Yessenov University قاشىقتان وقىتۋ تەحنولوگياسىن قولدانىپ ءبىلىم بەرۋدە ۇلكەن تاجىريبەسى بار. سوندىقتان 7807 ءبىلىم الۋشىعا قاشىقتان وقىتۋ تەحنولوگياسى ارقىلى ءبىلىم بەرۋ ساپاسىنىڭ جوعارى دەڭگەيدە بولۋىنا ءجىتى نازار اۋدارىپ وتىر.
قازىر زامانعا ساي بارلىق ەلەكتروندى كوممۋنيكاتسيالىق قۇرىلعىلاردا جانە ءموبيلدى پلاتفورمالاردا جۇمىس ىستەيتىن G Suite قۇرامىنداعى Meet by Google Hangouts قوسىمشاسىن ۋنيۆەرسيتەت ءبىلىم الۋشىلارى قاشىقتان ءبىلىم الۋدا وڭاي قولدانا الادى.
Yessenov University-دە قىتاي, يران, رەسەي, پاكىستان, ارمەنيا جانە ت.ب. ەلدەردەن كەلىپ ءبىلىم الىپ جاتقان 1668 شەتەل ازاماتىنا قاشىقتان ساپالى ءبىلىم الۋىنا بارلىق جاعداي جاسالۋدا. جاتاقحانالار شەتەلدەن كەلىپ ءبىلىم الىپ جاتقان جانە ەلىمىزدىڭ شالعاي اۋداندارىنان كەلگەن ءبىلىم الۋشىلار ءۇشىن جوعارى جىلدامدىقتاعى 100 مبيت/سەك كەڭ جولاقتى wi-fi ينتەرنەتىمەن قامتاماسىز ەتىلگەن.
Yessenov University ءبىلىم الۋشىلارعا وڭتايلى جاعداي جاساۋ ءۇشىن Meet by Google Hangouts قوسىمشاسىندا 184 ۆيرتۋالدى اۋديتوريا جاساقتالىپ, ۋنيۆەرسيتەتتىڭ 313 پروفەسسور-وقىتۋشىلار قۇرامى بەكىتىلگەن ساباق كەستەسىنە سايكەس on-line فورماتتا ءدارىس بەرۋدە.
ۋنيۆەرسيتەتتىڭ كىتاپحانا قورى «تسيفرلى قازاقستان» باعدارلاماسىنا سايكەس سكانەرلەۋ ارقىلى ەلەكتروندى تۇرگە اۋدارىلدى.
– ستۋدەنتتەر ەلەكتروندى كىتاپحاناعا ينتەرنەتكە قوسىلعان كەز كەلگەن كومپيۋتەر نە ءموبيلدى قۇرىلعى ارقىلى قول جەتكىزە الادى. قاجەتتى كىتاپتى تابۋ قيىندىق تۋعىزبايدى. ەلەكتروندى كىتاپحانانىڭ مىندەتتى ەلەمەنتتەرىنىڭ ءبىرى – ساتىلى ەلەكتروندى كاتالوگ, ول كىتاپتى قوسۋ نە جويۋ شارالارىنا بايلانىستى اۆتوماتتى تۇردە تولىقتىرىلادى جانە جاڭارتىلادى. سونىمەن قاتار ستۋدەنتتەرگە الەمگە ايگىلى Coursera, wizer سياقتى ەلەكتروندى قۇرالدارمەن تسيفرلى ءبىلىم بەرۋ كوزدەرى قولجەتىمدى. بارلىق پاندەر بويىنشا ۋنيۆەرسيتەتتەگى «Univer» وقۋ جۇيەسىنە وقىتۋشىلار تاراپىنان 1722 ەلەكتروندى وقىتۋ كەشەنى (قازاق, ورىس جانە اعىلشىن تىلدەرىندە) جۇكتەلىپ, ەلەكتروندى جۋرنالعا باعالار قويىلۋى قاراستىرىلعان, – دەيدى وقۋ ورنىنىڭ رەكتورى بەرىك احمەتوۆ.
ءبىلىم الۋشىلاردى google account جانە بەينە اۋتەنتيفيكاتسيالاۋ نەگىزىندە كەستەگە سايكەس ساباققا قاتىسۋلارى YU Monitoring center (مونيتورينگ ورتالىعى) ارقىلى جۇيەلى تۇردە تەكسەرىلۋدە. سونداي-اق ستۋدەنتتەر جازبا جۇمىستارىن تاپسىرۋ ءۇشىن وقىتۋشىلاردىڭ كورپوراتيۆتى پوشتالارىنا جۇمىستارىن جىبەرەدى. جازبا جۇمىستاردى ءبىلىم الۋشىنىڭ ءوزى ورىنداعانىن تەكسەرۋ تۋرالى ەرەجەگە سايكەس وقۋ ءۇردىسىنىڭ تيىمدىلىگىن ارتتىرۋ مەن ۇيىمداستىرۋدىڭ ساپاسىن كوتەرۋ ءۇشىن ءبىلىم الۋشىلاردىڭ جازبا جۇمىستاردى دەربەس ورىنداۋىن باقىلاۋ, سونداي-اق ءبىلىم الۋشىلاردىڭ وزىندىك ءتارتىپ دەڭگەيىن ارتتىرۋ جانە زياتكەرلىك مەنشىك قۇقىعىن ساقتاۋ ماقساتىندا «انتيپلاگيات» جۇيەسى قولدانىلادى. جازبا جۇمىسى قورعاۋعا جىبەرىلۋى ءۇشىن جۇمىسقا رۇقسات بەرۋدى قاراۋ كەزىندە جازبا جۇمىستىڭ تۇپنۇسقالىعى 80%-دان اسۋ قاجەت.
2017 جىلى ۋنيۆەرسيتەت بازاسىندا ارنايى تەلەستۋديا جاساقتالعان بولاتىن. ستۋديادا ۋنيۆەرسيتەتتىڭ ۇزدىك وقىتۋشىلارى بەينە لەكتسيالارىن دايارلاپ, ۋنيۆەرسيتەتتىڭ وقۋ پلاتفورماسىنا جۇكتەلەدى. بۇدان ەكى جىل بۇرىن ۋنيۆەرسيتەتتە ىسكە قوسىلعان وقۋ مودەلى ارقىلى ستۋدەنتتەر بەينە-لەكتسيالار بويىنشا ۇيىندە دايىندالىپ, ال ساباقتا تۇسىنبەگەن ماسەلەلەرى بويىنشا وقىتۋشىمەن پىكىر الماسادى.
اتالعان جوبا بويىنشا بيىلعى جىلى ۋنيۆەرسيتەت بازاسىندا VR زەرتحانالارى اشىلىپ, تەحنيكالىق باعىتتار بويىنشا ۆيرتۋالدى زەرتحانالار جاساقتالادى.
زاماناۋي ءبىلىم بەرۋ قۇرالدارىمەن جابدىقتالۋدىڭ پايداسى بولماسا زيانى جوق ەكەنىن اقتاۋداعى وقۋ ورنىندا دەر كەزىندە قولعا الىنعان شارالار ايقىنداي ءتۇستى.
ماڭعىستاۋ وبلىسى
