ءوڭىر باسشىسى الدىمەن ديسپانسەردىڭ اۋلاسى مەن مۋزەيىن ارالاپ كوردى. اتقارىلعان جۇمىستارعا نازار اۋداردى. ۇجىممەن كەزدەسۋىندە كوروناۆيرۋسكە بايلانىستى قالىپتاسقان جاعداي تۋرالى باياندادى.
– وسىدان بىرەر كۇن بۇرىن مەملەكەت باسشىسى قاسىم-جومارت توقاەۆ پاندەميامەن كۇرەسكە تارتىلعانداردى قوسىمشا قولداۋ شارالارى تۋرالى مالىمدەمە جاسادى. بۇل جونىندە سىزدەرگە بەلگىلى, ولاردى دۇرىس جانە قاجەتتى شارالار دەپ سانايمىن. ءوز كەزەگىندە ءبىزدىڭ تاراپىمىزدان دا قولداۋ كورسەتىلۋدە. ينفەكتسيالىق بولىمشەنىڭ بارلىق قىزمەتكەرى 150 مىڭ تەڭگەنىڭ كولەمىندە سىياقى الدى. التى مەزگىل تەگىن تاماق ۇيىمداستىرىلعان, جۇمىس ىستەۋگە جانە تۇرۋعا قولايلى جاعدايلار تۋعىزىلۋدا. وبلىس بويىنشا كوروناۆيرۋس جۇقپاسىمەن كۇرەسۋ جانە ءبىزدىڭ تۇرعىنداردى قورعاۋ ءۇشىن قولدان كەلگەننىڭ ءبارى جاسالۋدا. مەنشىك تۇرىنە قاراماستان, بارلىق قۇرىلىمدار جۇمىسقا تارتىلعان. جەكەمەنشىك كاسىپورىندار ءبىزدىڭ ازاماتتار ءۇشىن ماسكالار تىگىپ, انتيسەپتيكتەر شىعارۋدا.
بۇگىنگى تاڭدا ءبىزدىڭ وبلىستا 638 ادام مەديتسينالىق باقىلاۋدا, ولاردىڭ 272-ءسى اۋرۋحاناعا جاتقىزىلعان. كوروناۆيرۋس جۇقپاسى 18 ادامدا انىقتالىپ وتىر. 16 سىرقات كوكشەتاۋ قالاسىنداعى وبلىستىق تۋبەركۋلەزگە قارسى ديسپانسەردىڭ ينفەكتسيالىق بولىمشەسىندە, 2 ادام نۇر-سۇلتان قالاسىنداعى فتيزيوپۋلمونولوگيا ورتالىعىندا ورنالاستىرىلعان. ءۇي كارانتينىندە – 366 ادام. جالپى, 1382 توسەك-ورىن دايىندالعان. ولاردىڭ 135-ءى ينفەكتسيالىق, 221-ءى پروۆيزورلىق جانە 570-ءى كارانتيندىك ماقساتتا. بۇگىنگى تاڭدا بارلىق بالا باقشالار مەن مەكتەپتەر جابىلدى. كوپتەگەن ۇيىمدار قاشىقتىقتان جۇمىس ىستەۋدە. تۇرعىندارمەن كارانتين كەزىندە كوروناۆيرۋستىڭ جاڭا وشاعىن تۋعىزباۋ ءۇشىن بارىنشا وقشاۋلانۋ جونىندە ءتۇسىندىرۋ جۇمىستارى جۇرگىزىلۋدە.
ديسپانسەردىڭ باس دارىگەرى قاسىمجان تاشمەتوۆ ءوز سوزىندە اتقارىلعان جۇمىستار جونىندە بايانداپ بەردى. بۇگىنگى تاڭدا اۋرۋحانادا 135 ادام ەمدەلۋدە. بىلتىر تۋبەركۋلەزبەن اۋىرعاندار سانى 12 پروتسەنتكە ازايدى. ۇنەمدەلگەن قارجى اۋرۋحانانىڭ ماتەريالدىق-تەحنيكالىق قاجەتتىلىگىنە جۇمسالادى.
وبلىس اكىمى كوروناۆيرۋس ىندەتىن ەمدەۋگە ارنالعان بولىمشەنىڭ جۇمىسىمەن تانىستى. مۇندا سىرقاتتار مەن ولاردى ەمدەپ جاتقان اق حالاتتى ابزال جاندار ءۇشىن بارلىق قاجەتتى جاعدايلار جاسالعان. ەرمەك مارجىقپاەۆ ونلاين رەجيمىندە كوروناۆيرۋس ىندەتىنە شالدىققان جانداردىڭ حال-جاعدايىن سۇراپ ءبىلدى.
