22-29 ناۋرىز ارالىعىندا 100-دەن استام كاسىپكەر جاۋاپكەرشىلىككە تارتىلدى: 98 ادامعا ايىپپۇل سالىنسا, 5 ادام 15 تاۋلىككە قاماۋعا الىندى, تاعى 9 ءىس سوتتا قاراستىرىلىپ جاتىر. ينۆەستيتسيا جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمۇرزاەۆ حابارلاعانداي, شاعىن جانە ورتا بيزنەس, ءىرى ساۋدا جەلىلەرى وكىلدەرىنىڭ باسىم بولىگى سانيتارلىق نورمالار مەن كارانتين ەرەجەلەرىن ۇستانىپ جاتىر.
"بۇل ءبىزدى قۋانتادى, بىراق زاڭبۇزۋشىلاردى انىقتاۋ جۇمىستارى جالعاسىپ جاتىر". ەستەرىڭىزگە سالا كەتەيىك, توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ شەشىمىنە سايكەس 28 ناۋرىز ساعات 00.00-دەن باستاپ, بىرقاتار قوسىمشا قاتاڭ شارالار بەكىتىلدى:
- ازىق-ت ۇلىك, ءدارى-دارمەك ساتىپ الۋدى جانە جۇمىسقا بارۋدى قوسپاعاندا, ازاماتتاردىڭ تۇرعىن ۇيدەن شىعۋىن شەكتەۋ;
- حالىق كوپ جينالاتىن ورىنداردى جابۋ (ساياباقتار, سكۆەرلەر, جاياۋ جۇرەتىن كوشەلەر, جاعالاۋلار, ويىن الاڭدارى جانە ت. ب.);
- كوشەلەردە جانە باسقا دا قوعامدىق ورىنداردا ءۇش ادامنان ارتىق توپتاسىپ جينالۋعا تىيىم سالۋ (وتباسى مۇشەلەرىنەن باسقا); كامەلەتتىك جاسقا تولماعانداردىڭ ۇلكەندەرسىز سىرتتا جۇرۋىنە تىيىم سالۋ.
30 ناۋرىزدان باستاپ 5 ساۋىرگە دەيىن اۆتوبۋستار جۇرمەيدى. دارىگەرلەر, پوليتسيا قىزمەتكەرلەرى جانە قالانىڭ تىنىس-تىرشىلىگىن قامتاماسىز ەتەتىندەردەن باسقاسى اپتا بويى جۇمىس ىستەمەيدى. ەلوردا اكىمدىگى كوروناۆيرۋسپەن كۇرەسىپ جاتقان مەديتسينا قىزمەتكەرلەرى ءۇشىن قوناق ۇيلەر, كولىك ءبولىپ, تاماق ۇيىمداستىردى. ەمحانالار مەن اۋرۋحانالاردا جۇمىس ىستەيتىن دارىگەرلەر ءۇشىن دە كولىك ۇيىمداستىرىلعان. كولىكتى CTS كومپانياسى ۇسىندى.
