وبلىس ورتالىعىن دەزينفەكتسيالاۋ جۇمىستارى وسىدان ءبىر اپتا بۇرىن باستالدى. وسى ۋاقىت ىشىندە نەبارى اينالدىرعان 8 كوشە مەن 40-تان استام ايالداماعا سانيتارلىق تازارتۋ جۇمىستارى جۇرگىزىلىپتى.
–7-ءشى كۇن بولدى. ديحلورينمەن تازارتۋ جۇرگىزىلۋدە. ايالدامالار, جول جيەگى, قوقىس جاشىگىنىڭ ماڭايى, ادامدار كوپ جينالاتىن قوعامدىق ورىندار دەزينفەكتسيالانىپ جاتىر, – دەيدى «تازالىق» كوممۋنالدىق كاسىپورنىنىڭ جۇمىسشىسى اناتولي ۆىحوۆسكي.
ورتالىق ساياباق, كوشەلەر, ويىن الاڭقايلارى, جاياۋ جۇرگىنشىلەر جولى مەن قوقىس جاشىكتەرىنىڭ توڭىرەگى دە باستى نازاردا. ال, بار قالانى قامتۋ وڭاي-وسپاق شارۋا ەمەس. كۇش جەتپەي مە, الدە ىنتا جوق پا؟ ايتپەسە, كوروناۆيرۋستىڭ قانشالىقتى قاۋىپتى دەرت ەكەندىگىن سانامىزعا سىڭىرە الماي وتىرمىز با؟!
– ءبىز ەكى ماشينانىڭ كولەمىن الامىز. 10 تەكشە مەتر سۋعا 2 قۇتى ەرىتىندى قوسامىز. ايالدامالارعا ايرىقشا نازار اۋدارىلىپ وتىر. قالا ىشىندە جولاۋشىلاردى تاسىمالداۋ ءالى توقتاتىلعان جوق. بۇل ءىس ءبىر-ەكى ادامنىڭ, ءبىر-ەكى تەحنيكانىڭ كۇشىمەن اقتارىلاتىن شارۋا ەمەس, – دەيدى قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ سەكتور مەڭگەرۋشىسى مارات ايجارىقوۆ.
وبلىس ورتالىعىن دەزينفەكتسيالاۋعا «تازالىق» كوممۋنالدىق كاسىپورنىنان ەكى تەحنيكا مەن ەكى جۇمىسشى جۇمىلدىرىلعان. بار بولعانى وسى.
