رۋحانيات • 02 ءساۋىر، 2020

ۇلانباتىردا شىڭعىس حان مۋزەيى بوي كوتەرەدى

121 رەتكورسەتىلدى

وتكەن جىلى 3 شىلدە كۇنى موڭعول ەلىنىڭ مادەنيەت ءمينيسترى قالا ورتالىعىنداعى بۇرىنعى «تابيعات ءھام تاريح» مۋزەيى قۇلاتالىپ، ونىڭ ورنىنا 9 قاباتتان تۇراتىن الەمگە ايگىلى «شىڭعىس حان» مۋزەيىن سالۋ جايلى شىعارعان ۇكىمەت شەشىمىن جاريالاعان بولاتىن.

مۋزەيدىڭ جالپى اۋماعى 15 مىڭ شارتى مەتردى قۇراسا، ونىڭ ەكسپوزياتسياسى موڭعول ۇستىرتىندە ءومىر سۇرگەن ەرتە داۋىردەگى ساق، عۇن تايپالارى، ءبىرىنشى ورتا عاسىرداعى كوك تۇركى قاعاناتى جايلى دەرەك بەرەتىن ارتەفاكتىلار، ارحەولوگيالىق قازبا مۇرالارى، ءار داۋىرگە ءتان قولدانبالى ونەر تۋىندىلارىنان باستاپ، شىڭعىس حان ءداۋىرىن قامتىماق. مۋزەيدىڭ قور جيىنتىعى جايلى ازىرگە مالىمەت جوق، دەسە دە بۇرىنعى قۇلاعان مۋزەيدىڭ 12 مىڭ جادىگەرى وسىندا اۋىساتىن كورىنەدى. بۇلار اينەكتىڭ استىندا جىلتىراپ جاتپايدى كوپشىلىككە ۆيرتۋالدى تاسىلمەن تانىستىرىلادى. بۇل ءىس مۋزەي ءىشىنىڭ 60 پايىز اۋماعىنا جوسپارلانىپ وتىر ەكەن.

بۇگىن ەلدىڭ باس ءمينيسترى ۋ.حۇرەلسۇحتىڭ قاتىسۋىمەن اتالمىش مادەني وشاقتىڭ العاشقى قازىعى قاعىلدى. ۇكىمەت باسىنىڭ ايتۋىنا قاراعاندا، مۋزەي موڭعول حالقىنىڭ ماقتانىشىنا اينالۋى ءتيىس ءارى ۇلى قاعان جايلى الەم جۇرتشىلىعىنا امبەباپ تۇسىنىك تۋعىزا الاتىنداي بولۋ كەرەك. ءتىپتى رەسەي فەدەراتسياسى ەرميتاجدا تۇرعان «شىڭعىس حاننىڭ تاسىن» وسىندا بەرمەكشى ەكەن. بۇدان باسقا شىڭعىس تۇقىمىنان تارايتىن اتى ءمالىم 37 حانعا ارنالعان كورمە-كەڭسە بولادى. مۋزەي سالۋعا كەتەتىن شىعىن – 53 ميلليارد توگروگ.

«قۇداي بۇيىرسا 2021 جىلدىڭ اياعىنا دەيىن الىپ مۋزەي پايدالانۋعا بەرىلمەك» دەيدى موڭعول ءباسپاسوزى.

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار