ونەر • 04 ءساۋىر، 2020

«كارانتيندەگى جۇلدىز» جالعاسىن تابادى

36 رەتكورسەتىلدى

كارانتين كەزىندە مادەنيەت جانە سپورت مينيسترلىگى ەرەكشە بەلسەندى جۇمىس ىستەپ وتىرعانىن ايتاپ ايتقان ءجون. مينيستر اقتوتى رايىمقۇلوۆانىڭ سوزىنە سۇيەنسەك، ءبىر اپتانىڭ ىشىندە عانا مينيسترلىكتىڭ قولداۋىمەن 600-گە جۋىق ءىس-شارا ونلاين وتكىزىلگەن ەكەن. مينيستر بۇل جۇمىستىڭ الداعى ۋاقىتتا دا جالعاساتىنىن اتاپ ايتتى.

بۇل شاراعا ەلىمىزدەگى بارلىق تەاترلار، كىتاپحانالار، كونتسەرت زالدارى مەن وزگە دە ونەر وشاقتارى اتسالىسىپ وتىر. قۇرمانعازى اتىنداعى قازاق ۇلتتىق كونسەرۆاتورياسىنىڭ ۇجىمى ەرەكشە كوزگە ءتۇسىپ جۇرگەنىن اتاپ ايتقان ءجون. كونسەرۆاتوريا ۇستازدارى بىرىنەن ءبىرى جالعاپ، ءتۇرلى چەللەندج جاساپ قانا قويماي، تۇتاس ونلاين كونتسەرتتەر دە ۇيىمداستىردى. سونىڭ ىشىندە كۇنى كەشە تۋعانىنا 95 جىل تولعان كۇيشى، كومپوزيتور، ديريجەر، كسرو حالىق ءارتيسى، قازاقستاننىڭ حالىق قاھارمانى نۇرعيسا اتاباي ۇلى تىلەنديەۆتى ەسكە الۋ شارالارىنا ەرەكشە ورىن بەرىلدى. كونسەرۆاتوريا رەكتورى ارمان جۇدەباەۆ باستاعان ۇجىم نۇرعيسا تىلەنديەۆتىڭ شىعارمالارىن ويناپ، قۇرمانعازى وركەسترىنىڭ كونتسەرتىن كوپشىلىككە ۇسىندى.

وسى شارالاردىڭ ىشىندەگى كوپشىلىك كوڭىلىنەن شىعىپ، كورەرمەنىن باۋراعان جوبانىڭ ءبىرى – «كارانتيندەگى جۇلدىز». ەلىمىزگە بەلگىلى ونەر جۇلدىزدارىنىڭ ونلاين كونتسەرتىن مىڭداعان ادام تاماشالاپ، جىلى لەبىزدەرىن بىلدىرۋدە. ونەر جۇلدىزدارى ءان سالىپ، كۇي شەرتىپ قانا قويماي، كورەرمەندى مازالاعان ساۋالدارعا دا جاۋاپ بەرۋدە.

مادەنيەت جانە سپورت مينيسترلىگىنىڭ بۇل جوباسىنا «قازاقتەلەكوم» اق قولداۋ ءبىلدىردى. YouTube جەلىسىندەگى ونلاين كونتسەرت قر مادەنيەت جانە سپورت مينيسترلىگى مەن قازاقكونتسەرتتىڭ يۋتۋب پاراقشالارىندا جاريالانادى. ونلاين كونتسەرتتىڭ فورماتى ءارتۇرلى. وندا فولكلور دا، ەسترادا دا، كلاسسيكالىق جانە اسپاپتىق كونتسەرتتەر دە بار.

جوبانى العاشقى بولىپ جۇبانىش جەكسەن ۇلى باستادى. جۇبانىش ءانسامبلدىڭ سۇيەمەلدەۋىمەن عانا ەمەس، دومبىرامەن دە ءان سالدى. «وكىنبە سەن»، «مۇحيدا شايبان»، «نۇريكامال»، «ويلاماڭدار، جىگىتتەر» سىندى اندەردى شىرقاعان جۇبانىشتىڭ ونلاين كونتسەرتىن 55 مىڭعا جۋىق ادام تاماشالاپتى.

«كارانتيندەگى جۇلدىز» كونتسەرتىنە قازاقستاننىڭ حالىق ءارتىسى روزا رىمباەۆانىڭ ەرەكشە دايىندىقپەن كەلگەنىن اتاپ وتكەن ورىندى. كومپوزيتور ەركىن ىنتىباەۆ پەن ءوزىنىڭ ۇلى ءالي وقاپوۆتىڭ سۇيەمەلدەۋىمەن ەكى ساعاتقا جۋىق ءان سالعان روزا رىمباەۆانىڭ كونتسەرتىن ءبىر عانا يۋتۋب جەلىسىنەن 77 مىڭنان استام كورەرمەن تاماشالاپتى. كىلەڭ ليريكالىق، ماحاببات اندەرىن شىرقاعان روزا قۋانىشقىزى ابايدىڭ «ايتتىم سالەم، قالامقاس»، «كوزىمنىڭ قاراسى» اندەرىنەن تارتىپ، ءشامشى قالداياقوۆ، سەيدوللا بايتەرەكوۆتىڭ اندەرىن اۋەلەتتى. اراسىندا ادەمى اڭگىمەمەن تۇزدىقتاپ وتىردى.

قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ پەن احمەت جۇبانوۆ اتىنداعى دارىندى بالالارعا ارنالعان مۋزىكا مەكتەپ-ينتەرناتىنىڭ ديرەكتورى نۇركەن ءاشىروۆتىڭ كۇي تارتىسى ءبىراز جۇرتتىڭ ارقاسىن قوزدىرسا، ولارمەن بىرگە ونەر كورسەتكەن ءداستۇرلى ءانشى، دانەش راقىشەۆتىڭ شاكىرتى نۇرجان جانپەيىسوۆتىڭ اندەرى جۇرەك قىلىن شەرتىپ جاتتى.

ساكەن مايعازيەۆ، عادىلبەك جاناي، ايقىن تولەپبەرگەن، Ninety one توبى جالعاعان كونتسەرت الداعى ۋاقىتتا دا جالعاسىن تابا بەرمەك.    

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار