قايرات حاسانوۆ جەكە شارۋامەن تۇركياعا بارعان ورال ءوڭىرىنىڭ تۋماسى كىمنەن جانە قانداي جاعدايعا «Covid-19»ۆيرۋسىن جۇقتىرعانىنان بەيحابار. اقتاۋ اۋەجايىنان تۇسە سالىسىمەن تەپلوۆيزور ونىڭ بويىندا قىزۋ بارىن كورسەتكەن. ءوڭىر دارىگەرلەرى ونى بىردەن اۋرۋحاناعا جەتكىزىپ, سىناما العان. ناتيجەسىندە, ساراپتاما وڭ كورسەتكىش كورسەتىپ, ناۋقاستىڭ كوروناۆيرۋس جۇقتىرعانى بەلگىلى بولدى.
-راسىن ايتۋ كەرەك, باسىندا قاتتى اۋىردىم. دىرىلدەپ, قىزۋىم كوتەرىلدى. ال, قازىر ەش جەرىم اۋىرمايدى, ءوزىمدى جاقسى سەزىنەمىن. ءارى قاراي ءوزىمدى كۇتەمىن. ىندەتتى جەڭۋ ءۇشىن قولدان كەلگەنشە كۇرەسۋ كەرەك, ءۇمىت ۇزبەگەن دۇرىس. دارىگەرلەرگە, مەدبيكەلەرگە, سانيتارلىق قىزمەتكەرلەرگە العىسىم شەكسىز. راحمەتىمدى ايتامىن. مەديتسينا قىزمەتكەرلەرىنىڭ جىلى ءسوزى مەن قارىم-قاتىناسى مەنى جىگەرلەندىرىپ, جازىلىپ شىعۋىما سەپتىگىن تيگىزدى دەپ ايتا الامىن, دەدى ەمدەلىپ شىققان العاشقى ناۋقاس.
ماڭعىستاۋ وبلىستىق ينفەكتسيالىق اۋرۋحاناسىنىڭ مەڭگەرۋشىسى, شتاتتان تىس باس ينفەكتسيونيستى گۇلبانۋ نۇرجانوۆانىڭ ايتۋىنشا, ناۋقاستى ەمدەۋ كەزىندە دارىگەرلەر ۆيرۋسقا قارسى تەراپيا جولدارىن قولدانعان. قر دەنساۋلىق ساقتاۋ مينيسترلىگىمەن بەكىتىلگەن كلينيكالىق حاتتاما نەگىزگە الىنعان. قىتايدان ەلىمىزگە كەلگەن تاجىريبەلى مامانداردىڭ بەينەكونفەرەنتسيا ارقىلى بەرگەن كەڭەستەرى دە ەسكەرىلگەن.
ايتا كەتەيىك, دارىگەرلەر ق.حاسانوۆتان جالپى ءۇش رەت سىناما الدى. سوڭعى ەكەۋى تەرىس ناتيجە كورسەتىپ, بويىندا «Covid-19» ۆيرۋسى انىقتالعان جوق. سوڭعى ءبىر اپتادا قىزۋى كوتەرىلمەگەن. ءوزىن جاقسى سەزىنەدى. ەندى, قايرات حاسانوۆ ورال قالاسىنداعى ۇيىندە 14 كۇندىك كارانتيندە بولادى.
ءدال قازىر اقتاۋداعى وبلىستىق ينفەكتسيالىق اۋرۋحانادا كوروناۆيرۋس جۇقتىرعان 4 ناۋقاس ەم الۋدا. ءبىر پاتسيەنتتىڭ جاعدايى اۋىر, جاساندى تىنىس الۋ اپپاراتىنا قوسىلعان. قالعان ءۇش ايەلدىڭ جاعدايى قاناعاتتاندىرارلىق.
جالپى, قازىرگى ۋاقىتتا ماڭعىستاۋدا كوروناۆيرۋس ىندەتىن جۇقتىرعان ادامدار سانى – 9
اقتاۋ قالاسىندا – 4
جاڭاوزەندە – 2
ماڭعىستاۋ اۋدانىندا - 3
جازىلىپ شىققان – 1
