«زەكەت» قورىنىڭ دەمەۋىمەن ۇيىمداستىرىلعان قايىرىمدىلىق شارا بارىسىندا ەلوردانىڭ 500 وتباسىنا ازىق-ت ۇلىك تاراتىلادى. نۇر-سۇلتان قالاسىندا قۇرىلعان ارنايى شتاب كوكشەتاۋدان جونەلتىلگەن اماناتتى قابىلداپ الىپ, ۆولونتەرلار مۇقتاج وتباسىلارعا جەتكىزەتىن بولادى.
–وسى اكتسياعا تەك اقمولا وبلىسى عانا ەمەس, ءبىزدىڭ كورشىلەس سولتۇستىك قازاقستان, قوستاناي وبلىسى, اقتوبە, اتىراۋ, ورال جانە دە ماڭعىستاۋ وبلىستارىنىڭ ۇلەس قوسۋىمەن جاسالىپ جاتقان ءىس-شارا,–دەيدى ناۋان حازىرەت مەشىتىنىڭ باس يمامى قۋانىش ءسابيت.
«جاقسىلىق جاساساڭ كوبەيەدى» دەگەن بار. قوراپتاردا ۇن, قانت, سۇيىق ماي, تۇز, شاي سياقتى ەڭ قاجەتتى ازىق-ت ۇلىكتەر بار. ساۋاپتى ىسكە مەشىت جانىنان قۇرىلعان «اڭسار» ەرىكتىلەر ورتالىعىنىڭ مۇشەلەرى دە ات سالىستى.
–توتەنشە جاعدايعا بايلانىستى «جىلى جۇرەك» اتتى كەرۋەندە تاڭەرتەڭنەن كەشكە دەيىن حالىققا قىزمەت كورسەتۋ ءۇشىن, جاعدايى تومەن وتباسىلاردى دەمەۋ ءۇشىن جۇمىس ىستەپ جاتىرمىز. كەشەدەن باستاپ تۇنىمەن وسى قوراپتاردى ازىرلەدىك,–دەيدى «اڭسار» ۆولونتەرلار ورتالىعىنىڭ مۇشەسى داۋلەت ءتۇرالى.
ايتا كەتەيىك, «جىلى جۇرەك» كەرۋەنىنىڭ قايىرىمدىلىق شاراسى بارىسىندا ءوڭىردىڭ تۇرمىسى تومەن وتباسىلارىنا دا كومەك كورسەتىلدى.
