وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى بۇگىن بريفينگ وتكىزىپ, وسى شارا اياسىندا اتقارىلاتىن جۇمىستار جايىن بايان ەتتى.
ءبىزدىڭ ينسپەكتسيا, اۋداندىق, قالالىق پوليتسيا بولىمدەرى, ورمان جانە جانۋارلار دۇنيەسىن قورعاۋ جونىندەگى مەملەكەتتىك مەكەمەلەر, «وحوتزووپروم» ءوب» فيليالى, اڭشىلىق شارۋاشىلىعى وكىلدەرىنەن موبيلدىك توپتار قۇرىلىپ, كيىكتىڭ ميگراتسيالىق جولدارىندا قورعاۋ شارالارى كۇشەيەدى. جەدەل توپ قىزمەتكەرلەرى, اۆتوكولىك قۇرالدارىمەن جانە ءتيىستى جابدىقتارمەن قامتاماسىز ەتىلەدى, – دەدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى مارات نۇرماعامبەتوۆ.
قازاقستان اۋماعىندا كيىكتىڭ تارالۋى بەتپاقدالا, ورال جانە ءۇستىرت پوپۋلياتسياسى دەپ بولىنەدى. قىزىلوردا, اقتوبە, قاراعاندى, قوستاناي, اقمولا وبلىستارىنىڭ اۋماعىنداعى كيىكتەر بەتپاقدالا پوپۋلياتسياسىنا جاتادى.
بىلتىرعى جۇرگىزىلگەن ساناق جۇمىستارى بەتپاقدالا پوپۋلياتسياسى – 111 500, ورال پوپۋلياتسياسى – 217 000, ءۇستىرت پوپۋلياتسياسى – 5900 بولىپ, ەلىمىزدەگى كيىك سانى 334 400-گە جەتكەنىن كورسەتتى. 2018 جىلمەن سالىستىرعاندا 55 پايىزعا كوبەيگەن.
قازاقستان رەسپۋبليكاسى ۇكىمەتىنىڭ 2012 جىلعى 25 شىلدەدەگى №969 قاۋلىسىنا سايكەس سول تۇستا سانى كۇرت ازايىپ كەتكەن كيىكتى 2020 جىلعا دەيىن اۋلاۋعا تىيىم سالىنعان بولاتىن. ورمان شارۋاشىلىعى جانە جانۋارلار دۇنيەسى كوميتەتى 2020 جىلدىڭ اقپان ايىندا 2015 جىلعى 24 شىلدەدەگى № 190 بۇيرىعىنا وزگەرىستەر ەنگىزىپ, عىلىمي ماقساتتاردا پايدالانۋدان باسقا, ەل اۋماعىندا كيىكتەردى, ولاردىڭ بولىكتەرى مەن دەريۆاتتارىن پايدالانۋعا 2023 جىلعا دەيىن تىيىم سالدى.
بىراق, كيەلى اڭدى قورعاۋ كۇشەيگەن سايىن وعان مىلتىق كەزەۋگە قۇمارلار دا ازايار ەمەس. وسى جىلدىڭ قاڭتار, ناۋرىز ايلارىندا وسىنداي 3 براكونەرلىك دەرەك انىقتالىپ, ولارعا قاتىستى پوليتسيا ورگاندارى سوتقا دەيىنگى تەرگەۋ امالدارىن جۇرگىزۋدە.
جاقىندا عانا «وحوتزووپروم» ءوب» رمقك جەدەل توبىنىڭ ينسپەكتورلارى وسىنداي قاسكويلەردىڭ ىزىنە ءتۇسىپ, قۋعىننان قاشىپ, اۋدارىلعان كولىك ىشىنەن ءمۇيىزى كەسىلگەن 54 كيىك, 224 دانا ءمۇيىز, 25 وعى بار مر-153 ماركالى اڭشى مىلتىعى, ءدۇربى مەن پىشاق تابىلدى. قازىر وسى ىسكە بايلانىستى قر قك-ءنىڭ 339-بابىنىڭ 3-بولىگى 2-تارماعىمەن سوتقا دەيىنگى تەرگەۋ امالدارى باستالدى.
2019 جىلدىڭ قاراشا ايىندا قولدانىستاعى زاڭ تالاپتارىنا وزگەرىستەر ەنگىزىلىپ, زاڭسىز اڭشىلىقپەن نەمەسە تاسىمالداۋمەن, ساقتاۋ, ساتۋ, ساتىپ الۋمەن اينالىساتىندارعا قاتىستى باپتار قاتاڭداتىلدى. مەملەكەتكە كەلتىرىلگەن زالالدى ەسەپتەۋ ەرەجەسى دە وزگەردى.
مىسالى, كيىك تەكەسى ءۇشىن ايىپپۇل 500 اەك, ياعني 6 ملن 250 مىڭ 500 تەڭگەگە جەتتى. ال, ەشكىسى مەن لاعىن وققا بايلاساڭىز ايىپ رەتىندە 350 اەك نەمەسە 4 ملن 375 مىڭ 350 تەڭگە تولەيسىز.
سونىمەن قاتار, سوتتى بولعان ازاماتتان قىلمىستىق ارەكەتتەر وبەكتىسى, قىلمىس جاساۋ قارۋى, پايدالانىلعان كولىك قۇرالدارى, قىلمىس قۇرالى بولىپ تابىلاتىن م ۇلىكتەر تاركىلەنەتىن بولادى.
