شىنىندا دا تۇڭعىش پرەزيدەنت ەلىمىزدىڭ قاي قيىن-قىستاۋ كەزەڭى بولسىن حالىقپەن بىرگە بولىپ, تاۋەلسىزدىك العان جىلداردان باستاپ جاس رەسپۋبليكانىڭ تىعىرىقتان جول تاۋىپ, جەڭىسپەن وتۋىنە مۇرىندىق بولعانى بەلگىلى. «قازاقستان رەسپۋبليكاسىنىڭ ەڭ قىمبات قازىناسى – ادام جانە ونىڭ ءومىرى» دەگەن اتا زاڭ قاعيداسىنا سۇيەنىپ, ەلباسى كەزىندە ءوزى دەنساۋلىق ساقتاۋ سالاسىن دامىتۋعا ەرەكشە كوڭىل ءبولۋ ارقىلى سالىنعان زاماناۋي اۋرۋحانالار مەن ەمحانالار, وندا ىستەيتىن مامان دارىگەرلەردىڭ بۇل جۇقپالى دەرتتى جويۋدا تولىق مۇمكىندىگى بار ەكەنىنە سەنىمدى.
ەڭ باستىسى, بۇل قاتەردى جەڭىپ شىعۋدا ماقالادا ەل بىرلىگى, ىنتىماعى, ەجەلدەن كەلە جاتقان قازاق ەلىنىڭ تاريحي داۋىرلەر قويناۋىنان شىڭدالعان مىقتى رۋحىنا سۇيەنەدى. تاريحىمىزداعى تولە بي, ايتەكە بي, اباي سياقتى دانىشپان تۇلعالارىمىزدىڭ قاناتتى سوزدەرىن كەلتىرە وتىرىپ, قاشاندا نامىسىن بەرمەگەن, بىرلىگى بەكەم حالقىمىز ەل باسىنا تونگەن قاۋىپ-قاتەردەن امان-ەسەن شىعا الادى دەگەن سەنىمدە. اعا ۇرپاق پەن زيالى قاۋىم جانە جاستارعا قاعيدالى سوزدەرىن ارناي كەلە, اۆتور ۇرپاق پەن ءداستۇر ساباقتاستىعى بولعان جەردە عانا قيىندىقتاردى جەڭىپ, يگىلىك پەن ىزگىلىك قاتار وركەن جاياتىنىن ايتادى.
ماقالادا تاتۋ-ءتاتتى جانە كەلىسىمدە ءومىر ءسۇرىپ جاتقان ورتاق شاڭىراعىمىز قازاقستاننىڭ حالقى قانداي دا بولسىن جاھاندىق قاۋىپ-قاتەردى جەڭىپ شىعاتىنىمىزدىڭ كەپىلى ەكەندىگى كورسەتىلگەن.
ەجەلگى تۇركى بابالارىمىز «كۇندىز وتىرمادىم, تۇندە ۇيىقتامادىم, قارا تەرىمدى اعىزدىم...» دەپ ايتقانداي, تاۋەلسىز مەملەكەتتىڭ اياقتان تۇرىپ كەتۋىنە ايانباي تەر توككەن ەلباسى بۇگىندە اۋىرتپاشىلىقتى حالقىمەن بىرگە كوتەرىپ, ماڭگىلىك ەلدىڭ قاۋىپسىزدىگىن قورعاۋدا بەلىن بەكەم بۋىپ ساپقا تۇرعانىن ەلگە جەتكىزىپ وتىر.
ساتاي سىزدىقوۆ,
قحا عىلىمي-ساراپشىلىق كەڭەسىنىڭ مۇشەسى,
ل.ن.گۋميلەۆ اتىنداعى ەۇۋ پروفەسسورى
