قازىرگى تاڭدا اتباسار, استراحان, زەرەندى اۋداندارى ءجىتى باقىلاۋعا الىنعان. ونداعان ەلدى مەكەندى سۋ باسۋ قاۋپى بار. ازاماتتىق قورعانىس سالاسىنىڭ ماماندارى ەلوردا ماڭىنداعى تالاپكەر مەن يلينكا, كولۋتون وزەنىن بويلاي ورنالاسقان ەلدى مەكەندەرگە الاڭداۋشىلىق ءبىلدىرىپ وتىر.
– اتباسارعا كەلەر بولساق, مۇندا جاعداي تۇراقتى. ماماندارىمىز وزەن اڭعارىن تۇراقتى باقىلاۋعا العان. زەرەندى اۋدانىنىڭ ورمان قويناۋىنداعى قار مولشەرىن ەسكەرسەك, جاباي وزەنىندەگى سۋ دەڭگەيى شەكتى كورسەتكىشىنە جەتۋى ىقتيمال. الايدا, ءبىز قالادا ءتيىستى كۇش پەن تەحنيكانى شوعىرلاندىردىق. بۇل سۋ باسۋ قاۋپىنە قارسى جەدەل ارەكەت ەتۋگە مۇمكىندىك بەرەدى, - دەيدى ىشكى ىستەر ءمينيسترىنىڭ ورىنباسارى يۋري يلين.
اتباساردا سۋ باسۋ قاۋپى بار اۋماقتا ءالى دە 450 وتباسى قونىستانعان. وبلىس باسشىلىعى ولاردى قاۋىپسىز اۋماققا كوشىرۋ ءۇشىن 500 پاتەرلى 5 تۇرعىن ءۇي قۇرىلىسىنىڭ جوبالىق-سمەتالىق قۇجاتتاماسىن ازىرلەگەن. اۋدان ورتالىعىندا توتەنشە جاعداي بولىمدەرى مەن ارنايى تەحنيكا شوعىرلاندى. ولار الەۋمەتتىك ماڭىزى بار نىسانداردى قورعاۋ جۇمىستارىن اتقارۋدا.
– كوكتەمگى سۋ تاسقىنىنا قارسى كەڭ كولەمدى جۇمىس اتقارىلدى. ارنايى شتاب وڭىردەگى جاعدايدى تاۋلىك بويى باقىلاۋدا ۇستاپ وتىر. وزەن جاعالاۋلارىن بەكىتۋ ماقساتىندا 50 شاقىرىمنان استام قۇم بوگەت توسەلدى. ينەرتتى زاتتار تولتىرىلعان قاپتار ازىرلەندى, - دەيدى اقمولا وبلىسىنىڭ اكىمى ەرمەك مارجىقپاەۆ.
ماماندار سۋ باسۋ قاۋپى بار اۋماقتا ورنالاسقان ءۇش مەكتەپتى قۇم تولتىرىلعان 24 مىڭ قاپپەن قورشاپ تاستادى.
وڭىردە كارانتين شارالارى دا قاتاڭ ساقتالۋدا. «اتباسار – شۋيسكوە» باعىتىنداعى باقىلاۋ بەكەتىنەن تاۋلىگىنە 150-200-گە تارتا كولىك وتەدى. قالادا بارلىعى 6 بەكەت ورناتىلعان. ماماندار ءار 8 ساعات سايىن 3 اۋىسىممەن باقىلاۋ جۇرگىزۋدە. قازىر اتباساردا 38 ادام كارانتينگە الىنعان.
ساندىقتاۋ, زەرەندى اۋداندارىندا دا سۋ باسۋ قاۋپى ءالى دە بار. بۇل وڭىرلەردەگى ورمان ىشىندەگى قار ەري قويعان جوق.
