قازىر وتان الدىنداعى بورىنىش وتەۋگە نيەت بىلدىرۋشىلەر سانى كوبەيىپ كەلەدى. ال جاۋاپتى ىسكە بەل بۋعان ەرلەردىڭ قاتارىندا قاراساي اۋدانىنىڭ ازاماتارى العاشقى بولىپ اسكەري جيىنعا قوسىلدى. اۋدان بويىنشا بورىش اتقارۋعا ىنتا بىلدىرگەن ەكى جۇزگە جۋىق ازاماتتىڭ جەتپىس سەگىزى دارىگەرلەردىڭ تەكسەرۋىنەن سۇرىنبەي ءوتىپ, قىزمەت ەتۋگە قابىلداندى. ەرىكتىلەر اۋداندىق اسكەري قورعانىس ىستەرى جونىندەگى ءبولىمنىڭ قاراۋىنا ءوتىپ, قاسكەلەڭ قالاسىنداعى №1 بالالار مەن جاسوسپىرىمدەر سپورت مەكتەبىندە ارنايى دايىندىقتان وتۋدە. ولار ەندى كازارمالىق جاعدايدا 10 كۇننەن 3 ايعا دەيىن مەرزىمدە تۇراقتايدى. اسكەريلەر بۇدان ءارى سانيتارلىق بەكەتتەردەگى كۇزەتتە كەزەكشىلىك اتقارىپ, ىندەت وشاعى مەن قوعامدىق ورىنداردى, اۋىل-اۋماقتاعى مەكەمە, نىسانداردى زارارسىزداندىرىپ, دارىلەۋ جۇمىستارىنا تارتىلادى.
ولاردىڭ العاشقى لەگى «اسىل ارمان» تۇرعىن ءۇي كەشەنىندەگى كۇزەت پەن تۇرعىنداردى قاجەتتى زاتتارمەن قامتيتىن جەدەل توپتاردىڭ قۇرامىندا جۇمىسىن باستاپ تا كەتكەن ەكەن. قاراساي اۋدانىنداعى «اسىل ارمان» تۇرعىن ءۇي كەشەنى ىندەت تارالۋىنا بايلانىستى تولىقتاي وقشاۋلانىپ, كارانتينگە جابىلعان بولاتىن. بۇعان دەيىن بۇل اۋماقتان ەكى ادامنان كوروناۆيرۋس ينفەكتسياسى انىقتالعان ەدى.
الماتى وبلىسى
