ايماقتار • 28 ناۋرىز، 2020

قاراعاندى وبلىسىنىڭ اكىمى ءوڭىر تۇرعىندارىنا ۇندەۋ جاريالادى

420 رەتكورسەتىلدى

قاراعاندى وبلىسىنىڭ اكىمى جەڭىس قاسىمبەك تىكەلەي ەفيرگە شىعىپ، ءوڭىر تۇرعىندارىنا ۇندەۋ جاريالادى. ايتا كەتەتىن ءبىر جايت، وبلىس باسشىسىنىڭ بۇل قادامىن ارقا جۇرتى جىلى قابىلدادى. ناقتى دەرەكتەرگە سۇيەنگەن جۇيەلى ءھام جىگەرلى ءسوز وبلىس تۇرعىندارىنىڭ سەنىمىن كۇشەيتىپ، الاڭ كوڭىلدەردەگى ءۇمىت وتىن ۇرلەدى.

ءوڭىر باسشىسى ءوز سوزىندە وبلىستا كوروناۆيرۋس ىندەتىنە قارسى كۇرەستىڭ قالاي جۇرگىزىلىپ جاتقانىن جىلىكتەپ ايتىپ بەردى.

– قاراعاندى وبلىسىندا 540 مەديتسينا قىزمەتكەرى ۆاحتالىق جۇمىس رەجيمىمەن گوسپيتالدەرگە اۋىستىرىلدى. قورعانىس ماسكالارى مەن دەزينفەكتسيالاۋ قۇرالدارىنىڭ جەرگىلىكتى ءوندىرىسى جولعا قويىلدى. بىراق قازىرگى جاعدايدا مەديتسينالىق ماسكالارمەن ء بىرىنشى كەزەكتە مەديتسينا جانە پوليتسيا سالاسىنىڭ قىزمەتكەرلەرىن، ارنايى قىزمەت ماماندارىن قامتاماسىز ەتۋ كەرەك. سوندىقتان مەن بۇل جاعدايعا تۇسىنىستىكپەن قاراۋلارىڭىزدى سۇرايمىن.

وبلىستىق بيۋدجەتتەن ماتەريالدىق-تەحنيكالىق جابدىقتاۋعا قارجى ءبولىندى. وسىعان دەيىن مەديتسينا قىزمەتكەرلەرىن جەكە قورعانۋ قۇرالدارىمەن قامتاماسىز ەتۋ ءۇشىن وبلىس اكىمدىگىنىڭ رەزەرۆتىك قورى ەسەبىنەن كوستيۋمدەر مەن ماسكالار ساتىپ الىنعان بولاتىن.

الداعى ۋاقىتتا 677 بىرلىك مەديتسينالىق تەحنيكا ساتىلىپ الىنادى. سونداي-اق، جاقىن ارادا تەپلوۆيزورلاردىڭ جاڭا پارتياسىنىڭ جەتكىزىلۋىن كۇتىپ وتىرمىز، – دەدى جەڭىس قاسىمبەك.

ءوڭىر باسشىسى كوروناۆيرۋس جۇقتىرىپ، قاراعاندىدا ەمدەلىپ جاتقان ءتورت ادامنىڭ مينسك - نۇر-سۇلتان رەيسىمەن 18 ناۋرىزدا ۇشىپ كەلگەنىن، سول ساتتەن باستاپ ولاردىڭ كارانتينگە الىنعانىن ايتىپ ءوتتى.

«رەيستىڭ باسقا جولاۋشىلارىندا كوروناۆيرۋس بەلگىلەرى انىقتالعان جوق.
مەديتسينالىق پەرسونال سانيتارلىق قاۋىپسىزدىكتىڭ بارلىق شارالارىن جانە قاجەتتى حاتتامانى ۇستانۋدا»، دەپ اتاپ ءوتتى ول.

سونداي-اق، جەڭىس قاسىمبەك 1ا ساناتىنداعى ەلدەردەن قازاقستاندىقتاردى قابىلداپ الۋعا قاتىستى كەيبىر ازاماتتاردىڭ قورقىنىشتارى مەن نارازى پىكىرلەرىنە دە جاۋاپ بەرە كەتتى.

– قيىن جاعدايعا تاپ بولعان وتانداستارىمىزعا ادامگەرشىلىگىمىزدى ءبىلدىرۋىمىز اسا ماڭىزدى. ءبىز بارلىعىمىز ءبىر ەلدىڭ ازاماتتارىمىز، بۇل ۇشاقتارمەن ۇشىپ كەلگەن جاندار بىزگە بوتەن ەمەس. بىزدە ناۋقاستاردى قابىلداۋ، دياگنوستيكالاۋ جانە وقشاۋلاۋ ءۇشىن بارلىق رەسۋرستار بار، – دەپ اتاپ ءوتتى وبلىس اكىمى.

بۇدان بولەك، جەڭىس قاسىمبەك وبلىستىڭ باس سانيتارلىق دارىگەرىنىڭ 65 جاستان اسقان ازاماتتاردىڭ كوشەلەردە ءجۇرىپ-تۇرۋىن شەكتەۋ تۋرالى شەشىم قابىلداعانىن جەتكىزدى.

– اتالعان ساناتقا ەنەتىن ازاماتتارعا ازىق-ت ۇلىك پەن ءدارى-دارمەكتەر جەتكىزىلىپ تۇراتىن بولادى. 28 ناۋرىزدان باستاپ ەرەكشە وكىم شىعارىلعانعا دەيىن الاڭى 2000 شارشى مەتردەن اساتىن بارلىق ساۋدا ورتالىقتارى جابىلاتىن بولادى. اتالعان نىسانداردا ورنالاسقان تاماق ونىمدەرىن، دارىلىك زاتتاردى، مەديتسينالىق ماقساتتاعى بۇيىمداردى ساتاتىن ورىندار ادەتتەگى رەجيمدە جۇمىس ىستەيدى. بارلىق ساۋدا نىساندارىنا تاۋارلار مەن قىزمەتتەردى ساتۋدى ونلاين-رەجيمگە اۋىستىرۋ ۇسىنىلدى. ول ءۇشىن قاراعاندىلىق IT-ماماندار جەكە ونلاين-پلاتفورما ازىرلەدى. سونداي-اق، اۋدانىنىڭ كولەمىنە قاراماستان، ازىق-ت ۇلىكتىك ەمەس ساۋدا بازارلارىنىڭ قىزمەتى ۋاقىتشا توقتاتىلاتىن بولادى، – دەدى جەڭىس قاسىمبەك.

وبلىس باسشىسى وڭىردە ازىق-ت ۇلىك جەتكىزۋ جاعدايىنىڭ تۇراقتى ەكەنىن مالىمدەدى. وبلىستىق بيۋدجەتتەن تۇراقتاندىرۋ قورىن الەۋمەتتىك ماڭىزى بار ازىق-ت ۇلىك تاۋارلارىمەن تولىقتىرۋ ءۇشىن قوسىمشا 1 ملرد تەڭگە ءبولىنىپتى. ياعني، ازىق-ت ۇلىك تاپشىلىعىنا جول بەرىلمەيدى.

سونىمەن قاتار، ءوڭىر باسشىسى توتەنشە جاعدايداعى وقشاۋلانۋ تارتىبىنە قاراماستان، كەيبىر ادامداردىڭ ازاماتتاردىڭ دەنساۋلىعى مەن قاۋىپسىزدىگىنە قاۋىپ توندىرە وتىرىپ، شەكتەۋ شارالارىن سانالى تۇردە ساقتاماي جۇرگەنىنە قىنجىلىس ءبىلدىردى. ماسەلەن، ول ازىق-ت ۇلىك دۇكەندەرىندە سانيتارلىق نورمالاردى بۇزۋ، جالدامالى ءۇي-جايلاردا جاسىرىن جاپپاي ءىس-شارالاردى وتكىزۋ فاكتىلەرىنىڭ  انىقتالعانىن مىسالعا كەلتىردى.

وبلىس اكىمى قازىرگى ۋاقىتتا نۇر-سۇلتان قالاسىنا زاڭسىز جولمەن جولاۋشىلار تاسىمالداپ جۇرگەن اۆتوكولىك يەلەرىمەن پوليتسيانىڭ جۇمىس جۇرگىزىپ جاتقانىن حابارلادى.

– توتەنشە جاعداي ءتارتىبىن بۇزۋشىلار زاڭنىڭ بارلىق تالاپتارى بويىنشا جاۋاپقا تارتىلاتىنىن ەسكەرتەمىن. بۇل رەتتە ەشقانداي جەڭىلدىكتەر جاسالمايدى، – دەپ شەگەلەپ ايتتى ول.

ءسوزىنىڭ سوڭىندا ءوڭىر باسشىسى وبلىس تۇرعىندارىن سانيتاريالىق قاۋىپسىزدىكتىڭ بارلىق شارالارىن ساقتاپ، مۇمكىندىگىنشە ۇيدە وتىرۋعا شاقىردى. ء«بىزدىڭ ورتاق ماقساتىمىز – ينفەكتسيانىڭ تارالۋىنا جول بەرمەي، ۇيرەنشىكتى تۇرمىس سالتىنا جىلدام ورالۋ»،  دەپ تۇيىندەدى ءوزىنىڭ تۇرعىندارعا ارنالعان ۇندەۋىن جەڭىس قاسىمبەك.

قاراعاندى وبلىسى

سوڭعى جاڭالىقتار

ۇقساس جاڭالىقتار