- كارانتيننىڭ كەسىرىنەن وقشاۋلانىپ قالعان شاكىرتتەرىم ءۇشىن WhatsApp جەلىسىندە ارنايى توپ قۇرىپ, ولكەتانۋ بايقاۋىن وتكىزۋدى ويلادىم. العاشقى ونلاين سايىس-ساباقتىڭ تاقىرىبىن «اۋلىمىزدىڭ ايتۋلى تۇلعالارى» دەپ اتادىم. سۇراقتار نەگىزىنەن ءوزىمىزدىڭ اتامەكەن اۋىلىنا, تايپاق وڭىرىنەن شىققان ايتۋلى تۇلعالار جايلى بولدى. بۇل مالىمەتتىڭ كوبى اۋلىمىزداعى «جەرۇيىق» مۇراجايىندا تۇرعان, وقۋشىلار بىلەتىن دەرەكتەر بولاتىن, - دەيدى جانىبەك.
ناۋرىزدىڭ 31-ءى كۇنى وتكەن «جەرۇيىق» ۇيىرمەسىنىڭ ونلاين-ساباعىنا اۋىل مەكتەبىنىڭ 40 وقۋشىسى قاتىسىپتى. بالالاردى قىزىقتىرۋ ءۇشىن جانىبەك ەڭ كوپ ۇپاي جيناعان 3 جۇلدەگەرگە ءوز قالتاسىنان اقشالاي بايگە تاعايىنداعان.
ساباقتىڭ اتى – «تۇلعالار»,
بىلگەن بالا جۇلدە الار!
تۇلعالاردى بىلمەگەن –
«ەدينيتسادان» قۇر قالار, – دەپ بايگەنى باستاپ كەتكەن اۋىل مۇعالىمى «وقۋشىلارىم ونلاين-ساباققا مۇنشالىق قىزىعۋشىلىقپەن قاتىسادى دەپ ءوزىم دە ويلامادىم» دەيدى. 45 مينۋتقا جوسپارلاعان سايىس ساعات جارىمعا سوزىلىپ, جۇلدەگەر انىقتالعان سوڭ دا قىزۋ تالقى بولىپتى. «كەلەسى سايىس قاشان, اعاي؟!» دەپ سۇراپ جۇرگەندەر كوپ.
ايتا كەتەيىك, جانىبەك ابىلپەيىسوۆ شاعىن اۋىلدا ءوز كۇشىمەن مۋزەي اشىپ, باتىردىڭ بەس قارۋىن جيناعان جىگىت. وقۋشىلارىمەن بىرىگىپ توقىعان بادانا كوز ساۋىتى بۇگىندە ءبىراز جەرگە ايگىلى. ولكەتانۋ باعىتىنداعى بىرنەشە كىتاپتىڭ اۆتورى تايپاق وڭىرىندەگى ەپيگرافيكالىق ەكسپەديتسيالارعا دا قاتىسىپ ءجۇر. 2018 جىلى جانىبەك ابىلپەيىسوۆ قازاقستان رەسپۋبليكاسىنىڭ مادەنيەت ءمينيسترى قول قويعان «ۇزدىك ولكەتانۋشى» توسبەلگىسىنە يە بولدى. وسىنىڭ ءبارى اۋىل ۇستازىنىڭ ىزدەنىمپاز ەڭبەكقورلىعىن كورسەتىپ تۇر.
بۇگىندە كارانتينگە, قاشىقتان وقىتۋعا بايلانىستى جانىبەكتى ەڭبەك دەمالىسىنا جىبەرىپتى. بىراق وقۋشىلاردىڭ سۇرانىسىمەن سايىس-ساباق جالعاسىپ جاتىر. «عيماراتى اپات جاعدايىندا تۇرعان شاعىن مەكتەپتە مەنىڭ ساباعىما كابينەت جەتپەي, وتكىزەتىن جەر تاپپاي قينالاتىن ەدىم. مىنا ونلاين-ساباق ماعان جاقسى بولدى» دەيدى ولكەتانۋشى ۇستاز.
https://drive.google.com/file/d/1cNIwmMim55SLOZHiZVxeCvC0jOs9yaeu/view
باتىس قازاقستان
