بيزنەس • 30 ناۋرىز، 2020

كاسىپكەرلەر جاعدايى «اتامەكەن» ۇلتتىق كاسىپكەرلەر پالاتاسىنىڭ نازارىندا

27 رەتكورسەتىلدى

كاسىپكەرلەردىڭ 58%-ى كەلىسىمشارتتى بۇزىپ، 19%-ى قىزمەتكەرلەرىن قىسقارتقان. بۇل مالىمەتتەر «اتامەكەن» ۇلتتىق كاسىپكەرلەر پالاتاسى قۇقىقتىق قامتاماسىز ەتۋ دەپارتامەنتىنىڭ ديرەكتورى شىڭعىس تەمىردىڭ بۇگىن ونلاين جۇيەسىندە وتكەن جيىنى كەزىندە بەلگىلى بولدى. ش. تەمىر  توتەنشە جاعداي كەزىندە پالاتا كاسىپكەرلەردىڭ ماسەلەسىن قالاي شەشەتىنىن جاريالادى.  

كاسىپكەرلەردى قولداۋ ماقساتىندا قۇرىلعان جەدەل شتابقا كۇنى بۇگىنگە دەيىن بيزنەس سۋبەكتىلەرىنەن 11 مىڭعا جۋىق سۇراق كەلىپ ءتۇستى. كۇن تارتىبىندە تۇرعان وزەكتى ماسەلەلەردىڭ بىرقاتارىنا  atameken.kz سايتى ارقىلى جاۋاپ بەرىلگەن.  

شىڭعىس تەمىردىڭ تۇسىندىرۋىنشە، كاسىپكەرلەر پالاتانىڭ رەسمي رەسۋرسى نەمەسە Call-ورتالىقتىڭ 1432 قىسقا ءنومىرى ارقىلى ساراپشىلارعا سۇراق جولداي الادى. «بىزگە كەلگەن سۇراقتاردىڭ باسىم بولىگى توتەنشە جاعداي كەزىندە بيزنەس نىسانداردى جالعا بەرۋ مەن جالعا الۋعا قاتىستى بولدى. وسى ماسەلە بويىنشا حابارلاسقانداردىڭ 86%-ىن – ميكرو، 12%-ىن – ورتا، 2%-ىن – ءىرى بيزنەس وكىلدەرى قۇرادى. جالپى العاندا بۇلاردىڭ 62%-ى – قىزمەت كورسەتۋ، 22%-ى – ساۋدا، 15%-ى – ءوندىرىس سالاسىندا جۇمىس ىستەيىنى بەلگىلى بولدى.

ونىڭ سوزىنشە، «اتامەكەن» ۇلتتىق كاسىپكەرلەر پالاتاسى توتەنشە جاعداي كەزىندە بيزنەس نىسانداردى جالعا بەرۋ مەن جالعا الۋ ماسەلەسىن شەشۋ ءۇشىن ارنايى جۇمىس توبىن قۇرىلىپ، ماسەلەنى مەدياتسيا ارقىلى شەشۋدى ۇسىنعان. 

«مەملەكەتتىڭ مەنشىگىندەگى نىسانداردى جالعا بەرۋ مەن الۋ ۇدەرىسىندە ماسەلە وڭ شەشىلدى. سەبەبى مەملەكەتتىك كوميسسيانىڭ وتىرىسىندا پرەزيدەنت اكىمدىكتەرگە 20 ناۋرىزدان باستاپ شوب-قا مەملەكەت مەنشىگىندەگى نىسانداردى 3 اي اقىسىز بەرۋدى، ياعني كاسىپكەرلەردى جالعا الۋ اقىسىن تولەۋدەن بوساتۋدى تاپسىردى. بۇل جەڭىلدىككە يە بولۋ ءۇشىن مەملەكەتتىك م ۇلىك جانە جەكەشەلەندىرۋ كوميتەتىنىڭ www.gosreestr.kz سايتى ارقىلى ەلەكتروندى قولتاڭبامەن وسىعان دەيىنگى جالعا الۋ شارتىنا وزگەرىس ەنگىزۋ ءۇشىن قوسىمشا كەلىسىمشارتقا وتىرۋ قاجەت. قوسىمشا كەلىسىمشارت كاسىپكەرگە جالداۋ اقىسىن 3 اي تولەمەۋ قۇقىعىن بەرەدى»، – دەدى شىڭعىس تەمىر.

ونىڭ پىكىرىنشە، جالعا بەرۋشى شىعىنعا ۇشىرايتىن جاعدايدا جۇمىس ىستەۋگە ءتيىستى ەمەس. جالعا الۋشى دا جاپا شەكپەۋى كەرەك.  

«بارلىق بيزنەس سۋبكتىسىنە تەڭ مۇمكىندىك بەرىلىپ، بىردەي جاعداي جاسالادى. ءبىز جالعا بەرۋشىلەردەن بيزنەسكە كومەك بەرۋدى سۇرايمىز.  ەگەر جالعا بەرۋشىلەرگە بانك تاراپىنان ماسەلە تۋىنداپ جاتسا، ءبىز بانككە بىرگە بارىپ، ماسەلەنى شەشۋگە تىرىسامىز. ەگەر سالىق ورگانىمەن ماسەلە تۋىنداسا، ماماندارىمىز كومەك كورسەتۋگە ءازىر. ەڭ تومەنگى ەڭبەكاقىنى راسىمدەۋگە اتسالىسۋعا دا دايىنبىز!» – دەپ قورىتتى ءسوزىن دەپارتامەنت ديرەكتورى.

سوڭعى جاڭالىقتار

ۇقساس جاڭالىقتار