ايماقتار • 04 ءساۋىر، 2020

بقو: اكىم شەكاراداعى بلوك-بەكەتتى تەكسەردى

22 رەتكورسەتىلدى

باتىس قازاقستان وبلىسىنىڭ اكىمى عالي ەسقاليەۆ ءوڭىردىڭ اتىراۋ وبلىسىمەن شەكاراسىنداعى بلوك-پوستتاردىڭ جۇمىسىن تەكسەردى.

ناۋرىزدىڭ 31-ىنەن بەرى باتىس قازاقستان وبلىسىندا كۇشەيتىلگەن كارانتين رەجىمى ەنگىزىلگەن بولاتىن. بۇگىندە وبلىس ايماعىندا كارانتينگە بايلانىستى 90-عا جۋىق بلوك-پوست قويىلدى. بۇل بەكەتتەردىڭ التاۋى – اقجايىق اۋدانى اۋماعىندا.

ورال-اتىراۋ تاس جولىنىڭ بويىندا شابدارجاپ اۋىلىنىڭ تۇسىنداعى جانە جايىق وزەنىنىڭ سول جاق بەتىندە سارىتوعاي اۋىلىنىڭ تۇسىنداعى بەكەتتەر بۇگىندە سىرقات سانى 22-گە جەتكەن اتىراۋ وبلىسىمەن شەكاراعا قويىلعان. ايتا كەتەيىك، قازىر ورال قالاسىنداعى جۇقپالى اۋرۋلار اۋرۋحاناسىندا جاتقان قوس ناۋقاستىڭ ءبىرى قاۋىپتى ۆيرۋستى ءدال وسى اتىراۋعا بارعان ءىسساپارىندا جۇقتىرعانى انىقتالعان ەدى. بۇدان بولەك، چاپاەۆ اۋىلىنداعى قالقىمالى كوپىردە، اۋدان ورتالىعىنان قازتالوۆ پەن جاڭاقالا باعىتىنا شىعاتىن تاس جولدار تۇسىندا، العاباس اۋىلىنىڭ بۇرىلىسىندا دا بلوك-پوستتار تۇر.

و

بۇل بەكەتتەردىڭ ارقايسىسىندا 2 بريگادا اۋىسىممەن قىزمەت اتقارادى. اتىراۋ شەكاراسىندا 4 سانيتارلىق دارىگەر جانە 6 ميگراتسيالىق، ۋچاسكەلىك، پاترۋلدىك پوليتسيا ينسپەكتورلارى كەزەكشىلىكتە تۇر. بلوك-پوستتاعى قىزمەتكەرلەر پاترۋلدىك اۆتوكولىكپەن، قارۋ-جاراقپەن، بەتپەردەمەن، اۆتوكولىكتى تىركەۋگە ارنالعان جۋرنالمەن، انكەتا پاراقتارىمەن جانە باسقا دا قاجەتتى قۇرال-جابدىقتارىمەن (تەپلوۆيزەر، انتيسەپتيكتەرمەن) قامتىلعان. بەكەتتەردىڭ الدىندا ءتيىستى جول بەلگىلەرى قويىلعان.

وسى بەكەت ورناتىلعالى شابدارجاپ اۋىلى تۇسىنداعى بلوك-پوستتان بارلىعى 5176 اۆتوكولىك وتكەن ەكەن. ونىڭ 2733-ءى – جەڭىل كولىك، 95-ءى – جولاۋشى تاسىمالداۋشى، 2318-ءى – جۇك كولىگى. كولىكتەن بولەك 13845 ادام تەكسەرىستەن وتكەن. سوڭعى تاۋلىك ىشىندە ورال-اتىراۋ كۇرە جولىنداعى شابدارجاپ بەكەتىنەن 285 ماشينا وتكەن. ورتا ەسەپپەن العاندا اتالعان تاس جولدان 250-گە جۋىق اۆتوكولىك ءجۇرىپ وتەدى ەكەن.

- اقپاراتتىق جۇمىستاردىڭ ارقاسىندا ەكى وبلىس اراسىندا جەڭىل كولىك سانى ايتارلىقتاي ازايدى. بەكەتتەن وتكەن بارلىق ازاماتتىڭ قىزۋى تەكسەرىلىپ، ساۋالناما تولتىرىپ جاتىر، - دەيدى اقجايىق اۋداندىق پوليتسيا ءبولىمىنىڭ باستىعى ەرتاس بيسەنوۆ.

وبلىس اكىمى عالي ەسقاليەۆ تۇرعىندار تاراپىنان شەكاراداعى بەكەتتە كولىك كەپتەلىسى ءجيى بولادى دەگەن شاعىم تۇسكەنىن ايتتى. پوليتسيا قىزمەتكەرلەرىنىڭ ايتۋىنشا، كەپتەلىس اتىراۋ وبلىسىنداعى مۇناي كومپانيالارىندا اۋىسىممەن جۇمىس ىستەيتىن ادامداردىڭ توپ بولىپ كەلگەن كەزىندە بولعان ەكەن. ەكى وبلىس شەكاراسىنان وتەتىن ادامداردىڭ كوبى اقتوبە وبلىسىنىڭ تۇرعىندارى كورىنەدى.

- بارلىق تەكسەرۋدەن كەيىن ولاردى پاترۋلدىك اۆتوكولىكپەن وبلىس اۋماعىنان شىعارىپ سالامىز. بىزدە بەكەتتى اينالىپ ءوتۋ ارەكەتى دە انىقتالدى. بۇگىندە ءتارتىپ بۇزۋشى ۇستالىپ، حاتتاما تولتىردى. ال بەكەتتەن وتەر ساتىندە دەنە قىزۋى كوتەرىلگەن نەمەسە باسقا دا سىرقات بەلگىسى انىقتالعان تۇلعا بولسا، ءبىز شۇعىل تۇردە جەدەل جاردەم شاقىرامىز، - دەيدى پوليتسيا قىزمەتكەرلەرى.

كەزدەسۋ بارىسىندا ءوڭىر باسشىسى پوليتسيا جانە توتەنشا جاعداي قىزمەتكەرلەرى جۇرگىزىپ جاتقان جۇمىستىڭ ماڭىزدىلىعىنا توقتالىپ، تەكسەرۋ كەزىندە بارىنشا مۇقيات بولۋ قاجەتتىگىن ايتتى.

- ناقتى ساۋالناما جۇرگىزۋ، جازىلعان مالىمەتتەردىڭ تولىقتىعىن قاداعالاۋ ارقاسىندا وبلىس اۋماعىندا سىرقاتتانعانداردى انىقتاۋ جەڭىل بولادى. سونىڭ ناتيجەسىندە ءبىز اۋرۋ جۇقتىرعان ادامنىڭ وبلىسقا قايدان كەلگەنىن انىقتاپ، ونىمەن بايلانىستا بولعان ادامداردى تەز تابامىز. تۇرعىندارعا تۇسىندىرمە جۇمىسىن مۇقيات جۇرگىزىپ، ولاردىڭ ساۋالناما تولتىرۋ كەزىندە جەكە جاۋاپكەرشىلىگى تۋرالى ەسكەرتۋدىڭ ماڭىزى زور. مەن سىزدەردەن وبلىس تۇرعىندارىن كوروناۆيرۋس ىندەتىنەن قورعاۋ جولىندا شىدامدىلىق تانىتۋعا شاقىرامىن، - دەدى وبلىس اكىمى بلوكپوستاعى قىزمەتكەرلەر بريگاداسىنا.

 

سۋرەتتى تۇسىرگەن مەيىربەك تاجقۇران

 

باتىس قازاقستان

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار