ەلىمىزدەگى توتەنشە جاعدايعا بايلانىستى مەكتەپ وقۋشىلارىنىڭ قاشىقتىقتان ءبىلىم الاتىندىعى ءاۋ باستان بەلگىلى بولىپ, 6-شى ساۋىرگە دەيىن دايىندىق جۇمىستارى جالعاسۋى ءتيىس-ءتى. ءۇشىنشى توقساننىڭ كانيكۋلى دا ءتامامدالىپ قالدى. وسى ورايدا, ءبىزدىڭ وبلىستىڭ جالپى ورتا ءبىلىم بەرەتىن مەكەمەلەرى قانشالىقتى دايىن؟ ينتەرنەت ۇستامايتىن شالعايداعى اۋىلدار قايتپەك؟ بۇل جايلى وبلىستىق ءبىلىم باسقارماسى باسشىسىنىڭ ورىنباسارى بوتاگوز بالاپايقىزى جان-جاقتى تاراتىپ, ايتىپ بەردى:
– بۇگىنگى كۇنى ءبىزدىڭ وبلىستا 556 جالپى ورتا ءبىلىم بەرەتىن مەكەمە بار. وندا 127 مىڭنان استام وقۋشى ءبىلىم الۋدا. 6 ساۋىردەن باستاپ بارلىق وقۋشىلار قاشىقتان وقىتۋ ءادىسى بويىنشا ءتورتىنشى توقساننىڭ ساباعىن باستاۋعا دايىندالىپ جاتىر. دەگەنمەن, وسى 556 مەكتەپتىڭ 187-ءسى بۇرىنعى ءداستۇرلى تۇردە وقىتىلاتىن بولدى. بۇلار – شاعىن جيناقتالعان مەكتەپتەر, ياعني وندا ءبىلىم الۋشىلار سانى 80 وقۋشىعا جەتپەيدى. ناقتىلاي تۇسسەك, بۇل باستاۋىش مەكتەپتەردە 3-4 وقۋشىسى بار, نەگىزگى مەكتەپتەردە 20-30 عانا وقۋشى ءبىلىم الاتىن جانە ورتا مەكتەپتەرىندە 50-60 وقۋشى وقيتىن ءبىلىم وردالارى. سونىمەن بىرگە اۋىل مەكتەبىندە ينتەرنەت بولعانىمەن, تۇرعىندارىندا ونلاين ساباققا شىعۋعا مۇمكىندىگى جوق شالعاي ەلدى مەكەندەردىڭ دە وقۋشىلارى اۋدان اكىمدەرى مەن ءبىلىم بولىمدەرى باسشىلارىنىڭ شەشىمىمەن ءداستۇرلى ساباق وتكىزەتىن بولدى, –دەدى.
وسىلايشا, بۇل 187 مەكتەپتەگى 10265 وقۋشى ءداستۇرلى تۇردە بۇرىنعى قالىپپەن ءبىلىم الۋدى جالعاستىرادى. ال, قالا, اۋدان ورتالىعى جانە سەلولىق وكرۋگتەر سەكىلدى وقۋشىلارى وتە كوپ مەكتەپتەر قاشىقتىقتان وقىتىلادى. وسى قاشىقتىقتان وقىتىلاتىن مەكتەپتەرگە ەلدى مەكەندەردەگى وقۋشىلار سانىنا قاراماستان, وبلىستىڭ ءتورت ۇلكەن اۋدانى كىرىپ وتىر. بۋراباي, ەرەيمەنتاۋ, زەرەندى, تسەلينوگراد اۋداندارىنىڭ بارلىق مەكتەپتەرى قاشىقتىقتان وقىتىلاتىن بولدى. تسەلينوگراد اۋدانى ايتپاسا بەلگىلى, نۇر-سۇلتان قالاسىنا وتە جاقىن ورنالاسقان جانە قازىرگى تاڭدا ىندەتتىڭ وشاعىنا اينالۋدا. بۋراباي اۋدانى – تراسسانىڭ ۇستىندە تۇرعان ۇلكەن اۋماق. زەرەندى اۋدانى – وبلىس ورتالىعىنا وتە جاقىن ورنالاسقان, ال, ەرەيمەنتاۋ نۇر-سۇلتان قالاسى مەن پاۆلودار وبلىسىنىڭ ورتاسىندا ورنالاسقان جول ۇستىندەگى اۋدان. وسىنداي سەبەپتەردىڭ سالدارىنان اۋدان اكىمدەرى مەن ءبىلىم ءبولىمىنىڭ باسشىلارى قاشىقتىقتان وقىتۋ كەرەك دەگەن شەشىم قابىلدادى.
دايىندىق جۇمىستارى جان-جاقتى جۇرگىزىلۋدە. رەسپۋبليكا بويىنشا بۇگىنگى كۇنى قاشىقتىقتان وقىتۋ ادىسىمەن دايىندىق ماقساتىنداعى ونلاين ساباقتار وتكىزىلۋدە. ەرتەڭگى كۇنى سىنىپ جەتەكشىلەر وقۋشىلارمەن ولاردىڭ اتا-انالارىنا ءتۇسىندىرۋ جۇمىستارىن جۇرگىزەدى. 3 ءساۋىر كۇنى سىنىپ ساعاتتارى وتەدى. بۇل اتا-انا, وقۋشى جانە مۇعالىم اراسىنداعى بايلانىستى ورناتۋعا ارنالعان ءىس-ارەكەتتەر. ناقتى ساباق 6-شى ساۋىردەن باستالادى. ونلاين ساباقتار ءار ءتۇرلى پلاتفورمالاردا وتكىزىلەدى. ونىڭ بارلىعى مەكتەپ وقۋشىلارىنا تۇسىندىرىلگەن. سونىمەن بىرگە, ۆاتتساپ, تەلەگرامم, مەسسەنجەرلەرى ارقىلى مۇعالىمدەر تاپسىرمالار بەرىپ, ونلاين ساباقتارىن جۇرگىزە الادى. بريفينگ بارىسىندا وبلىستا قاشىقتىقتان وقيتىن 1 مىڭعا جۋىق وقۋشىدا نوۋتبۋك, كومپيۋتەر سەكىلدى بايلانىسقا شىعاتىن قۇرالداردىڭ قاجەت ەكەندىگى ايتىلدى. بۇل ماسەلەنى ماماندار وبلىسىنىڭ ءبىلىم بەرۋ ۇيىمدارىنداعى, مەكتەپتەردەگى كومپيۋتەرلەردى وقۋشىلارعا ۋاقىتشا بەرە تۇرۋ نەگىزىندە شەشىپتى.
– مۇنداي ونلاين ساباقتار بۇرىن بولماعان, سوندىقتان اتا-انالاردى تۇسىنىستىكپەن قاراۋعا شاقىرامىز. وزدەرىڭىز بالالارىڭىزعا كومەك كورسەتە وتىرىپ, شىدامدىلىق تانىتۋلارىڭىز كەرەك. ءبىلىم جانە عىلىم ءمينيسترى اسحات ايماعامبەتوۆ وبلىستىق ءبىلىم باسشىلارىمەن اقىلداسا وتىرىپ, وسىنداي شەشىم شىعارىپ وتىر. حالىق اراسىندا وقۋشىلاردى قازىرگى ۋاقىتتا كانيكۋلعا جىبەرىپ, شىلدە-تامىز ايلارىندا ءتورتىنشى توقساندى وقىتادى دەگەن نەگىزسىز پىكىرلەر جايلى ءبىلىم بەرۋ سالاسى دە ايتىلدى. وزدەرىڭىز بىلەسىزدەر جازدا بالالار دەمالۋ كەرەك. سوندىقتان, وسى ءتورتىنشى توقساندى رەسپۋبليكا بويىنشا ونلاين تۇردە, قاشىقتان وقىتۋ ادىسىمەن وقىتقالى وتىرمىز. ساباق جوسپار بويىنشا 25 مامىردا اياقتالادى. ەگەر قوسىمشا وزگەرىستەر بولسا, حابارلايمىز –دەدى بوتاگوز دۇيسەنوۆا.
توتەنشە جاعدايعا بايلانىستى مەكتەپتەرگە ەنگىزىلگەن قاشىقتىقتان وقىتۋ ءادىسى كەزىندە وقۋشىلار مەن اتا-انالار بارلىق جاعدايعا تۇسىنىستىكپەن, شىدامدىلىقپەن, سابىرلىقپەن قاراۋلارى ءتيىس.
