كوروناۆيرۋس • 02 ءساۋىر، 2020

كوكشەتاۋدا ءبىر ادامنىڭ كوروناۆيرۋس جۇقتىرعانى انىقتالدى

321 رەت كورسەتىلدى

كەشە كوكشەتاۋدا كوروناۆيرۋستىڭ العاشقى دەرەگى تىركەلدى. بۇل تۋرالى اقمولا وبلىستىق تاۋارلار مەن كورسەتىلەتىن قىزمەتتىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينا جانە وبلىستىق دەنساۋلىق ساقتاۋ باسقارماسىنىڭ باسشىسى سۇلەن ءىلياسوۆ وڭىرلىك كوممۋنيكاتسيالار قىزمەتىندە وتكەن بريفينگتە مالىمدەدى.

بريفينگتە ءسوز العان باسقارما باسشىسى سۇلەن ءىلياسوۆ بۇگىنگى تاڭدا ەلىمىزدە كوروناۆيرۋستىڭ 369 دەرەگى تىركەلگەنىن، ونىڭ ىشىندە 15 دەرەك ءبىزدىڭ وبلىسىمىزدا انىقتالعانىن ايتتى. كوروناۆيرۋس جۇقتىرعانداردىڭ سانى ەلىمىز بويىنشا كۇن ساناپ ۇلعايىپ كەلەدى. ماسەلەن، بۇگىنگى كۇننىڭ وزىندە وبلىستا كوروناۆيرۋستىڭ 5 جاڭا دەرەگى تىركەلگەن. ونىڭ تورتەۋى كوروناۆيرۋس جۇقپاسى لابوراتوريالىق راستالعان ناۋقاستارمەن بايلانىستا بولعاندار. ولار تەرى-ۆەنەرولوگيالىق ديسپانسەرىندەگى پروۆيزورلىق ستاتسيوناردا كارانتيندە بولعان ەكەن. ەكى ناۋقاس قوياندى اۋىلىنىڭ تۇرعىندارى،  1984 جىلى تۋعان ايەل ادام جانە 2017 جىلى تۋعان بالا. ودان كەيىن قوسشى اۋىلىنىڭ 1962 جانە 2011 جىلعى تۇرعىندارى.

ال، كوكشەتاۋدا كوروناۆيرۋس جۇقتىرعان ادام وبلىستىق كوپبەيىندى اۋرۋحانانىڭ سانيتارى بولىپ شىقتى. باسقارما باسشىسىنىڭ ايتۋىنشا، ناۋقاس ءوزىن جايسىز سەزىنگەندىكتەن، تەراپەۆتكە قارالۋعا ءوزى بارعان. كەشكە كەشكىسىن ودان ءتيىستى اناليزدەر الىنىپ، كوروناۆيرۋس جۇقپاسىن جۇقتىرعانى بۇگىن انىقتالعان.

ناۋقاس اقمولا وبلىستىق تۋبەركۋلەزگە قارسى كۇرەس ديسپانسەرىنىڭ جۇقپالى اۋرۋلار بولىمشەسىنە جاتقىزىلعان.  قازىرگى تاڭدا وبلىستىق اۋرۋحانادا كارانتين جاريالاندى دەدى سۇلەن ءىلياسوۆ. كوروناۆيرۋس جۇقتىرعان 1962 جىلى تۋعان ايەل اداممەن 35 ادام بايلانىستى بولدى دەگەن بولجام بار. ولاردىڭ بارلىعى دا قازىرگى تاڭدا وقشاۋلانعان. ونىڭ ىشىندە ناۋقاسپەن بىرگە تۇراتىن وتباسىنىڭ ءتورت مۇشەسى دە بار. بۇل ىسكە بايلانىستى ەپيدەميولوگيالىق تەكسەرىستەر جۇرگىزىلىپ، ناۋقاس جۇقپانى قانداي جاعدايدا جانە  قالاي جۇقتىرۋى مۇمكىن ەكەنى انىقتالىپ جاتىر.

بۇگىنگى تاڭدا وبلىس ستاتسيونارلارىندا 174 ناۋقاس جاتىر. جۇقپالى اۋرۋلار بولىمشەسىندە 13 ادام، نۇر-سۇلتان قالاسىنىڭ فتيزيوپۋلمونولوگيا بولىمشەسىندە 2، پروۆيزورلىق ستاتسيوناردا 94ادامەم قابىلداۋدا. تاعى 65 ادام كارانتيندىك ستاتسيونارلاردا باقىلاۋدا. 362 ادام ءۇي كارانتينىنە الىنعان.

بريفينگتە ءسوز العان اقمولا وبلىستىق تاۋارلار مەن كورسەتىلەتىن قىزمەتتىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينا قازىرگى تاڭدا وبلىسىمىزدا كوروناۆيرۋس جۇقتىرعان ناۋقاستارمەن بايلانىستى بولعان تۇلعالار انىقتالىپ، ولاردىڭ ءۇي-جايلارى، قوعامدىق ورىندار زالالسىزداندىرىلىپ جاتقانىن ايتتى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار