«جانجالدىق جاعدايلاردىڭ پايدا بولۋىنىڭ العىشارتتارى تەك تۇرمىستىق تۇرعىداعى قاقتىعىستار بولىپ تابىلاتىنىن اتاپ وتكەن ءجون. اعىمداعى جىلدىڭ 5 اقپانىندا قورداي اۋدانى سورتوبە اۋىلىندا تاسجول ۇستىندە ەكى ءتۇرلى ۇلت وكىلدەرىنىڭ اراسىندا ورىن العان جاعدايدان قارت ادامعا جاراقاتتار كەلتىرىلگەن. بۇل قىلمىس بويىنشا ەكى ادام كۇدىككە ىلىنگەن. ونىڭ بىرەۋى سوت سانكتسياسىمەن قاماۋعا الىنعان. جاقىن ارادا تەرگەۋ جۇمىستارىن اياقتاپ, ءىستى سوتقا جولدايمىز. وسى اۋىل تۇرعىندارىنىڭ ءبىرى 7 اقپان كۇنى ءوزىنىڭ باسقارۋىنداعى حوندا وديسسەي ماركالى اۆتوكولىگىمەن پوليتسيا قىزمەتكەرلەرىنىڭ زاڭدى تالابىنا باعىنباي, ءوزىنىڭ ۇيىنە كەتىپ قالعان. ءۇيىنىڭ جانىندا اۆتوكولىك جۇرگىزۋشىسى ءوزىنىڭ تۋىستارى مەن پوليتسيا قىزمەتكەرلەرىنە قارسى كۇش قولدانعان. كۇدىكتىلەر بىردەن ۇستالىپ, سوت سانكتسياسىمەن قاماۋعا الىنعان. ولاردىڭ زاڭسىز ارەكەتتەرى پوليتسيا قىزمەتكەرلەرىنىڭ جاۋاپتارىمەن عانا ەمەس, كۋاگەرلەردىڭ ۇيالى تەلەفوندارىنا جازىلعان بەينەجازبالارمەن راستالادى. وسى وقيعانى ينتەرنەت-رەسۋرستارداعى بەينەروليكتەردەن دە كورۋگە بولادى», دەدى ەرلىك كەنەنباەۆ.
سوت ۇكىمىمەن كىنالى دەپ تابىلعان 3 ادام سوتتالعان.
«وسى جىلدىڭ 18 ناۋرىزىنداعى سوت ۇكىمىمەن وسى ءۇش ادام كىنالى دەپ تابىلىپ, سوتتالعان. سوت ارقايسىسىنا 1,5 جىلدان باس بوستاندىعىنان ايىرۋ جازاسىن تاعايىندادى. ورىن العان وقيعالاردان سوڭ اۋداننىڭ جەرگىلىكتى تۇرعىندارى الەۋمەتتىك جەلى جانە مەسسەندجەرلەر ارقىلى جاعىمسىز حابارلامالاردى جىبەرە باستادى. بۇل جاعدايدا كريمينالدىق ەلەمەنتتەر پايدالانا وتىرىپ, مەسسەندجەرلەر ارقىلى الەۋمەتتىك الاۋىزدىقتى ناسيحاتتاپ, زورلىق-زومبىلىق ارەكەتتەرىن جاساۋعا شاقىرعان. جالعان اقپاراتتاردىڭ ىقپالىنا تۇسكەن كورشى ەلدى-مەكەندەردىڭ, باسقا وبلىس جانە قالالاردىڭ تۇرعىندارى توپتاسىپ, سورتوبە مەن ماسانشى اۋىلدارىنا كەلە باستاعان ءسويتىپ, 8 اقپانعا قاراعان ءتۇنى اتالعان اۋىلداردا جاپپاي تارتىپسىزدىك باستالىپ, ول كۇش قولدانۋ, توناۋ, م ۇلىكتى بۇزۋ, ورتەۋ جانە جويۋمەن ۇشتاسقان. وكىنىشكە قاراي, زارداپ شەككەندەر دە بار. ءبىزدىڭ 11 ازاماتىمىز قازا تاپتى, 192 ازامات ءارتۇرلى دەنە جاراقاتىن الدى. ونىڭ ىشىندە 19-ى پوليتسيا قىزمەتكەرلەرى. 168 تۇرعىن ءۇي, 122 اۆتوكولىك ب ۇلىنگەن جانە ورتەنگەن. پوليتسيا كۇشتەرى مەن ۇلتتىق ۇلان قىزمەتكەرلەرىمەن جاعداي باقىلاۋعا الىندى», دەدى باس پروكۋروردىڭ ورىنباسارى.
ونىڭ ايتۋىنشا, قىلمىستىق ىستەردى تەرگەۋ شەڭبەرىندە سوت سانكتسياسىمەن 7 ادام قاماۋعا الىنعان. بۇگىن جامبىل وبلىسى, الماتى جانە شىمكەنت قالالارىندا جاپپاي تارتىپسىزدىككە بەلسەندى قاتىسۋشىلاردى ۇستاۋ بويىنشا ارنايى وپەراتسيا جۇرگىزىلگەن.
«بۇگىنگى كۇنى مەملەكەت باسشىسىنىڭ تەرگەۋدىڭ تولىقتىعىن, وبەكتيۆتىلىگىن بارلىق كىنالى تۇلعالاردى جازاعا تارتۋدى قامتاماسىز ەتۋ جونىندەگى تاپسىرماسىنا سايكەس پروكۋراتۋرا جانە ىشكى ىستەر ورگاندارىنىڭ قىزمەتكەرلەرى قاتارىنان قۇرىلعان ۆەدومستۆو ارالىق جەدەل تەرگەۋ توبىمەن جاپپاي تارتىپسىزدىك جاعدايى تەرگەلۋدە. بارلىق ب ۇلىنگەن وبەكتىلەر مەن اۆتوكولىكتەرگە قاراۋ جۇرگىزۋ اياقتالىپ, ءتيىستى ساراپتامالار تاعايىندالدى. قىلمىستىق ىستەردى تەرگەۋ شەڭبەرىندە سوت سانكتسياسىمەن 7 ادام قاماۋعا الىنعان. بۇگىن جامبىل وبلىسى, الماتى جانە شىمكەنت قالالارىندا جاپپاي تارتىپسىزدىككە بەلسەندى قاتىسۋشىلاردى ۇستاۋ بويىنشا ارنايى وپەراتسيا جۇرگىزىلدى. ونىڭ ناتيجەسىندە 25 ادام ۇستالدى. ولاردىڭ ىشىندە قازاقتار, قىرعىزدار جانە دۇنگەندەر بار. ونىڭ 7-ءۋى بۇرىن سوتتالعان. ىستەردىڭ تەرگەلۋى جالعاسۋدا جانە ءبىزدىڭ ەرەكشە باقىلاۋىمىزدا», دەدى ەرلىك كەنەنباەۆ.
وسى جاعدايدى پايدالانا وتىرىپ, قازاقستاندىقتاردى تەك رەسمي اقپاراتقا سەنۋگە جانە تاراتۋعا شاقىردى.
«قىلمىستىق ىستەردىڭ تەرگەلۋ بارىسىندا تەك رەسمي دەرەككوزدەرىنە عانا سەنىم ارتۋدى, ءارتۇرلى ارانداتۋشىلارعا بەرىلمەۋدى سۇرادى. جالعان مالىمەتتەردى تاراتۋعا جانە جولداۋعا جول بەرمەۋ قاجەت. سوت تورەلىگىن جۇزەگە اسىرۋعا جانە سوتقا دەيىنگى تەرگەۋ جۇرگىزۋگە كەدەرگى جاساعانى ءۇشىن قر قىلمىستىق كودەكسىنىڭ 407 بابىمەن قىلمىستىق جاۋاپكەرشىلىك كوزدەلگەنىن تۇسىندىرەمىن. بۇگىن تولىق سەنىممەن قوردايداعى جاعداي تۇراقتى دەپ ايتا الامىن», دەدى باس پروكۋروردىڭ ورىنباسارى ەرلىك كەنەنباەۆ.
