قازىرگى قيىن-قىستاۋ كەزەڭدە, الەمدى پاندەميا دەرتى جايلاعان تۇستا قازاقستان شەتەلدەگى وتانداستارىمىزدى ەلگە اكەلۋ ىسىنە ىجداعاتتىلىقپەن دەن قويىپ وتىر. اتالعان ماسەلەنى شەشۋگە بار كۇشىن جۇمىلدىرعان ءتيىستى ورىنداردىڭ, ونىڭ ىشىندە سىرتقى ىستەر مينيسترلىگى قىزمەتكەرلەرىنىڭ ەڭبەگى ەرەن. وسى ورايدا, ىندەتتىڭ جاپپاي تارالۋىنا بايلانىستى شەتەلدە قالىپ قويعان ازاماتتارىمىزدى ەلگە اكەلۋ جۇمىستارىنا شولۋ جاساۋدى ءجون كوردىك.
ەلشىلىكتەردىڭ ەڭبەگى ەرەكشە
جالپى, بۇگىنگە دەيىن مەملەكەتىمىزدىڭ تىكەلەي ارالاسۋىمەن ەلىمىزگە 7702 ازاماتىمىز ورالدى. سونداي-اق 754 وتانداسىمىز ەلىمىزگە قايتۋعا كومەكتەسۋگە ءوتىنىش بىلدىرگەن. سىرتقى ىستەر مينيسترلىگى كەلتىرگەن دەرەكتەرگە سۇيەنسەك, قازىرگى تاڭدا شەتەلدەردە 288 854 ازاماتىمىز تۇرادى. ولاردىڭ باسىم بولىگى ەلگە ورالۋدى كەيىنگە شەگەرۋدى ءجون كورگەن ەكەن. قازاقستاننىڭ ەلشىلىكتەرى ولارعا قاجەتتى كومەك كورسەتىپ وتىر.
كوروناۆيرۋستان تۋىنداعان قولايسىز جاعدايعا بايلانىستى تبيليسيدەن ەلىمىزدىڭ 143 ازاماتى ەلگە كەلدى. رەيس قازاقستاننىڭ گرۋزياداعى ەلشىلىگىنىڭ قولداۋىمەن ۇيىمداستىرىلدى.
جولاۋشىلاردى رەيسكە تىركەۋ جانە وتىرعىزۋ بارىسىندا ازاماتتارىمىز سابىرلىق ساقتاعانىن اتاپ وتكەن ءجون. كەدەندىك جانە شەكارالىق باقىلاۋ راسىمىنەن كەدەرگىسىز ءوتتى. جولاۋشىلار رەيستىڭ كەشىگۋىنە تۇسىنىستىكپەن قاراپ, چارتەرلىك رەيستىڭ ۇيىمداستىرىلعانى ءۇشىن العىس ءبىلدىردى.
28 ناۋرىزدا قازاقستاننىڭ ليتۆاداعى ەلشىلىگىنىڭ قولداۋىمەن ۆيلنيۋس, كاۋناس جانە كلايپەدا قالالارىندا وقيتىن قازاقستاندىق 15 ستۋدەنت اۋەلى مينسكىگە, سودان كەيىن نۇر-سۇلتان مەن الماتىعا كەلىپ جەتتى.
ايتا كەتۋ كەرەك, ناۋرىز ايىنىڭ ورتاسىنان باستاپ حالىقارالىق اۋە قاتىناستارى توقتاتىلعان-دى. سودان بەرى ەلشىلىكتىڭ قولداۋىمەن وسى ەلدە وقيتىن 50-دەن استام قازاقستاندىق ۇيلەرىنە امان-ەسەن ورالدى. ولاردىڭ اراسىندا ليتۆالىق جوعارى وقۋ ورىندارىندا ءبىلىم الىپ جۇرگەن قازاقستاندىق ستۋدەنتتەر, «بولاشاق» باعدارلاماسى بويىنشا تاعىلىمدامادان وتۋشىلەر بار.
سونداي-اق 28 ناۋرىزدا قازاقستاننىڭ 44 ازاماتى «Belavia» اۋەكومپانياسىنىڭ رەيسىمەن بارسەلونا اۋەجايىنان مينسك ارقىلى نۇر-سۇلتان مەن الماتىعا ۇشتى. ولاردىڭ كوپشىلىگى ستۋدەنت. اراسىندا كامەلەتتىك جاسقا تولماعاندار دا بار.
مۇنداي قادام مادريدتەگى قازاقستان ەلشىلىگى جانە بارسەلوناداعى كونسۋلدىق قىزمەتكەرلەرىنىڭ ءتيىمدى جۇمىسىنىڭ ناتيجەسىندە مۇمكىن بولدى. ەلشىلىك قىزمەتكەرلەرى يسپانياداعى ازاماتتارىمىزعا كۇندەلىكتى كومەك كورسەتۋدى جالعاستىرىپ جاتىر.
يسپانيادا پاندەميانىڭ جىلدام تارالۋىنا بايلانىستى جانە رەيستەردىڭ باسىم كوپشىلىگى توقتاتىلعاندىقتان, قازاقستاننىڭ يسپانياداعى ەلشىلىگى مادريدتەگى بەلارۋس ەلشىلىگى جانە «Belavia» اۋەكومپانياسىنىڭ باسشىلىعىمەن بارسەلونادان ۇشۋعا بيلەتتى ساتىپ العان بارلىق قازاقستاندىق جولاۋشىنى ەلگە اكەلۋ ءۇشىن اۋە كەمەسىن ۇلكەنىرەك تۇرىنە اۋىستىرۋعا كەلىستى.
بىرنەشە كۇن بويى قازاقستاندىق ديپلوماتتار وتانداستارىن ەلىنە ۇشۋدىڭ ناقتى جولدارى تۋرالى «قولما-قول» حاباردار ەتىپ, تەز ارادا بيلەتتەردى ساتىپ الۋدى, جاعدايدى بولجاۋ قيىن كەزدە ۇشۋدى كەشىكتىرمەۋ كەرەك ەكەنى تۋرالى اقپاراتتاندىرىپ, مۇمكىندىكتى پايدالانۋعا شاقىردى.
بۇگىنگى تاڭدا قازاقستاندىق ديپلوماتتاردىڭ كومەگىمەن 150-دەن استام قازاقستاندىق يسپانيادان ءتۇرلى رەيستەرمەن ەلگە جەتتى. يسپانياعا ەمدەلۋگە كەلگەن جانە كامەلەتكە تولماعان قازاقستان رەسپۋبليكاسىنىڭ ازاماتتارىنا ەرەكشە كوڭىل بولىنەدى.
چەحيا دا «قارت قۇرلىقتا» تاراعان ىندەتتەن جاپا شەكتى. وسىعان بايلانىستى اتالعان مەملەكەتتەگى قازاقستان ەلشىلىگى وتانداستارىمىزدى ەلگە جەتكىزۋ ماسەلەسىن باستى نازاردا ۇستاپ وتىر. ماسەلەن, ەلشى مارات ءتاجيننىڭ تاپسىرماسىمەن ديپلوماتتارىمىز وسى ەلدە پراگادان 120 شاقىرىمدا ورنالاسقان كىشىگىرىم بەحين قالاسىندا ورتا مەكتەپتە ءبىلىم الاتىن قازاقستاندىق بالالاردى ەۆاكۋاتسيالاۋدى جۇزەگە اسىردى. ەلشىلىك قىزمەتكەرلەرى باسقا قالالارداعى وتانداستارىمىزدى دا جيناپ, ەلگە جەتكىزۋمەن اينالىستى. ءوز كەزەگىندە, قازاقستانعا ورالعان ازاماتتار ەلشىگە جانە ديپلوماتيالىق ميسسيا وكىلدەرىنە زور العىسىن ءبىلدىردى.
بۇدان بولەك, قازاقستاندىق ديپلوماتتار بىرىككەن اراب امىرلىگىندەگى 800 قازاقستاندىققا ەلگە ورالۋعا كومەك كورسەتتى.
Covid-19 پاندەمياسى اياسىندا ءباا حالىقارالىق اۋە رەيستەرىنىڭ كوپشىلىگىن ۋاقىتشا توقتاتتى. سونداي-اق ەلدە دەزينفەكتسيالاۋ جونىندەگى ءىس-شارالارعا بايلانىستى اۆتوكولىك قوزعالىسى دا شەكتەلدى. سوعان بايلانىستى 20-28 ناۋرىز ارالىعىندا قازاقستاننىڭ ءباا-دەگى ەلشىلىگى, دۋبايداعى باس كونسۋلدىعى جانە امىرلىكتەردىڭ مەملەكەتتىك ورگاندارىنىڭ كومەگىمەن 801 وتانداسىمىز ەلگە جەتىپ الدى.
ازاماتتارىمىزدى شەتەلدەردەن قايتارۋ جونىندەگى شارالار اياسىندا قازاقستان رەسپۋبليكاسى قورعانىس مينيسترلىگى مەن سىرتقى ىستەر مينيسترلىگىنىڭ, سونداي-اق تاجىكستاننىڭ مەملەكەتتىك ورگاندارىنىڭ بىرلەسكەن كۇش-جىگەرىمەن 28 ناۋرىزدا وسى مەملەكەتتەن وتانداستارىمىز ەلگە جەتكىزىلدى.
قازاقستاننىڭ اسكەري-اۋە كۇشتەرىنىڭ اسكەري-كولىك اۆياتسياسىنىڭ قولداۋىمەن 24 ازامات ەلگە امان-ەسەن كەلىپ قوندى. بۇل ازاماتتار تاجىكستان اۋماعىندا بولعان جانە تاجىك بيلىگى قاتاڭ شەكتەۋ شارالارىن ەنگىزگەننەن كەيىن شىعا الماي قالعان ەدى. سونىمەن قاتار وسى بورت ارقىلى تاجىكستاننىڭ 23 ازاماتى ءوز وتانىنا ورالدى.
شۆەيتساريادا 16 ناۋرىزدان باستاپ توتەنشە جاعداي ەنگىزىلگەننەن بەرى وسى ەلدەگى ەلشىلىگىمىز 26 ازاماتىمىزدىڭ شۆەيتساريادان ماسكەۋ, ىستانبۇل جانە مينسك ارقىلى قازاقستانعا قايتۋىنا ىقپال ەتتى. ولاردىڭ ىشىندە 18 ستۋدەنت بار.
ايتسە دە قازاقستاندىقتاردىڭ كوپشىلىگى ۇشۋ كەزىندە اۋرۋ جۇقتىرۋ قاۋپىن ەسكەرىپ, شۆەيتساريادا قالۋ تۋرالى شەشىم قابىلدادى. ەلشىلىك قازاقستان ازاماتتارىمەن ۇنەمى بايلانىستا. ەلشىلىكتىڭ ۆەب-سايتى, الەۋمەتتىك جەلىلەر ارقىلى قازاقستان ازاماتتارى كوروناۆيرۋستىق پاندەميا كەزىندە قازاقستان مەن شۆەيتساريادا قابىلدانعان شارالار تۋرالى اقپاراتتى تۇراقتى تۇردە الىپ تۇرادى.
ديپلوماتتارىمىز فرانتسيادا قيىن جاعدايدا قالعان قازاقستاندىقتارعا دا قولداۋ كورسەتىپ وتىر. فرانتسيا COVID-19 كوروناۆيرۋسىن جۇقتىرعاندار سانى بويىنشا الەمدەگى ءبىرىنشى وندىققا كىرەدى. وتاندىق ديپلوماتتار ازاماتتارمەن تاۋلىك بويى بايلانىستا بولىپ, ەلگە ورالۋلارىنا جاردەمدەسىپ كەلەدى.
فرانتسياداعى قازاقستاندىقتار نەگىزىنەن جوعارى وقۋ ورىندارىنىڭ ستۋدەنتتەرى. سونىڭ ىشىندە «بولاشاق» جانە «اباي-ۆەرن» باعدارلامالارىمەن جانە جەكە باستامامەن وقىپ جۇرگەندەر, فرانتسۋز كومپانيالارى مەن حالىقارالىق ۇيىمداردىڭ قىزمەتكەرلەرى, جەرگىلىكتى ازاماتتار وتباسىلارىنىڭ مۇشەلەرى بار. پاريجدەن بولەك, وتانداستارىمىز ليون, ستراسبۋرگ, گرەنوبل, مونپەلە, ليلل جانە باسقا دا قالالاردا تۇرادى. ولارعا دا ەلشىلىك قىزمەتكەرلەرى قولداۋ كورسەتۋدە.
ەكى مەملەكەت اراسىنداعى تىكەلەي اۋە قاتىناسى توقتاتىلعاننان بەرى (6 ناۋرىزدان باستاپ) ەلشىلىك قازاقستانعا, نەگىزىنەن «بەلاۆيا» جانە «اەروفلوت» كومپانيالارىنىڭ رەيستەرىمەن 50-دەن استام وتانداسىمىزدىڭ جانە باسقا دا ەلدەردەن ترانزيتپەن كەلە جاتقان بىرقاتار قازاقستاندىقتىڭ ەلگە ورالۋىنا جاردەمدەستى.
فرانتسيا ۇكىمەتى 12 ناۋرىزدا تۇرعىنداردىڭ جۇرۋىنە قاتاڭ شەكتەۋلەر ەنگىزگەنىنەن كەيىن ەلشىلىك وتانداستاردىڭ سۇراقتارىنا دەر كەزىندە جاۋاپ بەرۋ ماقساتىندا تاۋلىك بويى ىستەيتىن «جەدەل جەلى» اشىپ, الەۋمەتتىك جەلىلەردە اقپاراتتىق جانە تۇسىندىرمە جۇمىسىن كۇشەيتتى.
وتانعا ورالۋ نەمەسە فرانتسياداعى قازىرگى تۇرىپ جاتقان ورنىندا وقشاۋلانۋ تۋرالى شەشىمدى ءاربىر قازاقستاندىق جەكە ءوزى قابىلدايدى. دەگەنمەن, ديپلوماتتار جەكە تاۋەكەلدەرىن سالماقتاۋعا شاقىرادى. ەلگە قايتۋ جونىندە شەشىم قابىلدانعان جاعدايدا ديپلوماتتار شۇعىل كومەك كورسەتۋدە.
ەلشىلىك قىزمەتكەرلەرى فرانتسياداعى وتانداستار «ساناعىن» جۇرگىزۋىن جالعاستىرىپ, ولاردا تۋىنداپ جاتقان ماسەلەلەردى زەردەلەۋدە. وسى ورايدا اتالعان مەملەكەتتە ۋاقىتشا نەمەسە تۇرعىلىقتى تۇرىپ جاتقان قازاقستاننىڭ بارلىق ازاماتىن كونسۋلدىق ەسەپكە تۇرۋعا شاقىرعان. بۇل حالىقارالىق قاعيدا ءبىرىنشى كەزەكتە توتەنشە جاعدايلاردا قاۋىپسىزدىك شارالارىن قامتاماسىز ەتۋگە باعىتتالعان.
كوروناۆيرۋستىق ينفەكتسيانىڭ جىلدام تاراۋىنا بايلانىستى ءبىزدىڭ ازاماتتارىمىزدى شەتەلدەردەن قايتارۋ جونىندەگى ءىس-شارالار اياسىندا 27 ناۋرىزدا ۋكراينادان قازاقستانعا 76 وتانداسىمىز ءساتتى ورالدى.
وسىنداي ناتيجەگە قول جەتكىزۋ ءۇشىن ەلشىلىكتىڭ ديپلوماتتارى اۋقىمدى جۇمىس اتقارىپ, سونىڭ ىشىندە قازاقستانعا قايتاتىن ازاماتتارىمىزدىڭ ءتىزىمىن ازىرلەپ, «كيەۆ – الماتى – كيەۆ» باعىتىندا چارتەرلىك رەيس ۇيىمداستىرۋ ءۇشىن ءتيىمدى اۋەكومپانيانى انىقتاۋ, قازىرگى الەمدەگى قيىن جاعدايدا لوگيستيكا ماسەلەسىن شەشۋ جانە باسقا دا كوپتەگەن ۇيىمداستىرۋ شاراسىن جۇزەگە اسىردى.
قيىرداعىلار دا ەل قامقورلىعىن سەزىندى
لاتىن امەريكاسى مەن كاريب باسسەينى ەلدەرىنە بارعان قازاقستاندىقتار دا وتانىمىزعا ورالدى. كوروناۆيرۋستىق ينفەكتسيانىڭ قارقىندى تارالۋىنا بايلانىستى قازاقستاننىڭ مەكسيكاداعى ەلشىلىگى لاتىن امەريكاسى مەن كاريب باسسەينى ەلدەرىنەن وتانداستارىمىزدىڭ ەلگە ورالۋىنا كومەك كورسەتتى.
وسىلايشا, 13-25 ناۋرىز ارالىعىندا ءبىزدىڭ 127 وتانداسىمىز دومينيكان رەسپۋبليكاسىنان, 4 ادام مەكسيكادان, 3 جولاۋشى پانامادان جانە 3 ازاماتىمىز كوستا-ريكادان ورالدى.
اتالعان مەملەكەتتەردىڭ حالىقارالىق اۋە قاتىناستاردى توقتاتۋ مەن شەتەل ازاماتتارىنا حالىقارالىق اۋەجايلارداعى ترانزيتتىك ايماقتاردان شىعۋعا تىيىم سالۋلارىنا بايلانىستى بىرقاتار قيىندىق ورىن العان بولاتىن. اتالعان كەدەرگىلەرگە قاراماستان, مەحيكو مەن ماسكەۋدەگى ءبىزدىڭ ديپلوماتتارىمىزدىڭ ۇيلەسىمدى ارەكەتتەرىنىڭ ارقاسىندا قازاقستاننىڭ كوپتەگەن ازاماتىن ماسكەۋ ارقىلى ترانزيتپەن ەلىمىزگە امان-ەسەن جەتكىزۋ جۇمىسى ءساتتى ۇيىمداستىرىلدى.
كوروناۆيرۋس پاندەمياسى اياسىندا اقش-تاعى قازىرگى جاعدايعا بايلانىستى ۆاشينگتونداعى قازاقستان ەلشىلىگىنىڭ جانە نيۋ-يورك پەن سان-فرانتسيسكوداعى قازاقستان باس كونسۋلدىقتارىنىڭ كومەگىمەن اقش اۋماعىنداعى 55 وتانداسىمىز ەلگە قايتارىلدى.
بىرقاتار حالىقارالىق اۋە رەيسىنىڭ بولماۋىنا جانە شەتەلدىكتەر ءۇشىن ترانزيتتىك ايماقتاردىڭ جابىلۋىنا بايلانىستى ءبىزدىڭ كوپتەگەن ازاماتىمىز قازاقستانعا ۇشىپ شىعۋ مۇمكىندىگىنەن ايىرىلدى.
وسى جاعدايدى نازارعا الا وتىرىپ, قازاقستاننىڭ اقش پەن رەسەيدەگى ەلشىلىكتەرى بىرلەسىپ, وتانداستارىمىزدىڭ نيۋ-يوركتەن ماسكەۋ ارقىلى ترانزيتپەن ۇشۋىن ۇيىمداستىردى. بۇعان دەيىن وسى باعىت بويىنشا ەلىمىزدىڭ 33 ازاماتى امان-ەسەن ەلگە ورالعان-دى.
ءوز ازاماتتارىمىزدى شەتەلدەردەن قايتارۋ جونىندەگى ءىس-شارالار اياسىندا قازاقستان رەسپۋبليكاسى قورعانىس مينيسترلىگى مەن سىرتقى ىستەر مينيسترلىگىنىڭ, سونداي-اق ساۋد ارابياسىنىڭ مەملەكەتتىك ورگاندارىنىڭ بىرلەسكەن كۇش-جىگەرىنىڭ ارقاسىندا 24 ناۋرىزدا وسى ەلدەن ءبىزدىڭ وتانداستارىمىز ەلگە قايتارىلدى.
قازاقستاننىڭ اسكەري-اۋە كۇشتەرى اسكەري-كولىك اۆياتسياسىنىڭ اتسالىسۋىمەن قازاقستاننىڭ 33 ازاماتى ساۋد ارابياسىنان جانە 2 ازاماتىمىز كۋۆەيتتەن دجيددا – ءال-كۋۆەيت – اقتاۋ باعىتى بويىنشا امان-ەسەن ۇيلەرىنە ورالدى. بۇل ازاماتتار كورولدىكتىڭ اۋماعىندا بولعان جانە ساۋد بيلىگى COVID-19 تارالۋىنا قارسى شارالار قابىلداۋ اياسىندا شەكتەۋ شارالارىن ەنگىزىپ, حالىقارالىق اۋە, جەر ءۇستى جانە تەڭىز قاتىناستارىنا تولىق تىيىم سالۋ سالدارىنان ەلدەن شىعا الماي قالعان-دى.
قازىرگى ۋاقىتتا ساۋد ارابياسىنىڭ اۋماعىندا قازاقستان رەسپۋبليكاسىنىڭ 100-گە جۋىق ازاماتى ءوز ەركىمەن قالدى. ولاردىڭ كوپشىلىگى كەلىسىمشارت بويىنشا كورولدىكتىڭ ءتۇرلى قالالارىندا جۇمىس ىستەيدى. سونىڭ ىشىندە تۋريستىك ۆيزامەن بارعان جانە مەككە مەن مەدينە قالالارىندا ۋاقىتشا جۇرگەن 11 ادام بار. ەلشىلىك پەن باس كونسۋلدىق اتالعان ازاماتتارمەن تۇراقتى بايلانىستا.
وتانداستارىمىزدى قازاقستانعا قايتارۋ بويىنشا قابىلدانىپ جاتقان شارالار اياسىندا پولشاعا وتاندىق SCAT اۋە كومپانياسىنىڭ ارنايى چارتەرلىك رەيسى جىبەرىلدى.
پولشا بيلىگى ەنگىزگەن رەجىم مەن شەكاراسىنىڭ جابىلۋىنا قاراماستان, ۆارشاۆاداعى قازاقستان ەلشىلىگىنىڭ كۇشىمەن قازاقستاندىق جولاۋشىلاردى وتانىمىزعا قايتارۋ تۋرالى كەلىسىمگە قول جەتكىزىلگەنىن اتاپ وتكەن ءجون.
ءبىزدىڭ ديپلوماتتارىمىزدىڭ, يندۋستريا جانە ينفراقۇرىلىمدىق دامۋ مينيسترلىگى قىزمەتكەرلەرىنىڭ, سونداي-اق جەرگىلىكتى بيلىك پەن قازاقستاندىق اۋە كومپانياسى وكىلدەرىنىڭ ۇيلەسىمدى جۇمىسى ناتيجەسىندە ۇشۋىن بىرنەشە كۇن بويى كۇتىپ وتىرعان 207 جولاۋشى قازاقستانعا ءساتتى ورالدى. جولاۋشىلاردىڭ باسىم بولىگى ەۋروپادا وقيتىن قازاقستاندىق ستۋدەنتتەر.
شەكتەۋلەرگە قاراماستان ەلگە جەتكىزىلدى
18-22 ناۋرىز ارالىعىندا قازاقستاننىڭ باكۋدەگى ەلشىلىگىنىڭ جانە ازەربايجاننىڭ مەملەكەتتىك ورگاندارىنىڭ قولداۋىمەن وسى ەلدەن قازاقستانعا 51 وتانداسىمىز امان-ەسەن جەتىپ الدى.
وسىلايشا, 19-22 ناۋرىز ارالىعىندا باكۋ پورتىنان اقتاۋ قالاسىنا پارومدىق قاتىناس ارقىلى 41 ادام كەلدى. قازاقستاننىڭ 10 ازاماتى ەلگە باكۋدەن ماسكەۋ ارقىلى قازاقستاننىڭ ءۇش قالاسى – الماتى, نۇر-سۇلتان جانە اتىراۋعا اۋە قاتىناسىمەن ورالدى. 23 ناۋرىزدا باكۋدەن اقتاۋ پورتىنا ەلىمىزدىڭ تاعى 13 ازاماتى پاروممەن جەتكىزىلدى.
قازاقستان ديپلوماتتارىنىڭ كۇش-جىگەرىمەن ءۇندىستان جانە وڭتۇستىك-شىعىس ازيانىڭ بىرقاتار ەلىنەن ازاماتتارىمىز ەلگە ورالدى. ءۇندىستان بيلىگىنىڭ حالىقارالىق رەيستەردى جۇزەگە اسىرۋعا تىيىم سالعانىنا قاراماستان, 17-22 ناۋرىز ارالىعىندا دەليدەگى قازاقستان ەلشىلىگىنىڭ ديپلوماتتارى ءبىزدىڭ 538 ازاماتىمىزعا قازاقستانعا قايتۋعا قولداۋ كورسەتتى.
17 ناۋرىزدا قازاقستاندىق «Kompas Tour» تۋروپەراتورىنىڭ چارتەرلىك رەيسىمەن گوا شتاتىنان الماتىعا 204 قازاقستان ازاماتى كەلدى. قالعان 77 جولاۋشى گوا – دەلي – الماتى باعىتىمەن ەلگە ورالدى. سونىمەن قاتار 204 قازاقستاندىق شري-لانكادان «تۋريستىك قامقور» قورى ۇيىمداستىرعان چارتەرلىك رەيسپەن شىعارىلدى. تاعى ەكى وتانداسىمىزعا وسى ەلدىڭ استاناسى كولومبودان ۇشىپ شىعۋعا جاردەم كورسەتىلدى. 10 قازاقستاندىق تۋريست مالديۆ رەسپۋبليكاسىنان مالە – ماسكەۋ – الماتى باعىتىمەن ۇشىپ كەتتى.
قازاقستاننىڭ مالايزياداعى ەلشىلىگى ءبىزدىڭ ازاماتتارىمىزعا قانداي دا ءبىر ايىپپۇل سانكتسيالارىن تولەمەي, بيلەت مەرزىمىن اۋىستىرۋعا كومەك كورسەتتى. سونىمەن قاتار مالايزياداعى ديپلوماتتارىمىزدىڭ كومەگىمەن 22 ناۋرىزدا Air Astana اۋەكومپانياسىنىڭ كۋالا-لۋمپۋر – الماتى باعىتى بويىنشا تۇراقتى رەيسىمەن 158 جولاۋشى, سونىڭ ىشىندە يندونەزيا مەن سينگاپۋردان 80 ترانزيتتىك جولاۋشى ورالدى.
ەلشىلىك پەن Air Astana اۋە كومپانياسىنىڭ قىزمەتكەرلەرى اۋەجايدا اتالمىش جولاۋشىلارعا ىستىق تاماق ۇيىمداستىردى. اۋە كومپانياسىنىڭ اقپاراتى بويىنشا كۋالا-لۋمپۋر – الماتى باعىتىنداعى سوڭعى رەيس 29 ناۋرىزعا جوسپارلانعان.
ناۋرىز مەيرامى قارساڭىندا شەتەلدەردەن 800-دەن استام وتانداسىمىز ۇيىنە كەلدى. 22 ناۋرىزدا قازاقستاننىڭ مىسىرداعى ەلشىلىگىنىڭ ديپلوماتتارى ءبىزدىڭ تۋريستەردى شارم ءال-شەيح – الماتى باعىتى بويىنشا چارتەرلىك رەيسكە وتىرعىزۋعا قولعابىس كورسەتتى.
ءبىزدىڭ تۋريستەر ءۇشىن Scat اۋە كومپانياسى ۇيىمداستىرعان چارتەرلىك رەيسكە ديپلوماتتاردىڭ كۇشىمەن كاير جانە الەكساندريا قالالارىندا ۋاقىتشا بولعان (تۇرعان) ازاماتتارىمىزدىڭ ىشىنەن قوسىمشا جولاۋشىلار وتىرعىزىلعانىن اتاپ وتەمىز. جۇرگىزىلگەن جۇمىستىڭ ناتيجەسىندە 235 ازاماتىمىز ەلگە ورالدى.
سونداي-اق تۇركيادا قازاقستاندىق ديپلوماتتار ەلىمىزدىڭ 536 ازاماتىن ەلگە جىبەرۋگە كومەك كورسەتتى. ولار ىستانبۇل اۋەجايىنىڭ ترانزيتتىك ايماعىندا جينالعان وتانداستارىمىزدى جونەلتۋ جونىندە ايتارلىقتاي اۋقىمدى جۇمىس جۇرگىزگەنىن اتاپ وتكەن ءجون. بۇدان بولەك, 32 ازاماتىمىز ماجارستان مەن ومانداعى ديپلوماتتاردىڭ قولداۋىمەن ەلگە جىبەرىلدى.
سونىمەن قاتار 20-21 ناۋرىزدا قازاقستاننىڭ دۋبايداعى باس كونسۋلدىعىنىڭ ء(باا) ديپلوماتتارى ءبىزدىڭ ازاماتتارىمىزدى وتانىنا قايتارۋ بويىنشا جۇرگىزىلىپ جاتقان جۇمىستار اياسىندا تۋريستەرىمىزدى دۋباي – الماتى (2 رەيس) جانە دۋباي – نۇر-سۇلتان باعىتتارى بويىنشا رەيستەرگە وتىرعىزۋدى جۇزەگە اسىردى.
اتالعان رەيستەرگە ديپلوماتتاردىڭ كۇشىمەن ەل اۋماعىندا جۇرگەن قوسىمشا جولاۋشىلار قوسىلعان. اتقارىلعان جۇمىستاردىڭ ناتيجەسىندە ءبىزدىڭ 463 ازاماتىمىز ەلگە ورالدى. باس كونسۋلدىق قالعان وتانداستارمەن تۇراقتى بايلانىستا جانە ولارعا قاجەتتى كومەك كورسەتۋدە.
جالپى, وتانداستارىمىزدى شەتەلدەردەن قايتارۋ بارىسىندا قازاقستاندىق اسكەري قىزمەتشىلەردىڭ دە ەڭبەگى ەرەكشە. ولار شەتەلدە ءتۇرلى قيىن جاعدايلاردا قالعان وتانداستارىمىزعا تىكەلەي كومەك كورسەتەدى.
قورىتا ايتقاندا, سىرتقى ىستەر مينيسترلىگى اتقارىپ جاتقان شارۋا شاش-ەتەكتەن. وسى ورايدا, ەلىمىزدىڭ ديپلوماتيالىق قىزمەتكەرلەرىنە الداعى جۇمىسىنا ساتتىلىك تىلەگەندى ءجون كوردىك. تولقۇجاتىمىزدا «پاسپورت قازاقستان رەسپۋبليكاسىنىڭ مەنشىگi بولىپ تابىلادى, ال ونىڭ يەسi قازاقستان رەسپۋبليكاسىنىڭ قورعاۋىندا بولادى» دەپ انىق كورسەتىلگەن. ياعني قيىن-قىستاۋ كەزەڭدە قالعان ءاربىر ازاماتىمىزدى قورعاۋ, كومەك كورسەتۋ – مەملەكەتتىڭ باستى مىندەتى. بۇل تۇرعىدان العاندا, سىرتقى ىستەر مينيسترلىگى قىزمەتكەرلەرى بۇل مىندەتتى ادال اتقارىپ كەلەدى.
