بۇگىنگى تاڭدا 4 باعىت بويىنشا 332 جوبانىڭ ءتىزىمى دايىندالدى. كارانتين كەزىندە جۇمىسسىز قالعان اقمولالىقتار از ەمەس. سوندىقتان, جۇمىسپەن قامتۋ ورتالىقتارى بۇگىندە جۇمىسسىزداردىڭ ءتىزىمىن جاساقتاپ, باعدارلاما اياسىندا ۇگىت-ناسيحات شارالارىن ونلاين رەجيمدە جۇرگىزۋدە.
كارانتينگە بايلانىستى جۇمىسپەن قامتۋ ورتالىعى ماماندارىنىڭ 50 پايىزى قاشىقتىقتان جۇمىس ىستەۋگە كوشىرىلگەن. سوندىقتان, ورتالىقتىڭ ەسىگى قاۋىپسىزدىك ماقساتىندا ازىرگە جابىق. دەگەنمەن,قاجەتتى مامانداردىڭ بايلانىس نومىرلەرى جازىلعان. ورتالىق ديرەكتورىنىڭ ايتۋىنشا, ازىرگە شتاتتىق رەجيمدە جۇمىس ىستەپ جاتقان ماماندار جۇمىسسىزداردىڭ ءتىزىمىن ازىرلەپ, ولاردى جول كارتاسى اياسىندا اشىلاتىن بوس جۇمىس ورىندارىنا باعىتتاۋعا ازىرلىك جۇرگىزۋدە.
–«جۇمىسپەن قامتۋدىڭ جول كارتاسى» اياسىندا كوكشەتاۋ قالاسى بويىنشا 50 جوبا جۇزەگە اسىرىلماق. بارلىعى 3 مىڭعا جۋىق جاڭا جۇمىس ورنى اشىلادى دەپ كۇتىلۋدە. ونىڭ 1,5 مىڭى جۇمىسپەن قامتۋ ورتالىقتارى ارقىلى جۇمىسقا تارتىلۋى ءتيىس. ياعني, جول كارتاسى اياسىندا اشىلاتىن جۇمىس ورىندارىنا قاجەتتى ماماندار, ءبىزدىڭ ورتالىق ارقىلى دا تارتىلادى,–دەيدى كوكشەتاۋ قالالىق جۇمىسپەن قامتۋ ورتالىعىنىڭ ديرەكتورى ۋاقىت بەيسەنباەۆ.
ورتالىق ديرەكتورى جۇمىس ىزدەۋشىلەرگە جەرگىلىكتى جۇمىسپەن قامتۋ ورتالىقتارىنىڭ ەلەكتروندى جۇيەسىن تولىعىمەن پايدالانۋعا كەڭەس بەرەدى. ال, ءىرى قالالاردا ەڭبەك ەتىپ, جۇمىسسىز قالعان جاستار ءوز ەلدى مەكەندەرىندە «جۇمىسپەن قامتۋدىڭ جول كارتاسى»اياسىندا ورنالاسا الادى. ول ءۇشىن جاستارعا بىرجولعى 85 مىڭ تەڭگە كوتەرمە اقى تولەنەدى.
–«جۇمىسپەن قامتۋدىڭ جول كارتاسى» اياسىندا وبلىستا 332 جوبا جۇزەگە اسىرىلادى. ينفراقۇرىلىمدىق جوبالار 4 باعىتتا قاراستىرىلعان. باسىمدىق الەۋمەتتىك سالاعا بەرىلىپ وتىر. سونىمەن قاتار, تۇرعىن ءۇي-كوممۋنالدىق باعىتتا 61 جوبا, ەلدى مەكەندەردى اباتتاندىرۋ باعىتىندا 21 جوبا قاراستىرىلعان. باعدارلاما اياسىندا جۇمىسقا تارتىلعاندارعا 85 مىڭ تەڭگەدەن كەم ەڭبەكاقى تولەنبەيدى,–دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى جەتەكشىسىنىڭ ورىنباسارى شولپان راحماتۋللينا.
«جۇمىسپەن قامتۋدىڭ جول كارتاسى» اياسىندا وڭىردە بارلىعى 11 مىڭ 252 جاڭا جۇمىس ورنى اشىلماق. ال, باعدارلاما اياسىندا ىسكە قوسىلعان 12 جوبا تۇراقتى 441 جاڭا جۇمىس ورنىنىڭ اشىلۋىنا مۇمكىندىك بەرمەك.
