«قۇرمەتتى ازاماتتار! ءبىزدىڭ ەلىمىز بۇكىل الەم سياقتى, حالىقتىڭ ءومىرى مەن دەنساۋلىعىنا, ساياسي جانە ەكونوميكالىق جۇيەلەردىڭ تۇراقتىلىعىنا نۇقسان كەلتىرگەن COVID-19 كوروناۆيرۋس پاندەمياسىنا تاپ بولدى.
وسىعان وراي قازاقستان رەسپۋبليكاسى پرەزيدەنتىنىڭ جارلىعىمەن ەلدىڭ بارلىق اۋماعىندا توتەنشە جاعداي رەجيمى ەنگىزىلدى, ال كەيبىر قالالار مەن ەلدى مەكەندەردە شەكتەۋ شارالارىمەن بايلانىستى كارانتين جاريالاندى.
بۇل شارالار اتقارۋشى, قۇقىق قورعاۋ, مەديتسينالىق, اسكەري جانە باسقا دا مەملەكەتتىك ورگانداردىڭ كۇشىمەن قامتاماسىز ەتىلەدى.
قازىرگى ۋاقىتتا ۇلتتىق ۇلان بولىمشەلەرىنىڭ, ۇقك شەكارا قىزمەتىنىڭ, سونداي-اق قازاقستان رەسپۋبليكاسى قارۋلى كۇشتەرىنىڭ رادياتسيالىق, حيميالىق جانە بيولوگيالىق قورعاۋ, مەديتسينالىق جانە باسقا دا اسكەر تۇرلەرى مەن تەكتەرىنىڭ اسكەري قىزمەتشىلەرى ۆيرۋستىڭ باقىلاۋسىز تارالۋىنا جول بەرمەۋ, كۇشەيتىلگەن كارانتيندىك شارالار مەن قوعامدىق قۇقىقتىق ءتارتىپتى قامتاماسىز ەتۋ ءۇشىن تاۋلىك بويى قىزمەت اتقارۋدا.
مەملەكەت باسشىسى ءوز مالىمدەمەسىندە: ء«بىز ۇرەيگە جول بەرمەيمىز, جانە بۇل جاعدايدا ازاماتتار مەملەكەتكە قولداۋ كورسەتۋى ءتيىس. قازىر بۇل بۇرىنعىدان دا ماڭىزدى. بۇگىندە بۇكىل ەل قازاقستاندىق دارىگەرلەر مەن مەديتسينالىق قىزمەتكەرلەردىڭ ەرلىگى مەن تۇراقتىلىعىنا تاڭدانۋدا. ولار ءومىردى قۇتقارىپ جۇرگەن ناعىز باتىرلار. پوليتسيا قىزمەتكەرلەرى, سونداي-اق اسكەري قىزمەتشىلەرگە دە ەرەكشە العىس ايتامىز» دەدى.
ءوز تاراپىمىزدان وتان يگىلىگى ءۇشىن ءبىزدىڭ اسكەري قىزمەتكەرلەرىمىزگە ولاردىڭ ايبىندى جانە جانقيارلىق قىزمەتى ءۇشىن ريزاشىلىعىمىزدى جانە قولداۋىمىزدى بىلدىرگىم كەلەدى. سىزدەرگە مىقتى دەنساۋلىق پەن تۇراقتىلىق تىلەيمىن!
ەل ازاماتتارىن قالىپتاسقان جاعدايدى ءتۇسىنىپ, ءبىز ءۇشىن قيىن ۋاقىتتا قۇقىققا قارسى ارەكەتتەرگە جول بەرمەۋگە شاقىرامىن.
وسى كۇردەلى كەزەڭدە ءاربىر قازاقستاندىقتىڭ قولداۋى ماڭىزدى بولىپ قالۋدا, ءبىز ەلدەگى قالىپتاسقان جاعدايعا تۇسىنىستىكپەن قاراپ, اۋىزبىرشىلىك تانىتۋىمىز كەرەك. قوعامنىڭ كۇشى مەن ءوزارا كومەك كورسەتۋدىڭ سەنىمدىلىگى ىنتىماقتاستىقتا ەكەنىن ەستە ساقتاۋ قاجەت.
ءبىز بىرگەمىز!» دەلىنگەن وڭىرلىك قولباسشىلىق جولداعان مالىمەتتە.
ماڭعىستاۋ وبلىسى
