ايماقتار • 09 ءساۋىر، 2020

COVID-2019: شيەلىنىڭ كورسەتكىشى نەگە كوپ؟

2659 رەتكورسەتىلدى

باياعى «كەرقۇلا اتتى كەندەباي» ەرتەگىسى ەسىڭىزدە مە؟! وندا قاراتاۋدىڭ ويىندا تۋعان كەندەباي بالا  جىل ساناپ ەمەس، كۇن ساناپ ءوسىپ، باتىر بولىپ جەتىلىپ، كەرقۇلاسىنا ءمىنىپ، ەلدى بارشا مۇراتىنا جەتكىزەتىن ەدى عوي. ءدال قازىر سىر وڭىرىندە كۇن سايىن كوبەيىپ كەلە جاتقان كەسەل سول ەرتەگىنى تاعى ەسكە سالىپ وتىر. ەلدى قورعاعان باتىر ەسىمىنە كەسەلدى تەلىگەنىمىزدى وقىرمان كەشىرە جاتار...

وبلىستا العاشقى ۆيرۋس بەلگىسى 28 ناۋرىز كۇنى بايقالعان. ەرتەسى تاعى ىندەت جۇقتىرعان تاعى ءبىر ادام انىقتالدى. دەرتتىلەردىڭ سانى بەسەۋگە جەتكەندە وبلىس اكىمدىگى ىندەتتىڭ تارالىپ كەتپەۋى ءۇشىن شۇعىل شارالار لەگىن بەكىتىپ، ءبىراز شەكتەۋلەر ەنگىزىلدى. بىراق سول ەسكەرتۋلەردى ەلەمەگەندەردىڭ كەسىرىنەن ىندەت ءسات سايىن ىرگەسىن كەڭەيتىپ كەلەدى.

ءساۋىردىڭ جەتىسى كۇنى وبلىستىڭ باس سانيتاريالىق دارىگەرىنىڭ № 7 قاۋلىسى قابىلداندى. وسىعان دەيىنگى كارانتيندىك شارالار كۇشەيتىلىپ، كەيبىر شەكتەۋلەر تالابى قاتايا ءتۇستى. 

جاڭا قاۋلى بويىنشا تۇرعىندارعا كوشەدە توپتاسىپ جۇرۋگە تىيىم سالىنىپ وتىر. ءولىم-ءجىتىم جاعدايىندا جينالۋعا دا شەكتەۋ قويىلدى. جاسى 55-تەن اسقاندار ءۇي كارانتينىن قاتاڭ ساقتاۋى ءتيىس. ال تىرشىلىككە اسا قاجەتتى قىزمەتتەر مەن تەمىرجول، كەن سالاسىنداعى مامانداردىڭ جۇمىس ءتارتىبى جەرىگىلىكتى اتقارۋشى ورگان شەشىمىنە قاراي رەتتەلەدى.

وسىنىڭ ءبارى اۋرۋدىڭ تارالۋ اياسىن شەكتەپ، ادامداردى قاتەرلى ىندەتتەن امان الىپ قالۋ ءۇشىن جاسالىپ جاتقان امالدار. بىراق،  وتباسىلىق باسقوسۋلاردى توقتاتپاي، كەرىسىنشە ۇدەتە تۇسكەندەر كەزدەسىپ وتىر. مىسالى، وڭىردە بويىنان ەڭ العاش كوروناۆيرۋستىق ينفەكتسيا انىقتالعان ادام اۋلەتىندەگى 21 جانعا قاۋىپتى ىندەتتى جۇقتىرىپ ۇلگەرگەن. شيەلى اۋدانىنداعى 6 ناۋقاستىڭ دا ءبىر ءۇيدىڭ ادامدارى ەكەندىگى انىقتالىپ وتىر. تاياۋدا وسى اۋداننان تىركەلگەن 13 دەرەك تە تويعا بارىپ، اۋرۋ جۇقتىرعاندار. «نە بولار دەيسىڭ؟!» دەگەن نەمكەتتىلىكتەن اياعى وسىنداي جاعدايعا ۇشىراتىپ وتىر. 

– سوڭعى دەرەك بويىنشا قىزىلوردا قالاسىندا – 10، سىرداريا اۋدانىندا – 8، قارماقشىدا – 4، جاڭاقورعاندا – 16، ارالدا – 2، ال شيەلى اۋدانىندا 52 ناۋقاس تىركەلىپ تۇر. وسى اۋدانداعى ءبىر اۋىلدان 43 ناۋقاس شىقتى، – دەيدى وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ.

قازىرگى جاعداي ەشكىمگە وڭاي ءتيىپ وتىرعان جوق. ىندەت كەسىرىنەن اعايىننىڭ تويى تۇگىلى توپىراقتى ولىمىنە بارا الماي پۇشايمان بولىپ وتىرعاندار كوپ. ويتكەنى، تالاپ سونداي. ال ول ساقتالماسا ەپيدەميولوگيالىق احۋال ودان سايىن ءورشيتىنى انىق. قازىر قىزىلوردا ەلىمىز بويىنشا اۋرۋ سانى جونىنەن الدىڭعى ءۇش وبلىستىڭ قاتارىندا تۇر. كارانتيندىك تالاپقا ءجۇردىم-باردىم قارايتىن بولساق جاعداي بۇدان دا ۋشىعىپ كەتۋى مۇمكىن. كەندەباي-كەسەلدىڭ الدىن الۋدىڭ جالعىز امالى – تالاپقا باعىنىپ، ۇيدە وتىرۋ!

اباي بولايىق، امان بولايىق!

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار