جاسالعان تالداۋلار ولاردىڭ دەنى بۇرىنعى اسكەر قىزمەتشىلەر مەن العاشقى اسكەري دايىندىق ءپانىنىڭ مۇعالىمدەرى ەكەنىن كورسەتەدى.
اقتوبە وبلىسى اكىمىنىڭ قاۋىپسىزدىك پەن قورعانىس جانە اسكەري قىزمەت جونىندەگى كەڭەسشىسى ادىلبەك قۇلتاەۆتىڭ مالىمدەۋىنشە, وڭىردە 300-گە جۋىق ادام اسكەري جيىنعا قاتىسۋعا تىلەك بىلدىرگەن.
وتكەن سەنبىدە اقتوبە قالاسىندا ارنايى قابىلداۋ ءراسىمى وتكىزىلىپ, ونىڭ قاتارىنا وبلىس اكىمىنىڭ قاۋلىسىنا سايكەس سايدىڭ تاسىنداي 100 جىگىت ىرىكتەلىپ الىندى. قالعاندارى رەزەرۆتە بولا تۇرماق.
– ەلدىڭ جاستارى پارىز بەن بورىش ۇدەسىنەن كورىنە الا ما؟ بۇعان جايشىلىق ۋاقىتتا كوزىمىز ايقىن جەتە بەرمەيتىن. ايتسە دە ءدال سولاي بولاتىنىنا ۇلكەن سەنىم ارتاتىنبىز. مىنە, سول سەنىمىمىز الداماپتى. بۇعان اسكەري جيىنعا قاتىسۋعا ءوز ەرىكتەرى بويىنشا تىلەك بىلدىرگەن جۇزدەگەن اقتوبەلىكتىڭ جۇرەك قالاۋى دالەل. ولاردى ەلىمىزدىڭ شىن ماعىناسىنداعى ادال ۇلدارى مەن جاناشىرلارى دەپ ەسەپتەۋىمىز كەرەك, دەدى ارنايى قابىلداۋ ءراسىمى كەزىندە اقتوبە وبلىسىنىڭ اكىمى وڭداسىن ورازالين.
كوپ بالالى اكە سەرىك سىراج ءوز شەشىمىن ازاماتتىق بورىشى دەپ ەسەپتەيتىنىن ايتىپ بەردى. ول اسكەري جيىنعا قاتىسقانى ءۇشىن مەملەكەتتەن تولەنەتىن قاراجاتتى قايىرىمدىلىق قورىنا اۋدارعاندى ءجون كورىپتى. ارناۋلى اسكەري جيىن قاتارىنا قابىلدانعاندار اسكەري قورعانىس بريگادالارى مەن پوليتسيا جانە توتەنشە جاعداي قۇرىلىمدارى قۇرامىندا زارارسىزداندىرۋ جۇمىستارىن جۇرگىزۋگە, قوعامدىق ءتارتىپتى باقىلاۋعا جانە كۇشەيتىلگەن كارانتين تالاپتارىنان تۋىندايتىن وزگە دە مىندەتتەر مەن تالاپتاردى ورىنداۋعا كىرىسىپ تە كەتتى.
اقتوبە
