قازاقستاننىڭ شاحماتشى قىزدارى اراسىندا ەڭ ۇزدىك ناتيجە 23 جاستاعى دينارا سادۋاقاسوۆاعا تيەسىلى. قورجىنىندا 2500 ۇپايى بار ارۋىمىز فيدە رەيتينگىندە 12-ورىندى ولجالاۋدا. كەزىندە 14, 17, 18 جانە 20 جاستاعىلار اراسىندا الەم چەمپيونى اتانعان ول بىلتىر جازدا جەرلەستەرىمىزدىڭ اراسىنان العاشقى بولىپ ايەلدەردىڭ ازيا بىرىنشىلىگىندە توپ جاردى. دينارانىڭ باسقا دا تولىپ جاتقان اتاقتارى تاعى بار.
20 جاستاعى جانسايا ابدىمالىكتىڭ دە ءجۇرىپ وتكەن جولى بارشا قازاقستاندىق جانكۇيەرلەردىڭ كوز الدىندا. بالاۋسا شاعىنان-اق دارا تالانتىمەن وقشاۋلانعان ول كوپتەگەن بيىك بەلەستەردى باعىندىردى. ءتۇرلى جاس ەرەكشەلىكتەرى بويىنشا وتكەن الەمدىك جانە قۇرلىقتىق دودالاردا باس جۇلدەنى ولجالاعان قانداسىمىز 2015 جىلى رەسەيدىڭ حانتى-مانسيسك قالاسىندا وتكەن 20 جاسقا دەيىنگى شاحماتشىلاردىڭ الەم بىرىنشىلىگىندە قولا مەدالدى يەلەنىپ, تورتكۇل دۇنيە جۇرتشىلىعىن تامساندىرعان بولاتىن. ول كەزدە جانسايا ءالى 15 جاسقا دا تولماعان ەدى. كەيىننەن دە ۇلكەن تابىستارعا قول جەتكىزگەن قازاق قىزى بۇل كۇندەرى الەمدىك رەيتينگتە 2778 ۇپايمەن 16-ورىنعا تابان تىرەدى. سونىمەن قاتار ابدىمالىكتىڭ 20 جاسقا دەيىنگى شاحماتشىلار اراسىندا الەمدىك رەيتينگتە كوش باستاپ تۇرعانىن دا ايتا كەتۋ ابزال.
مىنە, ەكى شاحماتشىمىزدىڭ بۇگىنگى تاڭداعى تابىسى بارشا قازاقستاندىقتاردى تامساندىرىپ وتىر. الداعى ۋاقىتتا وسى سۇلۋلارىمىز الەمدىك ءتاج ءۇشىن تالاسىپ جاتسا, ەش تاڭدانبايمىز. سونىمەن قاتار 16 جاسار ءبيبىسارا اساۋباەۆانىڭ دا الار اسۋلارى الدا دەگەن ويدامىز. قازىرگى كەزدە ول ۇزدىكتەر تىزىمىندە 100-ورىندى يەلەنۋدە.
ايەلدەردىڭ الەمدىك رەيتينگىنە كوز جۇگىرتسەك, بۇگىنگى تاڭدا حوۋ ينفانعا تەڭ كەلەر ەشكىم جوق. 26 جاستاعى قىتاي قىزى ايەلدەر اراسىندا ءتورت رەت (2010, 2011, 2013, 2016) الەم چەمپيونى اتانسا, كوماندالىق سايىستا ءۇش مارتە (2007, 2009, 2011) باس جۇلدەنى ولجالادى.
ەكىنشى ورىندا – حامپي كونەرۋ. 32 جاستاعى ءۇندىستان وكىلىنىڭ مىقتىلار ساناتىندا جۇرگەنىنە تالاي جىلدىڭ ءجۇزى بولدى. ال ءۇشىنشى ورىندى رەسەيلىك الەكساندرا گورياچكينا يەلەنۋدە. 21 جاستاعى ورىنبور ءوڭىرىنىڭ تۋماسى بىلتىر ۇمىتكەرلەر تۋرنيرىندە توپ جارىپ, تسزيۋي ۆەنتسزيۋنمەن الەم چەمپيونى اتاعى ءۇشىن تالاسۋ قۇقىعىنا يە بولعان ەدى. بىراق بۇل تارتىس قىتايلىق شاحماتشىنىڭ پايداسىنا شەشىلدى.
سونداي-اق «توپ-10» ويىنشىنىڭ قاتارىنا تسزيۋي ۆەنتسزيۋن (قىتاي), كاتەرينا لاگنو (رەسەي), ماريا مەن اننا مۋزىچۋك (ۋكراينا), نانا دزاگنيدزە (گرۋزيا), دونوۆاللي نارياو ء(ۇندىستان) جانە تان چجۋني (قىتاي) سىندى مىقتىلار ەندى.
بۇگىنگى تاڭدا «توپ-50» شاحماتشىنىڭ ساناتىندا قىتايدىڭ – 10, رەسەيدىڭ – 9, گرۋزيانىڭ – 5, ۋكراينانىڭ – 4, اقش-تىڭ – 3, ءۇندىستان, قازاقستان, فرانتسيا, پولشا, يسپانيانىڭ – 2, يران, گەرمانيا, شۆەتسيا, بولگاريا, تۇركيا, ازەربايجان, رۋمىنيا, موڭعوليا جانە بەلارۋستىڭ ءبىر-بىردەن وكىلى بار.
ەرلەردىڭ الەمدىك رەيتينگىندە رەسەي شاحماتشىلارىنىڭ قارقىنى وتە كۇشتى. قازىرگى كەزدە كورشىلەس مەملەكەتتىڭ 14 وكىلى «توپ-50» ويىنشىنىڭ ساناتىنا ەركىن ەنىپ وتىر. سونداي-اق اقش پەن قىتايدىڭ – 6, ءۇندىستاننىڭ – 3, ازەربايجان, ماجارستان, پولشا, يسپانيا, انگليانىڭ – 2, نورۆەگيا, فرانتسيا, ارمەنيا, نيدەرلاند, بولگاريا, يران, چەحيا, ۆەتنام, ۋكراينا, مىسىر جانە گرۋزيانىڭ ءبىر-ءبىر ورەنى ۇزدىكتەر تىزىمىندە بار.
سول ۇزدىكتەر اراسىندا 29 جاستاعى نورۆەگيالىق ماگنۋس كارلسەنگە تەڭ كەلەر ەشكىم جوق. ول بۇل كۇندەرى فيدە رەيتينگىندە جەكە-دارا كوش باستاپ تۇر. 2013 جىلى الەم چەمپيونى اتاعىن جەڭىپ العان سكانديناۆيانىڭ ساڭلاعى سول كەزدەن بەرى التىن ءتاجدى ەشكىمگە بەرگەن ەمەس.
ەكىنشى ورىندا – فابيانو كارۋانا. يتاليادا دۇنيەگە كەلىپ, كەيىننەن اقش-قا قونىس اۋدارعان 27 جاستاعى جىگىت 2018 جىلى ۇمىتكەرلەر تۋرنيرىندە توپ جارىپ, الەم چەمپيونى اتاعى ءۇشىن تالاسۋ قۇقىعىنا يە بولعان ەدى. الايدا شەشۋشى سىندا ول ماگنۋس كارلسەنگە ەسە جىبەردى.
ءۇشىنشى ورىنعا 27 جاستاعى قىتايلىق دين ليجەن جايعاسسا, يان نەپومنياششي (رەسەي), ماكسيم ۆاشە-لاگراۆ (فرانتسيا), الەكساندر گريششۋك (رەسەي), لەۆون ارونيان (ارمەنيا), ۋەسلي سو (اقش), تەيمۋر رادجابوۆ (ازەربايجان) جانە انيش گيري (نيدەرلاند) سىندى ساڭلاقتار وزىق وندىقتىڭ قاتارىندا.
قازاقستاننىڭ شاحماتشىلارى اراسىندا ەڭ ۇزدىك كورسەتكىش رينات جۇماباەۆقا تيەسىلى. 30 جاستاعى شىمكەنتتىك سپورتشى الەمدىك رەيتينگتە 90-ورىندى قاناعات تۇتىپ وتىر. وكىنىشكە قاراي, «ويلىلار ويىنىن» سەرىك ەتكەن وزگە ويىنشىلارىمىزدىڭ قارقىنى ازىرگە باسەڭ.
