قارجى • 30 ناۋرىز، 2020

تابىسىنان ايرىلعاندارعا الەۋمەتتىك تولەماقى الۋدىڭ تالاپتارى جەڭىلدەتىلدى

363 رەتكورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگى  توتەنشە جاعداي كەزىندە تابىسىنان ايىرىلعان تۇلعالارعا مەملەكەتتىك الەۋمەتتىك ساقتاندىرۋ قورىنان (ماسق) تولەنەتىن جاڭا الەۋمەتتىك تولەماقى الاتىندار ءتىزىمىن كەڭەيتىپ، تالاپتارىن جەڭىلدەتەتىن شەشىم قابىلدادى.

ءبىر ادامعا ايىنا 42،5 مىڭ تەڭگە كولەمىندە (ەڭ تومەنگى جالاقى مولشەرى) تاعايىندالاتىن الەۋمەتتىك كومەكتى الۋشىلار قاتارى ۇلعايتىلدى.  بۇعان دەيىن بەكىتىلگەن ميكرو، شاعىن جانە ورتا بيزنەس وكىلدەرى، جەكە كاسىپكەرلەر، جەكە تاجىريبەدەگى (نوتاريۋس، جەكە سوت ورىنداۋشى، ادۆوكات، كاسىبي مەدياتور) تۇلعالار، بىررەتتىك تولەم جيىنتىعىن تولەۋشىلەر قاتارىنا تومەندەگى تۇلعالار دا ەنگىزىلدى:

– ازاماتتىق-قۇقىقتىق كەلىسىم-شارت نەگىزىندە تابىس تاپقان، مىندەتتى زەينەتاقى جارناسى سالىق تولەۋشىلەر ەسەبىنەن تولەنگەن ازاماتتار;

– كارانتين جاريالانعان ەلدىمەكەندەردەگى ءىرى بيزنەس نىساندارىنىڭ جۇمىسكەرلەرى.

توتەنشە جاعداي كەزىندە تابىسىن جوعالتقاندىعىن راستايتىن قۇجاتتاردى ۇسىنۋ ءتارتىبى كۇشىن جويدى. الەۋمەتتىك تولەماقى تاعايىندالۋ ءۇشىن جۇمىس بەرۋشى وتىنىشپەن بىرگە تەك جۇمىسكەرلەرىنىڭ ءتىزىمىن بەرەدى. جوعارىدا اتالعان تۇلعالار تەك ءوزىنىڭ جەكە مالىمەتتەرىن كورسەتۋ ارقىلى ءوتىنىش بەرە الادى.

سونداي-اق، قىزمەتكەردىڭ ءوزى دە ءوتىنىش بەرە الادى. جەكە تۇلعالار ءوتىنىشىن ەلەكتروندى تۇردە «ەلەكتروندى ۇكىمەت» ۆەب-پورتالىنا قالدىرا الادى. ول ءۇشىن ءوتىنىش بەرۋشىلەر توتەنشە جاعداي كەزىندە تابىسىنان ايىرىلعاندىعى تۋرالى مالىمەتتىڭ دۇرىستىعىنا ءوزى جاۋاپتى بولادى.

ەستەرىڭىزگە سالا كەتەيىك، بۇرىن الەۋمەتتىك تولەمگە ءوتىنىشتى جۇمىس بەرۋشىلەر وزدەرىنىڭ جۇمىسشىلارى ءۇشىن بەرسە، جەكە كاسىپكەرلەر، شاعىن كاسىپكەرلەر جانە ءبىر جولعى تولەمدى تولەۋشىلەر وزدەرى ءۇشىن بەرەتىن.

سونىمەن بىرگە، جۇمىس بەرۋشىلەر توتەنشە جاعداي كەزىندە قىزمەتتى شەكتەۋگە بايلانىستى ءوز قىزمەتكەرلەرىنىڭ كىرىستەرىن جوعالتۋىن راستايتىن قۇجاتتاردى، قىزمەتكەرلەردىڭ ءتىزىمىن جانە قىزمەتكەرلەرگە جالاقىسى ساقتالمايتىن ەڭبەك دەمالىسىن بەرۋ تۋرالى بۇيرىقتان ءۇزىندى ۇسىنۋى كەرەك بولاتىن.

تولەماقىنى تولەۋ ءۇشىن قاجەتتى الەۋمەتتىك ساقتاندىرۋ جۇيەسىنە قاتىسۋ مەرزىمى قىسقارتىلدى. ەگەر بۇرىن تولەماقىنى تاعايىنداۋ ءۇشىن الەۋمەتتىك ساقتاندىرۋ جۇيەسىنە سوڭعى 12 اي ىشىندە كەمىندە 3 اي قاتىسقاندىعى تۋرالى مالىمەت تالاپ ەتىلگەن بولسا، ەندى تولەماقىنى تاعايىنداۋ ءۇشىن جۇمىس بەرۋشى جۇمىسكەرىنە 12 ايدادا ەڭ بولماسا 1 رەت  الەۋمەتتىك جارنا اۋدارعان بولسا، جەتكىلىكتى.

الەۋمەتتىك تولەماقىدان ۇمىتكەرلەر ءوزىنىڭ الەۋمەتتىك اۋدارىمىنىڭ نەمەسە زەينەتاقى جارناسىنىڭ بار-جوعىن دالەلدەپ جاتۋى مىندەتتى ەمەس، ول تۋرالى «تۇرعىندارعا ارنالعان ۇكىمەت» ۇاق اۆتوماتتى تۇردە تەكسەرەدى.

سونىمەن قاتار، وتىنىشتەردى قاراۋ جانە الەۋمەتتىك تولەماقىلاردى تاعايىنداۋ مەرزىمى 7 كۇننەن 3 كۇنگە قىسقارتىلدى.

توتەنشە جاعداي كەزىندەگى ماسق-دان تولەنەتىن جاڭا الەۋمەتتىك تولەماقى تۋرالى قاجەتتى كەڭەستەر الۋ ءۇشىن «جەدەل جەلى» قىزمەتى جۇمىس ىستەيدى:

 +7 707 335 06 13

 +7 707 335 05 14

 +7 707 335 06 15

 +7 702 047 29 35

 +7 702 172 39 21

 +7 702 957 45 93

 +7 775 882 51 46

 +7 775 822 52 87

 +7 775 882 53 49

 +7 775 882 53 66

 +7 778 382 27 26

 +7 778 487 33 48

 «جەدەل جەلى» كۇن سايىن ساعات 09:00-دەن ساعات 18:00-گە دەيىن ىستەيدى.

الماتى

سوڭعى جاڭالىقتار

ۇقساس جاڭالىقتار