ايماقتار • 28 ناۋرىز، 2020

كوكشەتاۋدا قاۋىپسىزدىك تالاپتارى قاتاڭ باقىلانۋدا

17 رەتكورسەتىلدى

اۋە قاتىناسى، تەمىرجول جانە اۆتوۆوكزالدارداعى قاۋىپسىزدىك شارالارى كۇشەيتىلگەن. ادام كوپ جينالاتىن نىساندار جاپپاي دەزينفەكتسيالانىپ جاتىر. بىرقاتارىنىڭ قىزمەتى ۋاقىتشا شەكتەلگەن نەمەسە مۇلدەم توقتاتىلعان.

ەلدەگى توتەنشە جاعدايدىڭ ەنگىزىلۋىنە بايلانىستى قاۋىپسىزدىك شارالارى بارىنشا كۇشەيتىلگەن. بۇعان دەيىن تەمىرجول ۆوكزالىندا 40 پويىز قاتىنايتىن، قازىر ولاردىڭ 33-ءى توقتاتىلعان. ال،  جولاۋشىلاردىڭ سانى تاۋلىگىنە 1 مىڭنان اسىپ جىعىلاتىن. ياعني، اۋە قاتىناسى، تەمىرجول، اۆتو ۆوكزالدارداعى قاۋىپسىزدىك باستى نازاردا. نۇرسۇلتان مەن الماتى قالالارىنان، سونداي-اق حالىقارالىق باعىتتاعى قاتىنايتىن پويىزدار توقتاتىلعان. جۇك پويىزدارىنا شەكتەۋ جوق.   

–تەمىرجول ۆوكزالىنداعى كوروناۆيرۋستىڭ الدىن-الۋ ماقساتىندا  كىرە بەرىس اۋماعىندا 3 بىردەي ديسپەنسەر ورناتىلعان. جولاۋشىلار قولىن تازارتادى. بارلىق قىزمەتكەرلەر بەتپەردەمەن جۇرەدى. 3 قاباتتا دا اۋرۋ بەلگىلەرى مەن ودان ساقتانۋ امالدارى تۋرالى كورنەكى اقپاراتتار ىلىنگەن. ساعات سايىن بارلىق تەمىرجول اۋماعىندا تازالىق جۇمىستارى جۇرگىزىلەدى. اسىرەسە، بانكومات، تەرمينال، كاسسا، كىرە بەرىس پەن قالاعا شىعاتىن ەسىكتىڭ تۇتقالارى بارلىعى مۇقيات تازارتىلادى. ءاربىر 5 مينۋت سايىن داۋىستى حابارلاما ارقىلى قاۋىپسىزدىك شارالارى تۋرالى اقپارات بەرەمىز،–دەيدى كوكشەتاۋ تەمىرجول ۆوكزالىنىڭ باستىعى روزا ارىستانقىزى.

سانيتارلىق-ەپيدەميولوگيالىق قىزمەت سالاسىنىڭ وكىلدەرى وزگە ستانتسيالاردان كەلگەن جولاۋشىلارعا تۇتاس مونيتورينگ جۇرگىزەدى. تەپلوۆيزورلار جەتكىلىكتى. تەحنيكالىق قىزمەتكەرلەر ءار ساعات سايىن ۆوكزالداردىڭ ءىشىن حلور قوسىلعان ەرىتىندىمەن جۋىپ شىعادى. ال مەكەمە قىزمەتكەرلەرىنە مەديتسينالىق ماسكا، سۋ وتكىزبەيتىن قولعاپتار مەن انتيسەپتيكتەر تاراتىلعان.

–25-ءشى ناۋىزدان باستاپ تەمىرجول ۆوكزالىندا سانيتارلىق باقىلاۋ بەكەتتەرى ۇيىمداستىرىلعان. ماسەلەن، 1 ب ساناتى بويىنشا مىندەتتى تۇردە 1 كۇن زەرتحانالىق ساراپتاما الۋ ءۇشىن كارانتينگە جاتقىزىلادى. ەگەر تەرىس ناتيجە كورسەتسە، 13 كۇن  ۇيدەگى كارانتينگە جابىلىپ، قارالاتىن بولادى،–دەيدى وبلىستىق تاۋارلار مەن كورسەتىلەتىن قىزمەتتىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ جەتەكشىسى ايناگۇل مۋسينا.

وڭىردە كوروناۆيرۋستىڭ الدىن-الۋ شارالارىنا ەرەكشە باسىمدىق بەرىلگەن. ايتسە دە، قۇزىرلى ورگاندار ازاماتتاردى اسا قاجەتتى جاعدايلار بولماسا، مۇمكىندىگىنشە ۇيدە بولۋلارىن سۇرايدى. سونىمەن قاتار، ادام كوپ جينالاتىن جەرگە بارماي، ناۋقاس ادامدارمەن قارىم-قاتىناستى بارىنشا شەكتەگەن ابزال.

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار