كوروناۆيرۋس • 30 ناۋرىز، 2020

كوروناۆيرۋستان بتسج ۆاكتسيناسى قۇتقارۋى مۇمكىن

931 رەتكورسەتىلدى

بتسج ۆاكتسيناسى كوروناۆيرۋس ينفەكتسياسىنان ساقتانۋدىڭ بىردەن-ءبىر جولىنا اينالۋى مۇمكىن. بۇل تۋرالى بىرقاتار بۇقارالىق اقپارات قۇرالى حابارلادى.

الەمدى جايلاعان ىندەتپەن كۇرەسۋ ءۇشىن دارىگەر مەن عالىمدار قولدا بار مۇمكىندىكتىڭ ءبارىن قاراستىرىپ جاتقانى بەلگىلى. سولاردىڭ ءبىرى – بتسج ۆاكتسيناسى. زەرتتەۋشىلەر وسى ەكپە ءتۇرى كەڭ كولەمدە سالىنعان ەلدەردە Covid-19 ۆيرۋسىنان قازا تاپقاندار سانى الدەقايدا از ەكەنىن بايقاعان.

وسىعان بايلانىستى، بىرقاتار مەملەكەتتە اتالعان ۆاكتسينانى كوروناۆيرۋستىڭ الدىن الۋ ماقساتىندا قولدانىپ كورمەك. Science جۋرنالىنىڭ حابارلاۋىنشا، وسى اپتادا ەرىكتى دارىگەرلەر بتسج ەكپەسىن سالدىرىپ، تاجىريبە جاساپ كورمەك.

Bloomberg اگەنتتىگىنىڭ دەرەكتەرىنە سۇيەنسەك، اۋستراليانىڭ مەلبۋرن قالاسىندا دا تۋبەركۋلەزگە قارسى وسى ەكپەنى Covid-19-عا قانشالىقتى توتەپ بەرەتىنىن تەكسەرمەك.

ايتا كەتۋ كەرەك، بتسج – «كالمەت-گەرەن باتسيللاسى» دەپ اتالاتىن، تۋبەركۋلەزگە قارسى بۇل ۆاكتسينانىڭ قولدانىسقا ەنگەنىنە ءبىر عاسىردان اسىپ كەتتى. قازىرگى تاڭدا الەمنىڭ كوپتەگەن ەلىندە ەكپەنىڭ بۇل ءتۇرىن سالدىرۋ مىندەتتى. ايتسە دە، ەۋروپانىڭ بىرقاتار مەملەكەتىندە بتسج جاپپاي سالىنبايدى. ولاردىڭ قاتارىندا يسپانيا، يتاليا جانە شۆەيتساريا بار.

سوڭعى جاڭالىقتار

ۇقساس جاڭالىقتار