ايماقتار • 09 ءساۋىر، 2020

الماتىدا كوروناۆيرۋس جۇقتىرعاندارعا ارنالعان اۋرۋحانانىڭ قۇرىلىسى باستالدى

30 رەتكورسەتىلدى

الماتىدا كوروناۆيرۋس جۇقتىرعان ازاماتتارعا ارنالعان اۋرۋحانانىڭ قۇرىلىسى باستالدى. ايتۋلى جوبانى جۇزەگە اسىرۋ وسى سالادا مول تاجىريبەسى بار وتاندىق BI Group حولدينگىنە جۇكتەلدى.

كەشە BI Group حولدينگىنىڭ قىزمەتكەرلەرى قۇرىلىس ءجۇرىپ جاتقان جەرگە ءبىر توپ باق وكىلدەرىن اپارىپ، وزدەرىنىڭ جۇمىستارىمەن جان-جاقتى تانىستىردى. 1،9 گەكتاردى الىپ جاتقان اۋرۋحانا قازىرگى كەزدە 280 ادامعا ەسەپتەلىپ وتىر. ال قاجەتتىلىك تۋىنداعان جاعدايدا ونىڭ سىيىمدىلىعىن تەز ارادا ەكى ەسەگە دەيىن ارتتىرۋعا بولادى. بۇل مەديتسينالىق مەكەمەدە كارانتينگە ارنالعان، قارقىندى تەراپيا، جانساقتاۋ بولىمدەرى قاراستىرىلعان. ولاردىڭ جەكە بيوحيميالىق زەرتحانالارى، رەنتگەن بولىمدەرى جانە كومپيۋتەرلىك توموگرافياسى بولادى. پالاتالاردا تەرىس قىسىمدى قامتاماسىز ەتەتىن ارنايى جەلدەتكىش جۇيە ورناتىلادى. وسى ارقىلى مەديتسينا قىزمەتكەرلەرىنە تونەتىن قاۋىپتى ەداۋىر تومەندەتۋگە بولادى.

- كۇللى الەمدى كوروناۆيرۋس ىندەتى شارلاپ، حالىققا قاۋىپ ءتونىپ وتىرعان كەزدە BI Group حولدينگى وسىنداي يگى شارانى جۇزەگە اسىرۋدى قۇپ كوردى. بۇل رەتتە ءبىز پايدا كورۋدى ويلاپ وتىرعان جوقپىز. ەڭ باستىسى – حالىقتىڭ اماندىعى مەن ساۋلىعى. ودان قۇندى ەش نارسە جوق. وزىمىزگە قانداي جاۋاپكەرشىلىكتىڭ جۇكتەلگەنىن دە بارلىعىمىز انىق سەزىنىپ وتىرمىز. سوندىقتان دا قۇرىلىس جۇمىستارىن قارقىندى تۇردە باستاپ كەتتىك. بۇيىرتسا، 25 ساۋىرگە دەيىن بۇل نىسان بوي كوتەرەدى، - دەيدى BI Group AImaty كومپانياسىنىڭ ديرەكتورى ايدوس مۇقاتاەۆ.

قازىرگى كەزدە اۋرۋحانانىڭ قۇرىلىسىنا 250 ادام تارتىلىپ، ولار كۇندىز-ءتۇنى تاپجىلماي ەڭبەكتەنۋدە. سونىڭ ناتيجەسىندە قازۋ جۇمىستارى اياقتالىپ، ىرگەتاستاردى دا ورناتىپ ۇلگەرگەن ەكەن. تاعى ءبىر ايتا كەتەرلىك جايت، وزگە مەملەكەتتەرمەن سالىستىرعاندا، الماتى، نۇر-سۇلتان جانە شىمكەنت قالالارىندا سالىنىپ جاتقان اۋرۋحانالار ۇزاق مەرزىمگە ەسەپتەلىنىپ وتىر. ياعني، كوروناۆيرۋس ىندەتى سەيىلگەننەن كەيىن دە بۇل نىساندار ءتۇرلى باعىت بويىنشا جۇمىس ىستەي بەرەدى.   

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار