ەلباسى • 08 ءساۋىر، 2020

ەلباسى زيالى قاۋىمعا، جاستارعا، كاسىپكەرلەرگە ۇندەۋ جاسادى

1208 رەتكورسەتىلدى

ەلباسى «Egemen Qazaqstan» گازەتىنىڭ بۇگىنگى سانىندا جاريالانعان ماقالاسىندا اعا ۇرپاق پەن زيالى قاۋىم وكىلدەرىنە، جاس ۇرپاققا جانە كاسىپكەرلەرگە ۇندەۋ جاسادى.

«مەن ءسوزىمدى الدىمەن اعا ۇرپاق پەن زيالى قاۋىم وكىلدەرىنە ارنايمىن: حالىقتى ىنتىماققا شاقىرىپ، جاقسىلىققا، ىزگى امالدار جاساۋعا، سالاماتتى ءومىر سالتىن ۇستانۋعا ۇندەڭىزدەر. «ىرىس الدى – ىنتىماق» ەكەنىن ۇمىتپاڭىزدار. جاستاردى ەڭبەككە، ءبىلىم الۋعا، قاتارىنىڭ الدى بولۋعا تاربيەلەڭىزدەر. ۇرپاق الدىنداعى جاۋاپكەرشىلىك ءبىزدى وسىعان مىندەتتەيدى»،- دەدى نۇرسۇلتان نازارباەۆ.

ەلباسى جاستاردى جات ادەتتەن ساقتانىپ، يگى ىستەر جاساۋعا ۇمتىلۋعا شاقىردى. 

«جاڭا وسكىن – جاس ۇرپاققا ايتارىم: تاۋەلسىزدىك جىلدارى دۇنيەگە كەلگەن سەندەر كەلەر جىلى وردا بۇزار وتىزعا تولاسىڭدار. ەلىمىزدەگى ەڭ قۋاتتى كۇش – وزدەرىڭسىڭدەر. اعا ۇرپاق سەندەر ءۇشىن قولدان كەلگەننىڭ ءبارىن جاسادى، ەندى سەندەردىڭ دە كۇش-قايرات جۇمسايتىن كەزدەرىڭ كەلدى. جاماندىقتان، جات ادەتتەن ساقتانىپ، يگى ىستەر جاساۋعا ۇمتىلىڭدار. ۇلكەنگە – ىزەتتى،  كىشىگە  – قامقور، ءبىر-بىرىڭە دوس بولىڭدار. ء«بىرىڭدى قازاق ءبىرىڭ دوس، كورمەسەڭ – ءىستىڭ ءبارى بوس» دەگەن اباي اتالارىڭنىڭ وسيەتىن ەشقاشان ەستەن شىعارماڭدار» دەلىنگەن ماقالادا.

ەلىمىزدىڭ تۇڭعىش پرەزيدەنتى وتانداستارىنا قول ۇشىن بەرىپ، قارجىلاي، زاتتاي كومەكتەسىپ جاتقان كاسىپكەرلەردى ەرەكشە اتاپ ءوتتى.

«كاسىپكەرلەرگە دە ارنايى ايتارىم بار: سىزدەر تاۋەلسىزدىكتىڭ ارقاسىندا ءوز ىستەرىڭىزدى قالىپتاستىرىپ، اياقتارىڭىزعا نىق تۇردىڭىزدار، مول داۋلەتكە كەنەلدىڭىزدەر. ەندى «مەن ەلىمە نە بەرەمىن؟» دەيتىن كەزدەرىڭىز دە كەلدى. وسى ورايدا، مەنىڭ ءوتىنىشىم بويىنشا ءوز وتانداستارىنا قول ۇشىن بەرىپ، قارجىلاي، زاتتاي كومەكتەسىپ جاتقان كاسىپكەر ازاماتتار بارشىلىق. وسى ءبىر جاراسىمدى ءۇردىس، يگى ءىس ودان ءارى جالعاسىن تابادى دەپ سەنەمىن. ۇرپاق پەن ءداستۇر ساباقتاستىعى بولعان جەردە عانا يگىلىك پەن ىزگىلىك قاتار وركەن جايادى. وسى قاسيەتتى قاعيدا ءاربىر قازاقستاندىقتىڭ جادىنان، جۇرەگىنەن ورىن الۋى كەرەك» دەپ جازدى ەلباسى.

سوڭعى جاڭالىقتار

ۇقساس جاڭالىقتار