ەلدەگى سانيتارلىق-ەپيدەميولوگيالىق جاعداي تۋرالى دەنساۋلىق ساقتاۋ ءمينيسترى ە. ءبىرتانوۆ, نۇر-سۇلتان جانە الماتى قالالارىنداعى احۋال مەن كاسىپكەرلىك سۋبەكتىلەرىنىڭ جۇمىسىن قالپىنا كەلتىرۋ بويىنشا ۇسىنىلاتىن شارالار تۋرالى اكىمدەر ا. كولگىنوۆ پەن ب. ساعىنتاەۆ باياندادى.
مەملەكەتتىك كوميسسيا دەنساۋلىق ساقتاۋ مينيسترلىگىنىڭ ۇستانىمىن ەسكەرە وتىرىپ, اكىمدەردىڭ ۇسىنىستارىنىڭ نەگىزىندە قاتاڭ سانيتارلىق-ەپيدەميولوگيالىق شارالاردى ساقتاۋمەن نۇر-سۇلتان جانە الماتى قالالارىندا كاسىپكەرلىك سۋبەكتىلەرىنىڭ جۇمىسىن كەزەڭ-كەزەڭمەن قالپىنا كەلتىرۋ تۋرالى شەشىم قابىلدادى.
ءبىرىنشى كەزەڭ اياسىندا بيىلعى 20 ساۋىردەن باستاپ ونەركاسىپ جانە قۇرىلىس كاسىپورىندارىنىڭ, سونداي-اق قىزمەت كورسەتۋ سالاسىنىڭ بەلگىلى-ءبىر سەكتورلارىنىڭ جۇمىسى قالپىنا كەلتىرىلەدى. ولاردىڭ جۇمىس ىستەۋى ءۇشىن قويىلاتىن مىندەتتى شارت — سانيتارلىق-ەپيدەميولوگيالىق نورمالاردى قاتاڭ ساقتاۋ.
ءى كەزەڭ اياسىندا نۇر-سۇلتان مەن الماتى قالالارىنداعى جۇمىسىن قالپىنا كەلتىرەتىن كاسىپكەرلىك قىزمەت تۇرلەرىنىڭ ناقتى ءتىزىمىن مەملەكەتتىك كوميسسيا بيىل 15 ساۋىردە بەكىتەدى.
ۇكىمەت باسشىسى جۇمىسىن قالپىنا كەلتىرەتىن نىسانداردا سانيتارلىق-ەپيدەميولوگيالىق قاۋىپسىزدىكتىڭ قامتاماسىز ەتىلۋىنە, سونداي-اق قىزمەتكەرلەرىنىڭ جۇمىس ورىندارىندا الەۋمەتتىك ارا قاشىقتىقتى ساقتاۋىنا قاتاڭ باقىلاۋ جاساۋدى تاپسىردى.
سونىمەن قاتار وتىرىسقا قاتىسۋشىلار بايلانىس جەلىلەرى مەن ينتەرنەت جۇمىسىن قامتاماسىز ەتۋ, مۇناي ونىمدەرىنىڭ ەكسپورتىن رەتتەۋ جانە باسقا دا ماسەلەلەردى قاراستىردى.
