ايماقتار • 28 ناۋرىز، 2020

اقتوبەدە قاشىقتان وقىتۋ تەحنولوگياسىنا ازىرلىك دەڭگەيى قالىپتى

58 رەتكورسەتىلدى

الەمگە جايىلعان پاندەميا ىندەتى قاشىقتان وقىتۋ ۇدەرىسىنە كوشۋگە ءماجبۇر ەتۋدە. بۇل باعىتتا قازىرگى كۇنى ەلىمىزدىڭ ءبىلىم بەرۋ جۇيەسىنىڭ الدىندا دا كۇردەلى سىن مەن جاۋاپتى مىندەتتەر تۇر دەۋگە ابدەن بولادى. جاڭا جۇيە الداعى ءساۋىر ايىنىڭ التىنشى جۇلدىزىنان باستاپ ەنگىزىلمەك. وسىعان وراي اقتوبە وبلىسىندا بۇرىن سوڭدى بەتتەسىپ كورمەگەن جاڭا فورماتتاعى وقىتۋ تەحنولوگياسىن جۇرگىزۋگە بايلانىستى جان-جاقتى ازىرلىك جۇمىستارى جۇرگىزىلۋدە.

بۇل رەتتە ەڭ الدىمەن وڭىردەگى 402 مەكتەپتە 151 000-عا جۋىق وقۋشى بار ەكەنىن ايتقان ءجون. اۋەلى بۇل شىركىندى باستاۋ قيىن دەگەندەي جاڭا ءىستىڭ باسى-قاسىندا جۇرگەندەر ونى شالعاي اۋداندار مەن اۋىلدارداعى ينتەرنەت جەلىسىنىڭ جاي-كۇيىمەن تانىسۋدان باستاپ وتىر. سونىمەن ءبىر مەزگىلدە وبلىستىق ءبىلىم باسقارماسىنا وقۋشىلاردىڭ كومپيۋتەر سمارتفوندارمەن قانشالىقتى دەڭگەيدە قامتىلعانى جونىندەگى دەرەكتەر جيناقتالۋ ۇستىندە. سوعان سايكەس ءتيىستى ساراپتامالار جاسالماق. بۇل جونىندە «Egemen.kz» تىلشىسىنە اقتوبە وبلىستىق ءبىلىم باسقارماسى باسشىسىنىڭ ورىنباسارى گۇلناز سۇلەيمەنوۆا ايتىپ بەردى.

سونداي-اق ونىڭ مالىمدەۋىنشە ينتەرنەت جەلىسى جوق اۋىلدىڭ بالالارىن قاشىقتىقتان وقىتۋ ءۇشىن «بالاپان» جانە «ەلارنا» تەلەارنالارى ارقىلى بەينەساباقتار وتكىزىلمەك. قازىر وبلىستا مەملەكەتتىك ستاندارت تالاپتارى مەن وقۋ باعدارلاماسىنا ساي تەلەساباقتاردىڭ ارنايى ءتۇسىرىلىمى جۇرگىزىلۋدە. ءىس-جوسپار كەشەنى شەڭبەرىندە 2000-نان استام بەينە ساباق ازىرلەنبەك. قازىردىڭ وزىندە ونىڭ 200-دەن استامى ءازىر ەكەن. بەينەساباقتار بارىسىندا نۇر-سۇلتان قالاسىنداعى نازارباەۆ زياتكەرلىك مەكتەپتەرى مەن ەلىمىزدىڭ ەڭ بىلىكتى پەداگوگ-ۇستازدارى ساباق بەرەتىنى بەلگىلى بولىپ وتىر. مۇنى جاڭا جۇيەنىڭ وزىندىك ءبىر وزگەشەلىگى مەن ارتىقشىلىعى دەۋگە بولادى. سونىمەن بىرگە بۇل ينتەرنەت جەلىسى جوق اۋىلدىڭ بالالارى ءۇشىن قولعا الىنعان تاپتىرماس مۇمكىندىك ەكەنى دە حاق.

بۇگىندە وبلىستا ءار سىنىپتىڭ بەس كۇندىك وقۋ جوسپارىنا ساي ساباق كەستەلەرى جاسالعان. ونىڭ ادىستەمەلىك نۇسقالارى قر ءبىلىم جانە عىلىم مينيسترلىگىنىڭ ارنايى ساراپتاماسىنان وتكىزىلگەن. ءوڭىردىڭ ايتەكە بي، قوبدا، قارعالى جانە مارتوك اۋداندارىنىڭ بىرقاتار اۋماقتارى رەسەيمەن شەكارالاس ورنالاسقان. سوندىقتان بۇل ەلدى-مەكەندەردە «بالاپان» جانە «ەلارنا» تەلەارنالارى كورسەتىلمەيدى. مۇنداعى تۇرعىندار تەك رەسەي تەلەارنالارىن عانا كورەدى. سوندىقتان دا اتالعان اۋىلداردا تەز ارادا «وتاۋ تۆ-نى» قوندىرۋ كوزدەلگەن.

سونىمەن بىرگە وبلىستا ادىسكەرلەر مەن پەداگوگتار ءۇشىن دە ارنايى ونلاين تەلەكۋرستار مەن ۆەبينار ازىرلەنگەن. قازىرگى كۇنى وبلىستىق ءبىلىم باسقارماسى جانىنداعى عىلىمي-ادىستەمەلىك ورتالىقتىڭ ماماندارى ارنايى كۋرس دارىستەرىن جۇرگىزۋدە. مۇنداعى باستى ماقسات –قاشىقتىقتان وقىتۋ تەحنولوگياسىنا قاتىستى ماسەلەلەردى ۇيىمداستىرۋدى  ءتۇسىندىرۋ بولىپ وتىر.

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار