ءبىلىم • 30 ناۋرىز، 2020

قاراعاندى وبلىسىنىڭ مەكتەپتەرى قاشىقتان وقىتۋدى باستايدى

40 رەتكورسەتىلدى

كوروناۆيرۋسقا قاتىستى ءماجبۇرلى تۇردە كانيكۋلعا كەتكەن مەكتەپ وقۋشىلارىنا «تىقىر» تاياندى. ەندى، ولار ءتورتىنشى توقسان باستالىسىمەن قاشىقتان وقي باستايدى.

جالپى، وقىتۋدىڭ مۇنداي تىڭ تاسىلىنە كوشۋگە قاراعاندى وبلىسىنداعى مەكتەپتەردىڭ قانشالىقتى دەڭگەيدە دايىن ەكەندىگىن اتالعان ۆەدومستۆونىڭ باسشىسى ەسەنعازى يمانعاليەۆ ايتىپ بەردى.

– ءساۋىردىڭ 6-نان باستاپ  وبلىستاعى ءبىلىم بەرۋ مەكەمەلەرى قاشىقتان وقىتۋعا كوشەدى. بۇل ءىس-شارا 155 095 وقۋشىسى بار قالالىق 208 مەكتەپتى جانە 38 519 بالا ءبىلىم الاتىن اۋىلدىق جەرلەردەگى 168 مەكتەپتى قامتيدى. ساباقتار Google Classroom، Daryn، online.kz، Edupage.org، Moodle جانە Zoom پلاتفورمالارىندا وتەدى، – دەپ مالىمدەدى ول.

ايتا كەتەتىن ءبىر جايت، وبلىستىڭ  اۋىلدىق جەرلەردەگى 131 مەكتەبى  وقىتۋدى ءداستۇرلى تۇردە جالعاستىرا بەرەدى. بۇلار ءوڭىردىڭ شالعاي اۋداندارىنداعى ءبىلىم وشاقتارى. مۇندا  وقۋشىلار سانى 80 بالادان كەم جانە ولار ەكى اۋىسىمدا وقيتىن بولادى. مەكتەپتەردە كابينەتتىك جۇيە توقتاتىلادى جانە عيماراتتاردىڭ ءوز ىشىندە سانيتارلىق تازالىق ءتارتىبى قاتاڭ تۇردە كۇشەيتىلەدى.

قاشىقتان وقىتۋ ءۇشىن ەڭ الدىمەن ينتەرنەت جانە گادجەتتەر مەن كومپيۋتەرلەردىڭ كەرەك ەكەندىگى بەلگىلى. سول سەبەپتى، قازىرگى تاڭدا وڭىردە بارلىق مۇعالىمدەر مەن وقۋشىلاردى قاجەتتى قۇرالدارمەن، سونداي-اق ينتەرنەتكە ۇزدىكسىز قولجەتىمدىلىكپەن قامتاماسىز ەتۋ جولىنداعى جۇمىستار قولعا الىنىپ جاتىر.

مىسالى، قازىر جەرگىلىكتى اتقارۋشى بيلىك كومپيۋتەرلەر مەن پلانشەتتەر ساتىپ الۋعا 377 ملن تەڭگە ءبولدى. بۇل قاراجاتقا وبلىستىڭ سەگىز ايماعى ءۇشىن 2 409 كومپيۋتەر مەن پلانشەت ساتىپ الۋ جوسپاردا بار.

جالپى العاندا، بۇگىنگى كۇندە وبلىس مۇعالىمدەرىنىڭ 92،5 %-ى قاشىقتان ساباق جۇرگىزۋگە ءازىر. سونىمەن بىرگە، وڭىردەگى وقۋشىلاردىڭ 95،1% كومپيۋتەرلەرمەن جانە گادجەتتەرمەن قامتاماسىز ەتىلگەن.

قازىر وبلىستاعى ۇيالى بايلانىس وپەراتورلارىمەن قاشىقتان وقىتۋ كەزەڭىندە جەلىگە قوسىلۋ پروبلەمالارى بار وقۋشىلارعا تەگىن نەگىزدە ءموبيلدى ينتەرنەت قىزمەتىن ۇسىنۋ تۋرالى كەلىسسوزدەر جۇرگىزىلۋدە. نەگىزىندە، ءوڭىردىڭ  بارلىق ينتەرنەت-پروۆايدەرلەرىمەن ارادا ءنول جانە مينۋسقا جەتكەن بالانستا دا پايدالانۋشىلاردى قىزمەتتەن اجىراتپاۋ جونىندە ۋاعدالاستىق بار.

قۋانارلىق ءبىر جايتتى ايتا كەتۋ كەرەك: وبلىستىق تسيفرلاندىرۋ باسقارماسىنىڭ باسشىسى رۋستام بايجانوۆ جەلىگە تۇسەتىن جۇكتەمەگە قاراماستان، قاشىقتان وقىتۋعا كوشۋگە بايلانىستى ينتەرنەت ىركىلىسسىز جۇمىس ىستەيتىن بولادى دەپ سەندىردى.

قاراعاندى وبلىسى

سوڭعى جاڭالىقتار

ۇقساس جاڭالىقتار