقتار قويۋمەن عانا شەكتەلدى. ونىڭ ۇستىنە الماتىنىڭ باس سانيتارلىق دارىگەرىنىڭ اينالاسىنان دا اڭگىمەلەر كەتپەي تۇر. ماسەلەن, ەۋروپادا گەرمانيا ەڭ قاۋىپتى ەلدەر ساناتىنا جاتقىزىلعان كەزدە, سول ەلگە بارىپ قايتقان مولداعاسىموۆا 14 كۇندىك كارانتينگە وقشاۋلانۋدىڭ ورنىنا, ءباسپاسوز ءماسليحاتىن وتكىزگەنىن بۇكىل باق وكىلدەرى كوردى.
سوڭعى دەرەكتەرگە سەنسەك, سەيسەنبى كۇنى پوليسەگمەنتارلى پنەۆمونياسىنا بايلانىستى 2 مەديتسينا قىزمەتكەرىنىڭ جاعدايى اۋىر بولدى. سونداي-اق الماتىدا كارانتينگە جابىلعان ورتالىق قالالىق كلينيكالىق اۋرۋحاناسىندا كوروناۆيرۋس جۇقتىرعان دارىگەرلەرمەن بايلانىستا بولعان 316 ادام وقشاۋلانعانى تۋرالى دا الماتىنىڭ باس سانيتارلىق دارىگەرى مالىمدەدى.
ء«بىز جاقىن بايلانىستا بولعان 316 ادامدى وقشاۋلادىق. مۇنىڭ الماتىداعى ەڭ ۇلكەن كلينيكا ەكەنىن ەسكەرۋ كەرەك. مۇندا 1 مىڭنان اسا قىزمەتكەر بار, ەكى ءبولىم بويىنشا 316 ادام وقشاۋلاندى», دەدى باس سانيتار.
قازىر الماتىدا كوروناۆيرۋس جۇقتىرعان دارىگەرلەرگە بايلانىستى ەپيدەميالىق تەرگەۋ ءجۇرىپ جاتىر.
الماتى
