كەشە عانا قاتەرلى دەرتتىڭ قاۋپىن مويىنداماي, مىندەتتى كارانتين شارالارىن ەنگىزۋگە اسىقپاعان كوپتەگەن باتىس ەلىنىڭ قازىرگە جاعدايى بارلىعىمىزعا ءمالىم. ماسەلەن, COVID-19 بۇگىنگە دەيىن اقش-تا عانا 22 مىڭنان استام ادامنىڭ جانىن قيعان, وسى دەرتكە شالدىققانداردىڭ سانى 550 مىڭنان استى.
بۇگىندەرى حالىقارالىق قوعامداستىقتىڭ ۇلكەن الاڭداۋشىلىعىن تۋعىزىپ وتىرعان تاعى ءبىر ماسەلە – قاۋىپتى دەرتتىڭ ەكىنشى تولقىنى باستالۋ مۇمكىندىگى. جاقىندا عانا ءوز ەلىندە كوروناۆيرۋستىڭ كەڭ ەتەك جايىلۋىنا جول بەرمەي, الەم مەملەكەتتەرىنىڭ قۇرمەت پەن ماداقتاۋىنا بولەنگەن سينگاپۋر وكىمەتى دە قايتادان COVID-19 قاسىرەتىمەن ايقاسۋعا ءماجبۇر. باستاپقىدا سينگاپۋر قاتاڭ ءارى شۇعىل شارالار ارقىلى كوروناۆيرۋستى باقىلاۋعا العان ەدى. الايدا, كەيىنىرەك ەلگە 500-دەم استام سينگاپۋرلىق ازامات ورالعان بولاتىن. ەڭ ماڭىزدىسى, سول ازاماتتار كارانتينگە جاتقىزىلسا دا, ولارمەن تۇراتىن جاقىندارىنا ەشقانداي شەكتەۋلەر قويىلماعان. ناتيجەسىندە, قازىر سينگاپۋردا تاۋلىك ىشىندە وسى دەرتتى جۇقتىرعان ادام سانى ءۇش تاڭبالى ديناميكامەن وسۋدە.
دەمەك, كوروناۆيرۋس جوعارى قاۋپى ءالى ساقتالۋدا, جاۋاپسىز قالعان سۇراقتاردىڭ سانى دا كوبەيۋدە: ۆاكتسينا قاشان تابىلادى؟ تارالۋ ەكپىنى قاشان شارىقتاۋ شەگىنە جەتەدى؟ ۆيرۋستىڭ ۇزاقمەرزىمدى سالدارلارى قانداي جانە تاعى باسقا.
مىنە, وسى جاعدايلاردى ەسكەرسەك, پرەزيدەنت قاسىم-جومارت توقاەۆتىڭ ەلدە توتەنشە جاعداي رەجىمىن 30 ساۋىرگە دەيىن ۇزارتۋ شەشىمى دۇرىس ءارى كەرەك شارا ەكەنىنە كوزىمىز انىق جەتەدى.
قازاقستاندا كوروناۆيرۋس دەرتىنىڭ تارالۋ ديناميكاسى شارىقتاۋ شەگىنە ءالى جەتكەن جوق. ەلىمىزدە كارانتين شارالارى ارقاسىندا ۆيرۋستىڭ جاپپاي تارالۋى ايتارلىقتاي باسەڭدەسە دە, كوپتەگەن تاۋەكەل ءالى ساقتالۋدا. ماسەلەن, پرەزيدەنت اتاپ وتكەندەي, باسشىلىق قاداعالاۋىنداعى باستى ماسەلەلەردىڭ ءبىرى – حالىق تىعىز ورنالاسقان وڭتۇستىك وڭىرلەردە قاۋىپتى دەرتتىڭ تارالۋىنا جول بەرمەۋ.
ارينە توتەنشە جاعدايدىڭ ۇزارتىلۋى بۇكىل الەۋمەت ءۇشىن قيىن سىناق. ەل ەكونوميكاسى دا ۇلكەن شىعىندارعا باتۋدا, الايدا قاسىم-جومارت توقاەۆ ايتقانداي, حالىق دەنساۋلىعى – ەڭ ماڭىزدى باسىمدىلىق. بۇل ەل باسشىلىعى ۇستانىپ وتىرعان باستى قاعيدا, قوعامدا دا بۇل ماسەلە بويىنشا ەشقانداي داۋ مەن تالاس, كەلىسپەۋشىلىك بولماۋعا ءتيىس.
ەرلان ماديەۆ,
تۇڭعىش پرەزيدەنت قورى جانىنداعى اەسي ساراپشىسى
