«13 ءساۋىر ساعات 13:00-گە دەيىن كوروناۆيرۋس جۇقتىرعان 972 جاعداي تىركەلدى, ونىڭ 99-ى جازىلىپ شىقتى. 21 ناۋقاستىڭ جاعدايى اۋىر, 11 ادام قايتىس بولدى. وتكەن تاۋلىكتە ەلىمىزدە 86 جاڭا جاعداي تىركەلدى, ورتاشا ءوسىم 9,9%. نۇر-سۇلتاندا – 20 (8,7%), الماتىدا 28 (20,4%) ناۋقاس انىقتالدى. ەلىمىزدە جالپى 34 236 ادام مەديتسينالىق باقىلاۋدا. ولاردىڭ 28%-ى ستاتسيونارعا ورنالاستىرىلعان بولسا, 68%-ى ءۇي كارانتينىندە», دەدى كوميتەت باسشىسى.
سپيكەر كوروناۆيرۋس جۇقتىرعان مەديتسينا قىزمەتكەرلەرىنىڭ سانى 211-گە جەتكەنىن حابارلادى. ونىڭ ىشىندە ءبىر ناۋقاس – ىشكى ىستەر مينيسترلىگىنىڭ قىزمەتكەرى. مۇنداي جاعداي رەسپۋبليكانىڭ 13 وڭىرىندە تىركەلگەن, جالپى ناۋقاستاردىڭ 20,5%-ىن قۇرايدى. اتاپ ايتقاندا, COVID-19 ەمدەۋ جانە اۋرۋ جۇقتىرۋى مۇمكىن ناۋقاستارعا كۇتىم جاسايتىن بەيىندى ستاتسيونارلاردا 74 مەديتسينا قىزمەتكەرى, ونىڭ ىشىندە كارانتيندىك ورتالىقتا – 20 (نۇر-سۇلتان قالاسىندا), پروۆيزورلىق ستاتسيوناردا – 10, جۇقپالى اۋرۋلار اۋرۋحانالارىندا 44 مەديتسينا قىزمەتكەرى ۆيرۋس جۇقتىرعان.
ليۋدميلا بيۋرابەكوۆا اۋرۋ جۇقتىرعان مەديتسينا قىزمەتكەرلەرى تىركەلگەن بارلىق مەديتسينالىق ۇيىمداردا ينفەكتسيانىڭ سەبەپتەرى مەن فاكتورلارىن انىقتاۋ بويىنشا جۇمىس جۇرگىزىلىپ جاتقانىن جەتكىزدى. ونىڭ ايتۋىنشا, قىزمەتتىڭ قاربالاستىعىنا بايلانىستى جۇمىس رەجىمىنىڭ بۇزىلىپ, اۋرۋحانادا تاۋلىك بويى بولۋى نەگىزگى سەبەپ بولسا, كەي ايماقتاردا قىزمەتكەرلەر دەزينفەكتسيالىق جانە جەكە قورعانىش قۇرالدارىمەن تولىق قامتاماسىز ەتىلمەگەن. ءتىپتى كەيبىر قىزمەتكەرلەر جەكە قورعانىش قۇرالدارىن وزدەرى دۇرىس پايدالانباي, سانيتارلىق نورمانى ساقتاماعان. «476-باپ بويىنشا اكىمشىلىك جاۋاپكەرشىلىككە تارتۋ ءۇشىن جۇرگىزىلگەن تەكسەرىستەردىڭ ناتيجەلەرى بويىنشا سانيتارلىق-ەپيدەمياعا قارسى (پروفيلاكتيكالىق) ءىس-شارالاردى جۇرگىزۋ تۋرالى شەشىم قابىلداندى. الماتىداعى 6 جەكە مەديتسينالىق ۇيىمنىڭ مەديتسينالىق ليتسەنزيالارىن توقتاتا تۇرۋ تۋرالى ماتەريالدار سوت ورگاندارىنا جىبەرىلدى», دەدى ل.بيۋرابەكوۆا.
مينيسترلىك وكىلى كەشە ءبىر كۇننىڭ وزىندە COVID-19 اۋرۋىمەن جاتقان پاتسيەنتتەردى ەمدەۋ جانە كۇتۋ شارالارىنا قاتىسپاعان 82 مەديتسينالىق قىزمەتكەردىڭ ۆيرۋس جۇقتىرعانىن اتاپ ءوتتى. «COVID-19 اۋرۋىمەن اۋىرعان پاتسيەنتتەردى ەمدەۋگە, كۇتۋگە تارتىلماعان مەديتسينالىق قىزمەتكەرلەر اراسىندا كوروناۆيرۋس ينفەكتسياسىن جۇقتىرعاندار سانى دا تەز ءوسىپ جاتىر. اتالعان كونتينگەنت ماڭىزدى ەپيدەميولوگيالىق ءبولىم سانالادى. ياعني بۇل سانات ينفەكتسيانى ءارى قاراي ءورشىتۋى مۇمكىن وشاققا اينالۋ قاۋپى بار. جۇقتىرۋدىڭ جوعارى دەڭگەيى نۇر-سۇلتان (36), الماتى (33) قالالارىندا, سونىمەن قاتار اتىراۋ (6), اقمولا (3) وبلىستارى جانە قاراعاندى, قىزىلوردا, سولتۇستىك قازاقستان وبلىستارىندا, ءىىم ۆەدومستۆوارالىق قىزمەتىندە تىركەلدى», دەگەن ليۋدميلا بيۋرابەكوۆا نۇر-سۇلتاندا ۇلتتىق عىلىمي كارديولوگيالىق ورتالىقتان 8 ادام, ۇلتتىق ونكولوگيا جانە ترانسپلانتولوگيا ورتالىعىنان 16 ادام, «مەيىرىم» مەديتسينالىق ورتالىعىنان 7 ادامنىڭ كوروناۆيرۋس جۇقتىرعانىن ايتتى.
سونداي-اق ول كوروناۆيرۋس ىندەتىنىڭ ەلىمىزدە شارىقتاۋ شەگىنە بولجام جاسالعانىن دا جەتكىزدى. «عالىمداردىڭ الدىن الا ەسەبى بويىنشا, قازاقستانداعى كوروناۆيرۋس ينفەكتسياسىنىڭ ەڭ اسقىنعان شاعى ءساۋىردىڭ سوڭى مەن مامىر ايىندا بولادى دەپ بولجانىپ وتىر. بۇل كەزدە اۋرۋ جۇقتىرعانداردىڭ سانى 2 مىڭنان اسۋى مۇمكىن», دەدى كوميتەت ءتورايىمى.
كوروناۆيرۋس بويىنشا ەكسپرەسس-تەست الماتى مەن نۇر-سۇلتان قالالارىندا جۇرگىزىلىپ جاتىر. بۇدان بولەك شەكارالارداعى سانيتارلىق-وتكىزۋ پۋنكتتەرىنىڭ ءبارى دە ەكسپرەسس-تەستپەن قامتاماسىز ەتىلگەن. وسىنى ايتقان سپيكەر: «ول جەردە كىرگەندەردىڭ بارىنە ەكسپرەسس-تەست جۇرگىزىلەدى. ءبىزدىڭ مەتسەناتتاردىڭ قاراجاتىمەن 270 مىڭ تەست ساتىپ الىنعان بولاتىن. بۇگىندە 3136 ەكسپرەسس-تەست جۇرگىزىلدى. ونىڭ 354-ءى قازاقستاننىڭ اۆتوكولىك بەكەتتەرىندە, 2782-ءسى مەديتسينالىق ۇيىمداردا جاسالدى. 64 ادامدا انتيدەنەنىڭ بارى انىقتالدى. ياعني ولاردىڭ ءبارى كوروناۆيرۋس ينفەكتسياسىمەن اۋىرىپ, جازىلىپ كەتكەندەر. ولاردى ەندى ءارى قاراي بەكىتىلگەن الگوريتم بويىنشا پتر-تەستتەن وتكىزەمىز», دەدى.
