ايماقتار • 30 ناۋرىز، 2020

جامبىل وبلىسىندا «اسپارا» گيدروتورابى ىسكە قوسىلدى

42 رەتكورسەتىلدى

بۇگىن جامبىل وبلىسىنىڭ مەركى اۋدانىندا قايتا قالپىنا كەلتىرىلگەن «اسپارا» گيدروتورابى مەن قوسىمشا سۋمەن قامتۋ تراكتىسى ىسكە قوسىلدى. شاراعا جامبىل وبلىسىنىڭ اكىمى بەردىبەك ساپارباەۆ پەن ەلىمىزدىڭ ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرگەي گروموۆ قاتىستى.

جامبىل وبلىسى جەر ءۇستى سۋ رەسۋرستارىنىڭ 80 پايىزىنا جۋىعىن  شۋ مەن تالاس ترانسشەكارالىق وزەندەرى ارقىلى الادى. شەكارالاس مەملەكەتتەر اراسىندا سۋدى ءوزارا ءبولىسۋ وسى تۇرعىدا ارنايى بەكىتىلگەن ەرەجەلەر نەگىزىندە جۇزەگە اسىرىلادى. سوڭعى جىلدارى ءوڭىر ۆەگەتاتسيالىق كەزەڭىندە سۋارۋ ىلعالىنىڭ تاپشىلىعىن باستان كەشىرىپ كەلەدى. اعىمداعى جىلى ورتالىق ازيا ايماعىندا دا ىلعال تاپشىلىعى سەزىلەدى دەگەن بولجام بار. مامانداردىڭ ايتۋىنشا، بۇل شارۋالاردىڭ ويداعىداي ءونىم الا الماۋىنا اسەر ەتۋى مۇمكىن. وسى ماسەلەگە وراي، 2018 جىلى سۋ تاپشىلىعىن ءىشىنارا شەشۋ ءۇشىن اتالعان جوبا قولعا الىنعان بولاتىن. بۇگىنگى تاڭدا 1928 جىلى پايدالانۋعا بەرىلگەن «اسپارا» سۋ تورابى تولىعىمەن قايتا جاڭارتىلدى. «اسپارا قوسىمشا سۋمەن قامتۋ تراكتىسى» كانالىنىڭ 7،6 شاقىرىمدىق بەتون جامىلعىسى اۋىستىرىلدى. ول 3،7 مىڭ گەكتار سۋارمالى جەردى سۋمەن قامتۋعا نەگىزدەلگەن. سونداي-اق، سۋ جۇرەتىن ارنانى، تۇندىرعىشتى، اۆتوجول كوپىرلەرىن قايتا جاڭعىرتۋ بويىنشا جۇمىستار جۇرگىزىلىپ، اۆتوماتتى سۋ ەسەپتەگىش جۇيەسى دە تولىعىمەن جاڭارتىلعان. ناتيجەسىندە «اسپارا قوسىمشا سۋمەن قامتۋ تراكتىسىنىڭ» وتكىزۋ قابىلەتى سەكۋندىنا جەتىدەن توعىز تەكشە مەترگە دەيىن ءوسىپ وتىر.

نىساندى ىسكە قوسۋ ناتيجەسىندە  «اسپارا» جۇيەسىنىڭ ارنالارىمەن مەركى اۋدانىنىڭ القاپتارىن، سونىمەن قاتار 2،5 مىڭ گەكتاردى قۇرايتىن «ۇلكەن شۋ» كانالىنىڭ باتىس تارماعىنىڭ تومەنگى بولىگىندەگى اۋماقتى دا سۋمەن قامتۋعا مۇمكىندىك تۋىپ وتىر. بەردىبەك ساپارباەۆ جاڭارتىلعان سۋ تورابى مەن تاراتۋ ورتالىعىنىڭ جۇمىسىمەن جان-جاقتى تانىسىپ، جەرگىلىكتى فەرمەرلەرمەن اڭگىمەلەستى. اكىم نىسان ىسكە قوسىلعاننان كەيىن سۋارمالى جەر كولەمى قانشاعا ارتاتىنىن سۇرادى.  بۇل ورايدا اكىمگە 1،5 مىڭ گەكتار سۋارمالى جەردىڭ  اينالىمعا قوسىلۋى تۋرالى ايتىلدى. «جىل سايىن وبلىس بويىنشا 170 ميلليون تەكشە مەترگە دەيىن ىلعال جەتىسپەيدى. اعىمداعى جىلى ءبىزدىڭ شارۋالارىمىز سۋارمالى سۋدىڭ تاپشىلىعىن سەزبەۋى ءتيىس. ءبىزدىڭ مىندەتىمىز – سۋارمالى جەرلەردىڭ كولەمىن 200-210 مىڭ گەكتارعا جەتكىزۋ. «تاسوتكەل» سۋ قويماسىن جوندەۋ، كەم دەگەندە ءۇش شاعىن سۋ قويماسىن سالۋ جۇمىستارى جوسپارلانۋدا. ءبىز سۋدى جيناۋعا جانە ساقتاۋعا داعدىلانۋىمىز كەرەك. سۋارمالى سۋ ماسەلەسىن شەشۋ ارقىلى ءوڭىرىمىزدىڭ شارۋالارى ءۇشىن جوعارى رەنتابەلدى داقىلداردى ەگۋ جانە جوعارى ءونىم الۋ مۇمكىندىگىنە قول جەتكىزەمىز. قانت قىزىلشاسىنىڭ ەگىسىن ۇلعايتۋ قاجەت. بازارداعى ءتاتتى ءونىمنىڭ قۇنى ءوسىپ كەلەدى دەسەك، بۇل تۇرعىداعى باستى ماقسات – وبلىسىمىزدى قانتپەن قامتاماسىز ەتۋ. بۇل رەتتە ساپالى تۇقىمداردى پايدالانۋعا نازار اۋدارۋ قاجەت. ءبىز وسى ماسەلە بويىنشا سەمينار وتكىزەتىن بولامىز»، دەدى بەردىبەك ساپارباەۆ.

سونىمەن قاتار، مەركى اۋداندىق قوعامدىق كەڭەسىنىڭ توراعاسى سەرىك قۇرالباي اۋداندا 3،5 ميلليارد تەڭگەگە 41 ارنانى قايتا جاڭعىرتۋ جانە 5،6 ميلليارد تەڭگەگە 46 ۇڭعىمانى سالۋ جوبالارى جۇزەگە اسىرىلۋدا ەكەنىن ايتتى. بۇل جۇمىستار جەرگىلىكتى اگرارلىق سەكتوردىڭ دامۋىنا وڭ اسەر ەتەتىنى ءسوزسىز ەكەنىن جەتكىزدى. ال، ەلىمىزدىڭ ەكولوگيا، گەولوگيا جانە تابيعي رەسۋرستار ءمينيسترىنىڭ ورىنباسارى سەرگەي گروموۆتىڭ ايتۋىنشا، قۇنى 922،4 ميلليون تەڭگە بولاتىن جوبانىڭ تاپسىرىس بەرۋشىسى – اتالعان مينيسترلىكتىڭ سۋ رەسۋرستارى كوميتەتى ەكەن. نىساننىڭ اشىلۋ سالتاناتىندا باس عيمارات ىسكە قوسىلىپ، كانال ارقىلى  العاشقى سۋ اعىنى جىبەرىلدى. ەندى «اسپارا قوسىمشا سۋمەن قامتۋ تراكتىسى» جانە  «ۇلكەن شۋ» كانالىنىڭ باتىس تارماعىنىڭ تومەنگى بولىگىندە جەرلەرى بار شارۋالار ويداعىداي ءونىم الا الادى دەپ ايتۋعا بولادى.

جامبىل وبلىسى

سوڭعى جاڭالىقتار

ۇقساس جاڭالىقتار