سپورت • 06 ءساۋىر، 2020

حوككەيشى گوردي حوۋدىڭ كارەراسىن اياقتاعانىنا – 40 جىل

14 رەتكورسەتىلدى

وسىدان تۋرا 40 جىل بۇرىن، ياعني 1980 جىلدىڭ 6 ساۋىرىندە كانادانىڭ داڭقتى حوككەيشىسى گوردي حوۋ ءوزىنىڭ سوڭعى ماتچىن وتكىزدى. «دەترويتقا» قارسى كەزدەسۋدە «حارتفوردتىڭ» ساپىنداعى ايتۋلى ويىنشى گول سوققانىمەن، ماتچ 5:3 ەسەبىمەن قارسىلاس كوماندانىڭ پايداسىنا شەشىلدى. 

گوردي حوۋعا كوپتەگەن رەكوردتىق كورسەتكىشتەر تيەسىلى. حوككەيشى رەتىندە ول تابانى كۇرەكتەي 35 جىل ونەر كورسەتتى. 1946-1980 جىلدارى ارالىعىندا ۇلتتىق حوككەي ليگاسىندا (ۇحل) وينادى. سول ارالىقتا 1850 رەت مۇز ايدىنىنا شىعىپ، 869 رەت قارسىلاستار قاقپاسىن ءدال كوزدەدى. ول كەزدە بۇل رەكوردتىق ناتيجە ەدى. كەيىننەن گول سوعۋ جانە ناتيجەلى پاس بەرۋ جاعىنان ۋەين گرەتتسكي ارداگەردىڭ الدىن وراپ كەتتى. ەسەسىنە حوۋدىڭ باسقا رەكوردتىق كورسەتكىشتەرى ءالى دە ساقتالۋدا.

كانادانىڭ ساسكاچەۆان قالاسىنىڭ تۋماسى ستەنلي كۋبوگىن ءتورت رەت يەلەندى. تۇراقتى بىرىنشىلىكتە ەڭ كوپ ۇپاي جيعان ويىنشى رەتىندە «ارت روسس تروفي» سىيلىعىن التى رەت ەنشىلەدى. ۇحل-نىڭ «جۇلدىزدار ماتچىندا» باقانداي 23 مارتە ونەر كورسەتتى. ونىڭ ەسىمى حوككەيشىلەردىڭ داڭق زالىنا ەنگەن. سول سەكىلدى گورديدىڭ باسقا دا قول جەتكىزگەن تابىستارى جەتەرلىك. تاعى ءبىر قىزىق دەرەك، ەگەر ءبىر ماتچ بارىسىندا ءبىر حوككەيشى گول سوعىپ، پاس بەرىپ جانە قارسىلاستار كومانداسىنىڭ ويىنشىسىمەن توبەلەسكەن جاعدايدا «گوردي حوۋدىڭ حەت-تريگى» دەگەن بەيرەسمي سىيلىقتى يەلەنەدى.

شاۋ تارتقان شاعىندا حوۋ تومەنگى ديۆيزيونداردا وينادى. سول جارىستاردا دا ول ءوزىن جاقسى قىرىنان كورسەتتى. ال سوڭعى رەت مۇز ايدىنىنا شىققاندا گوردي 52 جاستا ەدى. داڭقتى حوككەيشى 2016 جىلدىڭ جازىندا 89 جاسقا قاراعان شاعىندا قايتىس بولدى.  

سوڭعى جاڭالىقتار

ۇقساس جاڭالىقتار