«جەرگىلىكتى بيۋدجەتتەردىڭ شىعىستارى 1,2 ترلن تەڭگەگە يگەرىلدى. ەسەپتى كەزەڭدە 512 اۋديتورلىق ءىس-شارا جۇرگىزىلدى. ونىڭ بارىسىندا 249 ملرد تەڭگە بيۋدجەت قاراجاتى اۋديتپەن قامتىلدى. ناتيجەسىندە 91 ملرد تەڭگەگە قارجىلىق بۇزۋشىلىقتار انىقتالدى. تەكسەرۋ بارىسىندا تاۋارلاردى جەتكىزۋ, قىزمەتتەردى كورسەتۋ جانە جۇمىستاردى ورىنداۋ, بيۋدجەتكە وتەۋ جانە ەسەپ بويىنشا كورسەتۋ جولىمەن 84 ملرد تەڭگەگە بۇزۋشىلىقتار جويىلدى», دەدى ءاليحان سمايىلوۆ.
پرەمەر-ءمينيستردىڭ ءبىرىنشى ورىنباسارى - قارجى ءمينيسترىنىڭ مالىمەتىنە سايكەس, اۋديت وبەكتىلەرىنىڭ قىزمەتتەرىن جەتىلدىرۋگە 470 ۇسىنىس بەرىلگەن. ونىڭ 361-ءى ورىندالدى. جالپى سوماسى 5,2 ترلن تەڭگەگە 881 مىڭ مەملەكەتتىك ساتىپ الۋ پروتسەدۋرالارى كامەرالدىق باقىلاۋمەن قامتىلدى. ناتيجەسىندە 250 ملرد تەڭگە سوماسىنداعى بۇزۋشىلىقتارعا جول بەرىلمەدى.
«2016-2020 جىلدارداعى كەشەندى جەكەشەلەندىرۋ جوسپارىنىڭ ىسكە اسىرىلۋى 93,2%-دى قۇرادى. 2020 جىلعا 68 وبەكتىنى ساتۋ جوسپارلانعان. ونىڭ 37-ءسى ساتىلۋعا قويىلدى. ەسەپتى كەزەڭدە 6 وبەكت 3,2 ملرد تەڭگەگە ساتىلدى. 31 وبەكتى ساۋدا-ساتتىققا شىعارىلدى. 3 وبەكتى قايتا ۇيىمداستىرۋ جانە تاراتۋعا جىبەرىلدى. 28 وبەكتى جىلدىڭ اياعىنا دەيىن ساتىلۋعا شىعارىلادى. قارجى مينيسترلىگىنىڭ الدىنا تۇرعان باستى ماقساتتارىنىڭ ءبىرى – ول ءتيىستى مەملەكەتتىك ورگاندارمەن بىرلەسە ناقتىلانعان بيۋدجەتتە الەۋمەتتىك سالاعا, كاسىپكەرلەردى قولداۋعا قاراستىرىلعان قاراجاتتاردىڭ تۇپكىلىكتى الۋشىلارعا ۋاقىتىندا جەتۋىن قامتاماسىز ەتۋ. جىل ىشىندە كىرىستەردىڭ ءوسۋ قارقىنىن تومەندەتپەي, ناقتىلانعان جوسپاردىڭ ورىندالۋىن قامتاماسىز ەتەتىن بولامىز», دەدى ءا. سمايىلوۆ.
