مەملەكەت باسشىسى ايتقان ء«بىز بىرگەمىز!» ءسوزىنىڭ استارىنداعى اتان تۇيەگە جۇك بولارلىق مول ماعىنا جالپاق جۇرتتىڭ بويىنداعى سەنىمدى نىعايتا تۇسۋدە. بەكەم بىرلىككە نە جەتسىن, شىركىن! وبلىس ورتالىعىنداعى «نوۆوپەك» كومپانياسىنىڭ ءدال وسى شاقتا شارۋاسىن ىڭعايلاپ, ءوز جۇمىسشىلارىمەن قوسا جۇمىسسىز قالعاندارعا دا قايىرىمى ءتيىپ جاتۋى جىلى سوزگە ابدەن لايىقتى ءىس. كاسىپورىن ءوندىرىس كولەمىن كەڭەيتۋ ارقىلى تاعى دا 100 ادامدى جۇمىسقا الماقشى.
ء–وز جۇمىسشىلارىمىزدىڭ ىشىندە باسپاناسىز جۇرگەندەردى جاڭا جاتاقحانامىزعا ورنالاستىرماقشىمىز. كاسىپورىننىڭ 500 جۇمىسشىسىنا ءسال دە بولسا دەمەۋ بولارلىق ازىق-ت ۇلىك كورزيناسى تابىس ەتىلدى. الداعى ۋاقىتتا جالاقىنى دا ءتاپ-ءتاۋىر كوبەيتپەكشىمىز,–دەيدى كومپانيانىڭ باس ديرەكتورى رۇستەم ۋسمانوۆ.
جاڭا جۇمىسقا ورنالاسقان تىگىن تسەحىنىڭ وپەراتورى الدىمەن تاجىريبەدەن وتكىزىلەدى. ءبىرىنشى ايدا وعان 60 مىڭ تەڭگە جالاقى تولەنەدى. ەكىنشى ايدا ىستەگەن جۇمىسىنا ەڭبەكاقىعا قوسىمشا 30 مىڭ تەڭگە تولەۋ قاراستىرعان. ءۇشىنشى ايدا ءوز تابىسىنا 15 مىڭ تەڭگە ۇستەمەلەنەدى. ودان ءارى اتقارعان جۇمىسىنا سايكەس جالاقى الادى. جالاقى مولشەرى 80 مىڭ تەڭگەدەن كەم ەمەس. مىنە, وسىلايشا ءاربىر ماماندىق بويىنشا ءوز تاپقان تابىسىنىڭ ۇستىنە ۇستەمەاقى تولەۋ كوزدەلىپ وتىر. ماسەلەن, تىگىنشىلەر العاشقى ايداعى ۇيرەنۋ كەزىندە 60 مىڭ تەڭگە ەڭبەكاقى الادى. ەكىنشى ايدان باستاپ اتقارعان جۇمىسىنا سايكەس جالاقى تولەنەدى. بۇل جەرگە ءتىپتى ماماندىعى جوق ادامدار دا جۇمىسقا ورنالاسا الادى. ولار قوسالقى جۇمىسشى رەتىندە. ەڭبەكاقىلارى دا ءتاپ-ءتاۋىر. 90 مىڭ تەڭگە شاماسىندا. كاسىپورىن اۋماعىندا قاۋىپسىزدىك شارالارى مۇقيات قولعا الىنعان.
كوكشەتاۋ قالاسى
