قازاقستان • 30 ناۋرىز، 2020

توعىز قالادا دەزينفەكتسيالاۋ جۇمىسى جۇرۋدە

12 رەتكورسەتىلدى

توتەنشە جاعداي جاريالانعان العاشقى كۇننەن باستاپ نۇر-سۇلتان، الماتى، شىمكەنت، اقتاۋ، اقتوبە، اتىراۋ، قاراعاندى، قىزىلوردا مەن تاراز قالالارىندا ورنالاسقان قۇرىلىس نىساندارى مەن ولارعا قاراستى اۋماقتاردىڭ قارۋلى كۇشتەرى بيولوگيالىق قورعانىس بولىمشەلەرىنىڭ اسكەري قىزمەتشىلەرى ارنايى زالالسىزداندىرۋ جۇمىسىن اتقارۋدا.

اسكەري قىزمەتشىلەردى جاۋىنگەرلەردى جاپپاي جويۋ قارۋىنان ۇرىس الاڭىندا قورعاۋمەن اينالىساتىن ازاماتتىق قورعانىس جۇمىستارىنا تارتۋ – قاجەتتىلىك سانالادى. قازاقستان پرەزيدەنتى – قارۋلى كۇشتەردىڭ جوعارى باس قولباسشىسى قاسىم-جومارت توقاەۆتىڭ تاپسىرماسىنا سايكەس دەزينفەكتسيالاۋ جۇمىستارىنىڭ اۋماعى كەڭەيتىلىپ، بيولوگيالىق قورعانىس بولىمشەلەرىنىڭ سانى ارتتىرىلدى. 

نۇر-سۇلتان قالاسىندا دەزينفەكتسيالاۋ جۇمىسى قالاي جۇرگىزىلىپ جاتقانىن قورعانىس ءمينيسترى نۇرلان ەرمەكباەۆ تەكسەردى. اڭگىمەلەسۋ بارىسىندا ول اسكەري قىزمەتشىلەردىڭ قازاقستان ازاماتتارىنىڭ دەنساۋلىعى مەن اماندىعىن ساقتاۋدا اتقاراتىن جۇمىستارى ماڭىزدى جانە اۋقىمدى ەكەندىگىن ايتتى.

– اسكەريلەردىڭ ەرەكشەلىگى – بەيبىت كەزدە ىستەرى كورىنبەي، قيىن كەزەڭدە كومەككە كەلەتىنى. ەلىمىزدە قاجەتتى شارالار قولعا الىنىپ، ينفەكتسياعا قاتىستى جاعداي باقىلاۋعا الىنعان. بىراق ءبىراز جيناقتالىپ، ۇستامدىلىق تانىتۋ قاجەت. سىزدەرگە تەك باسشىلىقتىڭ عانا ەمەس، تۋعان-تۋىس، دوس-جاران جانە بارلىق قازاقستاندىقتاردىڭ نازارى اۋىپ، قۇرمەت، سەنىم جانە تۇسىنىستىكپەن قاراۋدا، – دەدى ن.ەرمەكباەۆ.

اسكەري قىزمەتشىلەر ءوز دەنساۋلىعىنىڭ قاۋىپسىزدىگىنە دە اسا ءمان بەرۋ كەرەك. ءبىر جاۋىنگەردىڭ سىرقاتى بولىمشەنىڭ عانا ەمەس، بۇكىل اسكەري ءبولىمنىڭ جاۋىنگەرلىك ازىرلىگىنە نۇقسان كەلتىرۋى مۇمكىن. اسكەريلەرگە بارلىق سانيتارلىق-گيگيەنالىق نورمالاردىڭ تالاپتارى قاتاڭ ساقتالىپ، ىندەتتىڭ العاشقى بەلگىلەرىن ءبىلۋ جانە ولار انىقتالعان كەزدە باسشىلىققا جەدەل تۇردە بايانداۋ جونىندە ەسكەرتىلدى.

اسكەريلەردىڭ فيزيكالىق بەلسەندىلىكتى ەسكەرىپ، جەكە قۇرامنىڭ تاماقتانۋ راتسيونىن قايتا قاراستىرىپ، دەنساۋلىقتى قالىپتى جاعدايدا ساقتاۋ ءۇشىن ۆيتاميندەر بەرۋدى ۇيىمداستىرۋ تاپسىرىلدى. اسكەري قىزمەتشىلەردىڭ كۇن سايىنعى مونشاعا بارۋى، كيىمدەردىڭ ارنايى قۇرالدارمەن تازالاپ، جەكە گيگيەنا قۇرالدارىمەن ۋاقىتىلى قامتاماسىز ەتۋلىلەرى ۇيىمداستىرىلعان. جۇمىس بارىسىندا اسكەري قىزمەتشىلەردىڭ دالادا كوپ ۋاقىت وتكىزۋلەرىنە بايلانىستى سەكتورلار بويىنشا ارنايى بيودارەتحانالار مەن اكىمشىلىك عيماراتتارعا كىرۋگە مۇمكىندىك بەرۋ ماسەلەسى قاراستىرىلۋدا.

دەزينفەكتسيالاۋعا جاتاتىن نىساندار مەن اۋماقتاردى تولىقتاي وڭدەۋ ەسكەرتىلدى. سونىمەن قاتار قۇرالداردى اۋىستىرۋ مەن جوندەۋ جۇمىستارىن جۇرگىزۋ ماسەلەسى شەشىلۋدە.

مينيستر ءوز اتىنان اسكەري قىزمەتشىلەرگە قىزمەتتەرى ءۇشىن، ونىڭ ىشىندە تۇنگى ۋاقىتتا ءىرى قالا نىساندارىن دەزينفەكتسيالاۋعا، قالا ماڭىنا جاقىن ورنالاسقان اۋىل ايماعىن ارنايى وڭدەۋ جۇمىسىنا قاتىسقاندارى ءۇشىن العىسىن ءبىلدىردى.

سوڭعى جاڭالىقتار

ۇقساس جاڭالىقتار